雖然呢套一般評價差過《臨時劫案》， 但我個人鐘意《臨時決鬥》太多太多。 我好理解果種一時衝動做錯決定，但為咗啖氣，或者甚至唔知為咩，但揀咗就要堅持完成埋佢嘅感覺。有時唔係為咗輸同贏，都想為咗俾個交代自己。 古天樂呢個師父嘅對白唔少都同佢投資嘅作品有關，好似《明日戰記》、《九龍城寨之圍城》、《臨時劫案》，如果有睇過先會知道。 無可否認，大師兄張文傑有啲對白都講得好啱，現代有幾多人打拳真係為咗打拳，更多係為咗溝仔同減肥。 戲裡面係伍允龍嘅泰國師叔客串，同古天樂呢個師兄嘅互動最有喜感。 最鍾意係梁詠琪呢一個師娘角色，見到佢由有機會，到失去機會，再到接受現實嘅過程，係好現實嘅人生階段，接受現實係咪就係唔好，其實唔係，如果想繼續行到落去，一定要接受依家嘅自己，先仲可能有其他選擇，與其話係向現實屈服，不如承認自己，然後放開心態，順其自然。