電影好出名，但都係第1次正式由頭睇到尾。 雖然主角設定看似好特別， 但某程度同一般人嘅人生冇咩唔同， 都係生命遇上形形色色嘅人， 遇到開心同難過嘅事， 然後會經歷好多失去， 先知道咩係最值得珍惜。 係生命開始同就快到盡頭嘅時候，其實老人同嬰兒真係有好多相似點。 同樣係講一個人嘅旅程，我諗我會鐘意《阿甘正傳》多啲，尤其係戰爭果部分嘅故事。 - 女主角車禍撞斷腳果度，我明白男主角想講只要某個細節改變，可能呢件事就唔會發生，但命運要黎嘅時候係阻止唔到，但果part我實在覺得有啲累贅，相似嘅嘢唔駛反覆講，又講女乘客講買咖啡嘅司機講唔知醒遲出門嘅男人講失戀嘅店舖員工講甩咗鞋帶嘅女主朋友......多過頭啦！而且男主角唔可能知道咁多嘢！ 唔知點解呢part令我諗起《打錯了》嘅故事，但個故事就只集中係有冇多果一通打錯嘅電話，就已經可能影響意外會唔會發生，已經帶到相同嘅命題，根本唔駛好似電影咁複雜嘅處理。 - 睇完套電影，我最記得嘅兩句話係「 將來是說不準的」同「 有重新再來的勇氣 」。