這部大推薦，漫畫/動畫/真人TV版都唔錯，算係日常番，但一個小朋友會獨自生活，可想而知係同原生家庭有關，而小太郎嘅早熟同善良會更加令人睇到心翕。 男主角係小太郎鄰居，佢地嘅互動係好溫馨，小太郎生活技能好強(因為佢嘅過去)，但男主角內心會記得小太郎仲係一個小朋友，所以係某啲時刻嘅陪伴同埋以成年人身份幫手解圍，反而照顧到小太郎嘅童真一面。 小太郎嘅父母故事漫畫有更多鋪排同講述，但係會令人覺得好傷心，亦係現實中某啲家庭嘅倒影，尤其是曾經擁有幸福，卻慢慢變成不幸嘅過程。 通常細路都係有啲任性，所以小太郎嘅成熟同包容力實在唔應該係佢呢個年紀擁有。舉一個例，其他幼稚園嘅細路仔拎紙巾係睇紙巾包圖案可唔可愛有咩卡通，但小太郎會買柔軟保濕款，原因係味道比較甜，男主角後來先察覺到係因為小太郎以前係屋企捱餓時會食紙巾充飢，所以小太郎先咁重視紙巾嘅牌子。 漫畫動畫畫風都可愛，其實唔會有暴力場面，因為好多悲傷嘅過去都以間接形式透露，故事同配角都可以被人了解唔同概念嘅創傷後遺。真人版係劇情上有啲改變，但整體呈現都接近漫畫，演小太郎嘅童星都表現得好好。