冇睇過小說，但有聽書友介紹過故事， 個內容粗略知少少，可能本身唔係呢本書書迷，單睇電影我覺得可以接受，故事性ok。 - 就係睇緊真人RPG game，主角金獨子同其他人一齊做唔同任務，然後要拯救同幫小說男主劉眾赫，劇情冇咩大問題，係因為配角嘅故事係電影唔夠篇幅講，好多嘢都好快快手講完就要推進嘅感覺，得男主金獨子嘅過去有前後呼應，好好刻劃，到可能中後期，見佢中咗幻影地獄，睇番佢嘅過去先真係明白佢係個點嘅人，同埋點解佢咁執著於呢知冇人睇嘅故事，同點解想幫劉眾赫，有改變我原先對佢嘅預期，呢part係最好睇。 - 有關劉眾赫嘅冷漠同道德感薄弱嘅設定，如果唔係有事前了解，電影呈現嘅印象唔算好，因為冇提過佢其實回溯咗千幾次呢件事，就會唔明點解佢對男主處處考驗，成日推男主去死咁樣。 - CG其實算勁，係有時有啲眼花繚亂，冇聚焦點。武打場面只能講感受到演員有盡力，但肢體嘅狠勁呈現都係差啲(唔好講咩觀眾唔識打唔好評論，觀感呢啲嘢真係好主觀，而且睇太多70-90年代香港武打同功夫片後，胃口就會養大) - 睇臨尾伏筆，知佢想推續集，如果有續集都ok，但唔好隔太耐會好啲，《與神同行》1＆2果時對我黎講隔好耐。