重post紀錄 ================== 🎥睇戲«大師兄» 。純粹個人感受 臨開工捱世界前，又享受用學生價睇多次戲先，可能係因為我抱住睇套戲點講香港教育議題，同埋甄子丹點演非常教師(陳俠)而入場，所以覺得幾失望，有種樣樣都掂但樣樣都唔真係講嘅感覺。如果係想睇打鬥場面，都係滿足到嘅，特別 係更衣室果場，但我覺得浪費左5個問題學生嘅設定。每個學生嘅設定都有特色，係反映到香港人睇表面就容易覺得係壞/差學生嘅類型，有南亞裔，男人婆，專注力不足，打機上癮，吸煙問題少年咁樣，但陳sir係前期幫學生同家人化解十幾年嘅矛盾化解得勁快，老師同學生相處嘅場面好少，其實感受唔到佢地關係嘅轉變，就係由0直接跳到5，冇晒1234嘅感覺，可能同電影時間較短有關，所以覺得劇情完善度不足，好多都係怱怱忙忙交待。後期講番陳sir點解番母校教，可以濃縮啲，當兵流浪可以言語交待，冇必要瞬間看地球，想睇多啲真係描述學校事情的情節。係我嘅角度，5個學生之中，專注力不足哥哥嘅問題係冇解決過，應該話冇對症下藥，如果可以借呢個機會俾人了解AD會更有意義。後面汲及拳館嘅情節犯駁位唔少，但拳館頭目嘅真身份係有驚喜，呢個安排冇諗到。唔知有冇人係因為陳喬恩入場睇戲，不過佢嘅角色佔位好少，但有女老師協調畫面係唔錯嘅，同陳sir有啲互動係開心嘅，只係如果呢個角色由香港女演員做就更好啦 !好難得近年電影係全場演員近乎都用番香港演員，雖然陳喬恩係靚女，但希望係一個香港女演員講要努力考好DSE。最後的最後，好鐘意Ben Sir嘅客串，算係神來之筆，然後林嘉華演校長真係入型入格，但校長唔應該咁易講永遠退出教育界呢類說話😅話說胡楓爺爺未出場，我就有估過要演少年陳sir嘅老師係米佢，結果真係啊😂🤔BTW，如果想睇套搞笑但都算講到教育議題嘅電影睇下，我幾鐘意«辣椒教室»（特登維基番個名），我剩係記得係Mark雷演音樂教師然後有師生戀，陳法蓉演英文教師兼訓導主任果套😂呢套戲都係以中學為背景，但某方面係掂得深啲，學生自殺，同性戀，單親家庭都有掂，但我覺得難得嘅係四個老師對教育嘅取態表現出黎係有唔同，教師同學生嘅人物刻劃都係好啲，最後果齣改編音樂劇都幾好睇（好多年後先發現自己記錯左男主角一直以為係林子祥）。 整體感覺:🌕🌕🌖🌑🌑（個人主觀感受）