將第一個record送畀Last Mile🧡 UNNATURAL係top 1日劇 伊吹藍係top 1日劇角色 編劇嘅世界終於延伸到劇場版 有咩理由唔支持！！？ 可以當係UNNATURAL同MIU404嘅兩小時劇場版SP 法醫組同機搜組都友情客串Daily Fast網購公司 雖然一早知道佢哋戲份唔多 但冇諗過真係得咁少🥲 不過對於由頭到尾都期待緊ibuki大狗狗出場嘅我嚟講 見到戴住藍色眼鏡嘅佢喺大銀幕出現已經好滿足🥹🥹🥹🥹 聽到熟悉嘅signature配樂響起就知道邊啲角色要出場 呢種熟悉嘅感覺莫名地感動 爆破場面比想像中多同強勁 果然係全面引爆💥 群演非常多 可見製作團隊對票房信心之大😂 依舊係喺事件當中反思社會議題嘅作風 雖然對劇情嘅喜愛比不上UNNATURAL同MIU 但因為伊吹藍所以加多一分🌟 🧡8/10🧡

病+放假就係喺屋企睇戲嘅好日子 又係一套想睇但未睇終於睇咗嘅戲😂 本身覺得四隻鬼嘅故事都太薄弱 同男主嘅bonding亦唔見得有因為完成心願而加強咗好多 反而女主同佢阿哥條線仲講得多啲 但到最後10分鐘真係大爆發 可能只係我太naive睇唔穿套路 真係！大爆發！！我啲眼淚都係！！！ 。 。 我覺得可以再寫得好啲 🩶7/10🩶

老竇睇我又睇埋一份 好有趣嘅世界觀 最中意噴嚏一號 Fukase果然好適合做神經質嘅反派角色 但劇情而言我係麻麻的😐 用呢種方式寫細胞可能係中二病嘅極致 ❤️ 6/10

好睇嘅紀錄片！ 印象中好似已經睇過一套講自大傲慢科學家整潛水艇最後出意外嘅docu 唔知係咪都係Oceangate 反正故事覺得似曾相識 就如同片尾嘅前工程師所講 釀成意外嘅主因唔係任何技術上嘅問題 而係有毒嘅企業文化 💙 8/10

朝早睇完內爆嘅潛水艇 夜晚睇埋停電嘅郵輪 發電機房火災導致全艘郵輪停電 以為失去動力變漂浮號已經夠慘 點知最大鑊係冇得沖廁 本身係買得起郵輪票嘅有錢人 突然間個個變成只顧自己生存利益嘅荒島居民 其實係災難 但導演呈現嘅方式好富娛樂性 輕鬆甚至帶點搞笑嘅docu 🩵 7/10

第一次睇戀綜 因為對戀綜冇興趣 所以從來都冇睇過 但呢套實在見到太多話好好笑嘅comment 所以我係抱住「即管睇下有幾好笑」嘅心態去開嚟睇 冇前作可以比較所以以下評價不中肯 幾清新呢 以戀綜嚟講 都可能因為班母胎單身參加者根本玩唔到咩套路、劇本、設計😂 但我睇到中後期就不斷諗 其實只係識咗四五日 相處得嗰一陣 真係會咁中意咁愛咩🥴🥴🥴🥴 仲要佢哋都係0戀愛經驗 真係可以咁快就墮入情網？😧😧😧 咁嗰啲暗戀幾個月甚至幾年嘅人算係咩😂 呢套又名載尹育成記 完全係見證到載尹喺人際相處方面嘅成長 有一集佢熄燈瞓喺床度喊 畫面好暗但收到嗰啲抽泣聲 太熟悉 因為自己都經常係咁 有同感到我都跟住一齊喊 唯一一個睇到喊嘅moment 最後一集有一句說話好深刻 應該係班導師講嘅： 搵唔到愛情唔緊要 最緊要係搵到自己 附上徐仁國嘅貼切動作表情 （本身係片但呢度post唔到） 🩷 7/10

呢幾日有好多留喺屋企嘅時間 咁啱屋企又終於訂閱咗N記 於是就花咗好多時間睇片 之前threads不斷見到有人討論柯南 從來冇睇過任何柯南作品嘅我（包括漫畫動畫電影）有少少被燒到 其實係某程度上覺得一套都冇睇過嘅自己有少少過份😂 見到貝克街的亡靈係最多人排第一位嘅劇場版 所以就揀呢套嚟睇 其實唔差 但我就係唔太中意 可能係太高期望？網友話係最好睇嘅柯南wo 但冇好震撼到我 冇驚艷嘅感覺 可能因為我expect柯南有多啲偵探查案嘅元素 但貝克街亡靈呢套並沒有太多 世界觀設定 想傳遞嘅message 立意呢啲係好嘅 但唔係我預期見到嘅柯南 因為第一套就少失望 所以冇咩動力再開另一套 💙 7/10

喺threads見到有人話呢套經典終於上咗N記 聽過佢嘅名但冇睇過 好多時間嘅我今日終於睇咗了 事前冇查過劇情大綱 所以好surprise 居然係用poetry包裝呢個主題 好睇 喜歡 但我覺得我睇唔明 尤其係裡面嘅對白同詩句全部都好快咁讀出 我都未消化完 又有新嘅劇情發展😂 必須重睇起碼多一次 關於勇敢活出自己嘅人生 關於服從 關於反叛 關於詩歌 關於文學 關於藝術 關於 carpe diem 🤍 9.2/10

第三次睇了 應該係我宮崎駿以外睇得最多次嘅電影 入戲院兩次 viu重播再睇 時隔三年 原來好多細節都仲記得好清楚 譬如食串燒 Candy問「其實做人有咩意義」 譬如喺太空人煙灰缸摷煙頭 睇戲聽返嗰把死人聲normal temperature真係恍如隔世😂 睇咗三次都係一樣咁中意 冇話講好多大道理 人生哲學 冇話好煽情 劇情好引人入勝 但就係好貼近現實 令人好相信呢個係一個好真嘅故仔 暖得嚟有啲痛 好中意好中意 作為一粒微塵 一不小心就會跌入懷疑塵生嘅陷阱 到底活著有咩意義 其實我咁渺小 咁努力為乜 嗯 冇錯啊 上天睇唔到微小嘅我哋 但同樣渺小嘅我哋可以睇到彼此 扣0.2分 因為覺得結局可以再好啲 🧡 9.8/19

一個曾經風靡全美嘅減肥真人騷 The Biggest Loser 減磅最多嘅人可以贏走25萬美金 主要靠極端嘅運動強度去減肥 從來冇做過運動、體重三百磅嘅人突然每日被迫做12個鐘高強度運動 維持幾個星期至幾個月 大部分參加者都的確可以以更輕的磅數離開節目 但問題係 呢種方式真係對身體健康？ 而且更重要嘅係 之後呢？ 有一個受訪醫生講咗句還印象深刻嘅說話 佢希望有朝一日呢個世界可以將肥胖同其他疾病一樣平等地看待 肥就只係一種病 唔好下意識地覺得肥人就係有問題、唔自律、懶、一定係自己攞嚟衰 what a toxic world we are living in 🧡 8.4/10

改編自2025年暫時睇過最愛嘅小說《在熙，燒酒，我，還有冰箱裡的藍莓與菸》 冇expect過呢本書可以拍成影視作品 點知影同視都有 而且見到電視劇評價都很不錯 冇理由唔開嚟睇 抱住「冇可能跟足原作拍出嚟掛」同「就即管睇下你有幾忠於原著」嘅心態去睇 因為知道編劇就係作者本人所以更加好奇佢會點取捨 小說嘅四個故事完全保留 當然情節有改動 但劇情走向大致一樣 可能係太愛原著小說 可能係期望太高 有少少失望 但驚喜更多 男主喺小說嘅人設實在太爛 真係爛人一個 絕對冇辦法喺電視劇100%呈現出嚟 我絕對明白 但實在變得太正常了吧😂😂完全係個純情忠心boy 在熙仲誇張 完全唔係小說裡面嘅在熙 男主阿媽同第二個故事嘅男朋友「哥」都冇咁令人窒息 奎浩依然係可愛嘅角色 簡單總括就係：電視劇將小說裡面各個角色嘅不討喜稜角都磨平咗少少 畢竟電視劇同小說嘅受眾唔同 所以呢個改動係在所難免而且可以理解嘅 況且編劇係作者 佢approve嘅劇情 讀者當然都approve 只不過係因為小說嘅衝擊實在太大 電視劇頂盡只有小說嘅六成功力 見到有人話呢套係人生神劇 ummm 我真係覺得未至於 但小說有權係 驚喜在於 我冇諗過尺度可以咁大 唔係鏡頭嘅尺度 而係將同性戀嘅愛情如此寫實又深刻咁透過電視劇同Netflix呢個媒介刻劃嘅尺度 原來韓劇已經發展到呢個地步 原來韓國嘅觀眾同呢個世界已經發展到呢個地步 樂見 十分樂見 很好很好 不過基於呢個電視劇改編 我未準備好睇貌似改編得更誇張嘅電影版 拖多下先 ❤️ 8.4/10

承上 為咗驗證到底係滅亡呢個角色抑或係徐仁國呢位演員有迷倒人嘅魅力 睇咗另一套佢主演嘅電視劇 睇完第一集就已經有呢種感覺： 呢個人完全係大癲佬嚟！！！！ 點解可以演繹到完全唔同嘅角色 而且都勁有說服力 之後見到fans形容佢為「劇拋臉」 即係每套劇都有唔同嘅面貌 演咩似咩 實在太厲害了 講返套劇 比想像中更好睇呢！ 係非常搞笑地認真嘅type 可能係我睇過最好笑嘅韓劇 當中徐仁國飾演嘅南僩儁道士大概佔咗80%？😂😂 上一套滅亡我不斷backward欣賞佢啲表情 今次呢套美男堂就係不斷被佢嘅表情攻擊 然後爆笑 連戴cap帽都要反一反白眼 實在太用心設計呢啲增加角色生命力嘅搞笑深刻貼切小細節 唔怪得之前見到有人推薦睇呢套亂用臉嘅劇 雖然搞笑 但其實劇嘅案件都唔輕鬆 觸及好多韓國財團官商勾結嘅情節 不過因為搞笑嘅部分實在太出色 就算導演編劇想認真啲討論大議題 觀眾如我都係會focus喺搞笑嘅部分 唯一唯一吐槽位：主角愛情線！！ 見到有頗多comment唔中意刑警女主 其實我還好 但呢對CP真係。。冇CP感呢 我更享受睇美男堂四人組嘅chemistry 我喺頭四集已經估到final boss係邊個 都幾犀利😎😂 OK回歸一開頭嘅疑問 正答：係滅亡～ 唔係話徐仁國本人冇魅力 但滅亡套劇散發出嚟嗰種魅力真係無人能敵 當然呢個係對演員最最最高度嘅稱讚同認同 而且呢排睇咗好多佢嘅YouTube片 絕對係我見過最real嘅韓國藝人😂😂😂 美男堂saiko 南道士saiko 🧡 8/10

大F人睇到淚流滿臉嘅紀錄片😭😭😭😭😭😭😭 睇過comment話好睇 但冇expect過係呢種程度嘅好睇 冇咩睇醫療docu嘅經驗 但呢套絕對稱得上係血腥 拍攝團隊完全冇打算迴避嗰啲爛肉斷骨爆缸血淋淋場面 如實地拍 色調都冇改 就係血紅一片 收音甚至聽到手術期間內臟被攪動嘅聲音 所以怕嘅人睇之前真係需要三思 但無論如何我都極力推薦所有人去睇呢套紀錄片 幾個主要反思位 ❤️‍🩹意外其實係可以發生喺自己身上 睇呢套嘅心驚膽顫來自感同身受 完全想像到「嘩其實發生喺佢身上嘅嘢絕對有可能發生喺我身上」 冇人預料到放工返屋企會俾車撞 冇人預料到玩機動遊戲會遇上故障 唔係時運低 唔係人品差 唔係冇積陰德 發生咗就係發生咗 一個意外就可以對當事人及其身邊嘅人往後嘅人生產生巨大嘅變化 每個受訪者都話發生意外後會更加珍惜生命 覺得每活多一日都係賺咗 慧重新思考到底自己想點樣過餘下嘅人生 唔需要親身經歷呢啲意外 睇電視就已經可以達到同樣效果 會拷問自己：萬一咁咁咁 你會想點點點 ❤️‍🩹醫護人員嘅偉大 人人都話醫護人員偉大 醫護工作好神聖 但呢套紀錄片係勁寫實咁反映出有如此偉大 如此神聖 佢哋係真心值得自豪自大 自吹自擂話拯救咗世界都不為過 因為救返一個人條命 就係拯救咗好多個人嘅全世界 實在太厲害 但呢套紀錄片做得好好嘅係 講咗好多單意外 涉及好多個受害者同家庭 由無數個醫生護士救護員處理治療 但每一單都輕描淡寫 唔會過分煽情 唔會特別highlight 救人係醫生嘅日常工作 每個病人都好特別好重要 但每個病人都一樣特別一樣重要 每時每刻都有人送入醫院需要搶救 唔刻意著重某個意外某個病人某個醫生某個故事 就好似講緊命運/世界/神對每一個人都係公平嘅 ❤️‍🩹人果然係血肉之軀 只不過係血肉之軀 因為係創傷中心 所以幾乎每個case都要做外科手術 又因為畫面非常寫實嘅關係 有好多好多開刀scene 可能外科醫生已經做到慣 但對layman如我而言 真係好震撼 用刀切開 其實每個人都不外乎係一舊被皮膚包住嘅肉 由肌肉同骨骼撐住 就係咁 僅僅如此 所以真係好兒戲 但又堅韌喎 不得不佩服人體結構 其實每一集每一個醫生醫護人員都起碼會講一句好touching好inspiring好insightful嘅說話 但我冇即時jot低所以不能盡錄 亦唔可以原句覆述 💬 有醫生形容每一個case都係一場team sport 但分別係 佢哋每次都贏 💬 有醫生話佢哋接觸嘅每個病人都係處於佢哋人生最最低谷、最最軟弱嘅時期 莫名地好touch到我 的確每次見醫生都係處於一個好脆弱嘅狀態 生理上and心理上 怕自己唔知有咩事 會唔會有後遺症 以後會點 所以好感激醫生嘅用心 💬 有醫生話其實治療病人嘅最終目標 其實係令佢哋儘量返返去入嚟之前嘅狀態 所以手術同fix各種器官骨折嘅受傷唔係唯一focus 點樣幫佢哋接受受傷後嘅自己以及往後嘅人生都係好重要嘅一環 自己唔係話受過啲咩好嚴重嘅傷 但都叫做入過幾次院 做過手術 深深體會到醫護團隊悉心照顧嘅重要性 微小到幫你量血壓、送飯嘅姐姐用咩稱呼叫你都已經可以好影響困喺醫院嘅你嘅心情 唔好話佢哋都係打工 都有出糧 冇嘢係必然 坐office嘅打工仔可以hea嘅時候 喺醫院返工嘅人都可以 所以don’t take it for granted 包括看似平凡嘅日常 一個意外就可以將你嘅人生打翻 真係真係真係好推薦 會有好多反思 如果你同我一樣係大F人就甚至會喺病人手術後甦醒張開眼之際比佢父母更快落淚💦 又一個求你看系列 🤍 10/10

以「青少年行為糾正」為名 綁架、虐打、禁錮一班未成年細路 家長以為係正當教育機構 相信送仔女入去呢啲另類boarding school可以令佢哋迷途知返改過自新 結果只係斷送子女嘅大好青春 將親子關係拱手相讓 每年用高過哈佛大學嘅學費推自己嘅仔女入地獄 最可悲嘅係 呢一切都係「以愛之名」 不敢相信呢啲咁荒謬嘅事到今時今日都仲發生緊 而且係喺以自由見稱嘅美國 咁多受害者 維持咁多年 最高話事人居然可以完全免責 呃返嚟嘅前用嚟起豪宅莊園 環遊世界 真係真係好荒謬 法律法治係咪垃圾？點解對住呢班人可以完全無效？ 真係難以置信到以為睇緊電視劇 可惜呢套紀錄片係以一個個破碎嘅心靈、家庭同性命換取返嚟 全部有血有汗 係血淋淋嘅事實 最最深刻就係荒廢校舍牆上嘅塗鴉 全個腦都係：好荒謬好荒謬 🩶 8/10

一個超級討厭鄰居細路嘅白人單身大嬸 只要班細路影響到佢就會報警 睇嘅時候一路諗到底trigger悲劇發生嘅係咩 結果其實係冇 根本呢個大嬸就係不定時炸彈 睇到最後 又係同種族有關 仲有條同房產物業相關嘅法例 不過我唔係美國人所以唔認識 最後成功呃到我眼淚 🖤 7.2/10

出名到冇可能冇聽過Back to the Future嘅大名 但一直都冇打算開嚟睇 最終係因為朋朋推薦所以先開🤣 啱啱見到原來仲有續集 不只一套 一直都唔知原來係喜劇嚟 聽個名以為係講人類未來嗰啲科幻片 雖然最後有少少扭橋同少少夾硬 但完全做到喜劇嘅目的 Calvin Klein真係搞不掂😂😂😂😂😂😂 刻在底褲的名字（誤） 🩶 7.6/10

之前已經想睇 見到電影中心有王劍凡做映後分享 即衝 睇完好慶幸自己睇有佢做映後分享嘅場次 如果唔係我應該畀得1分佢😂😂😂 因為我係 完 全 睇 唔 明 譯名已經好有趣 日文旅と日々 直譯係旅與日子 中文譯旅行的意義 英文譯Two Seasons, Two Strangers 英文名完全唔get 中文譯名就係意譯咗日文旅行與日子 故事可以話係無聊嘅程度 所以就唔多講 反而想分享劍凡分享嘅嘢 旅行同日常好多時都畀人一種二元對立嘅印象 甚至有好多人之所以去旅行就係為咗「逃離日常」 去個旅行 重整生活 但其實旅行同日常未必一定咁分割 旅行嘅mobility 日常生活都可以感受到 日常生活嘅rootiness 旅行都可以體驗到 或者最理想嘅境界就係可以用旅行嘅心態感受日常 所以比起旅行的意義 告訴更加感受到日常的意義 有一句好深刻但唔係好關事嘅說話： 「其實你覺得好warm嘅呢種感受 重點唔係人哋給予幾多 而係你接收幾多」 人哋給予100但你接收60 同人哋給予80但你接收75 其實係好大分別 雖然都係唔get 不過劍凡嘅分享真係令我明多咗少少少少🤏🏻 🤍 6/10

趁Netflix 31/12下架前拿拿臨重溫一次 二刷再度感嘆 啊 德魯納真是個好東西 唔可以exact講到係我心目中top幾嘅韓劇 但肯定係最top 佢出色在所有線都好完整好完滿 各位主角配角嘅感情線 每隻鬼嘅故事 全部都寫得好好 煽情但唔過火 帶到啲message出嚟又唔覺得over 今次睇 發現「슬픈」悲傷呢個字嘅出現頻率實在有點高 不論係對白定ost歌詞都不斷不斷出現 呢套劇由一開始就註定會係悲劇 不論係前世嘅恨定今刻嘅愛 都冇辦法可以逃過悲傷嘅結局 滿月同燦星 好登對又好美麗嘅名字 但從來滿月同燦星都唔可以同時間出現 月亮咁光亮就唔會睇到星星 要睇到星星就要月亮走埋一邊 所以呢兩個名真係改得好好💦💦 必須等待一千三百年先可以重遇嘅緣分 希望下一次相遇唔需要相隔咁長時間 💜 9.6/10

差啲唔記得記錄呢套！！ 出第三季嘅時候先終於開久仰大名嘅第一季嚟睇 咁啱碰上自己決心要做運動努力復健嘅時候 所以佢成為我居家運動嘅必備良藥 睇一班人做堆辛苦嘅嘢陪自己一齊辛苦 就好似冇咁辛苦 第一季張恩實嗰team黑馬真係好正 選五強嗰個神話concept 挑戰又係好正 我覺得神話concept係三季最佳challenge

緊接第一季睇嘅第二季😂 阿莫帝真係由一開頭就睇好嘅選手 腳腕骨斷過都可以練到呢種體能 真係strong到不得了 令我覺得其實少少傷真係冇咩事 睇下佢 有咩做唔到

見到有人推薦所以睇嘅美劇 一集大概一個鐘 total得8集 係可以輕鬆笑住追嘅懸疑查案題材作品 首先setting係白宮已經好有趣 我對白宮嘅認知係0 所以套劇點塑造白宮我就點相信😂 喺一場為澳洲首相&外交官舉辦嘅國宴上 白宮總管家發現陳屍喺樓上嘅遊戲室 迅速請來聽聞係the best detective嘅主角Detective Cupp 然後當晚在場嘅所有人 包括全部staff同賓客 包括美國總統同澳洲首相 都要留喺白宮直到宣佈解封為止 事件就圍繞住Cupp如何喺幾乎0科學蒐證嘅情況下 純粹靠推理同提問搵出兇手同犯案過程 前排先睇到一個講法係 現代嘅推理故事都好無聊 因為科學太厲害 所有嘢都講證據、指紋、血跡、DNA 可以畀偵探發揮嘅空間根本少之又少 所以要寫出優秀精彩嘅推理作品 必須去與世隔絕嘅荒島 而呢套劇正正就係精彩在唔知點解好似冇科學偵查參與嘅部分😂 除咗非常初步嘅死因推測之外 乜都冇 指紋血跡乜都冇查 可以話唔make sense但都因為咁 呢個故事先成立 先展現到主角嘅魅力 主角係個觀鳥愛好者 成日無啦啦都講雀仔 但又都好神奇地係同案件有關 佩服編劇導演團隊嘅腦洞 係幾耳目一新嘅作品 用一個字形容呢單案就係chaotic 用兩個字形容就係鬧劇😂😂😂 🤍 8.4/10

因為網友推薦而開嘅綜藝 我係會睇曬所有前導trailer先開第一集嘅人 老實講 佢嘅trailer非常不吸引😂😂😂起碼對我而言好唔吸引 完全唔知個節目係做乜 只係feel到用剪輯營造出嚟嘅勾心鬥角同神秘氣氛 簡單嚟講就係不知所云 唔係網友推薦我真係絕對唔會開😂😂 但之所以要喺review特別提呢點就係想同其他potential會被失敗trailer嚇怕嘅人講： 呢套係值得投資嘅綜藝💥 12個來自不同領域嘅玩家被困喺同一個空間相處七日 每日玩1-2個淘汰遊戲 要盡力為自己爭取多啲生存籌碼之餘 又要增加贏家獎金 所以簡單嚟講就係一個智力遊戲生存賽 好佩服製作團隊度到啲咁複雜嘅遊戲出嚟 不敢想像幕後用咗幾多時間dem game debug 尤其後期嘅遊戲其實係會受剩餘生存玩家數量而有影響 佩服佩服 game設計得好只係背景 節目好睇在於參加者 好多都有好鮮明嘅character 而且唔係劇本寫到嘅嗰種real 尤其係有好明顯嘅兩派人： 社會福利主義拯救弱者黨 VS 必要時結盟但基本上靠個人力量黨 呢兩group人數極度不均、但能力又不相伯仲嘅人 喺不同遊戲不同settings下嘅衝突碰撞同合作 先係呢個節目最好睇嘅地方 不劇透 但有啲玩家真係好charm 最後一集播credit時展示啲幕後硬照 不排除攝影師係SEVENTEEN fans 好多勝寛😂😂😂 睇完第二季trailer 同樣毫不吸引😂😂但我都會照開 💙 8/10

第一次喺度講YouTube片 可見我真係覺得佢好值得記錄同分享 從來都唔係試當真嘅fans 連觀眾都唔係 只係睇過口試王同墨魚遊戲 對許賢嘅認識就僅限於認識 因為睇過《公開試當真》所以對佢認識又多少少 其餘一概唔清楚 一連三集嘅《21K咋嘛》記錄咗許賢人生第一次跑半馬 比賽前六星期先開始練跑到比賽當日嘅過程 唔係因為對呢個人感興趣而開嚟睇 而係因為我仲喺強風吹拂x極速100米嘅跑步熱潮當中走不出來 見到有長跑topic就自然想睇 點知比想像中好睇太多 因為覺得自己人生好多方面都好𠽤、想有啲突破有啲挑戰 所以幫自己報咗半馬 而知道正式比賽前六星期都從來冇練跑 喺咁嘅前提下join running club、跟教練跟pacer上課表練習 去到跑完21K摸終點線 一路上好多思考 許賢用鏡頭將自己嘅訓練同思考分享畀觀眾 觀眾就可以好似陪同許賢一齊經歷以上種種 好中意許賢（喺呢幾條片）嘅地方係 佢可以好自然、好淡淡然咁講啲好有哲理嘅說話 有insight得嚟唔造作唔刻意 冇說教feel、唔似度咗好耐背稿讀出嚟 真係由心而發當刻諗到咩就講咩 好似言之無物但又幾有意思嘅說話 真係唔係人人做到 就係呢啲好似廢噏但又幾好聽嘅說話令呢幾條片咁好睇 跑步到人生 如何面對自己面對他人 面對瓶頸面對難關 唔識概括咩中心思想 建議自己去睇

從來都冇睇賀歲片嘅習慣 亦從未試過初一同屋企人去戲院睇戲 今年老竇突然興起話要做下啲家庭活動 所以就開咗齋😂😂 有啲戲有啲劇本係可以令你無視佢嘅沙石 唔係話完美 但就係夠好 金多寶就係呢種戲呢種劇本 係我心目中賀歲片應有嘅溫度同立意 屋企人就係咁 笑下喊下 呃下𠱁下 鬧下攬下 💛 8.5/10

因為好似聽過呢套嘢好耐 所以以為係幾年前嘅韓劇 點知原來只係2025年！！ 對我嚟講算係好新好新嘅作品😂 因為最近非常into做運動呢件事 所以就諗起呢套 咁啱viu播 所以就有得免費睇 非常好送飯嘅輕鬆作品 算係典型嘅搞笑浪漫韓劇 男主角係健身狂熱份子 所以所有理應浪漫嘅場景都變得好好笑 女主角因為被前男友狠狠打擊而心靈受重創 陰差陽錯去咗地下俱樂部尋歡 點知原來係24小時健身俱樂部 男主角係健身室嘅館長 承諾用三個月時間幫女主改變人生（sell 健身package） 故事就係咁展開 講女主男主嘅故事 仲有健身室其他會員、教練、女主妹妹、男主個ex嘅故事 親情友情愛情情侶夫妻親子關係咩都cover曬 都係典型嘅搞笑得嚟又有啲warm嘅故仔 有啲莫名其妙嘅係女主戀愛腦妹妹同佢男朋友條線 我始終唔get除咗搞笑之外有咩作用 結局有少少少少倉促 個人覺得唔需要喺最後兩集先搞咁多大龍鳳然後好似收唔到尾咁 但大致上都係幾完整嘅作品 特別中意女主那個角色嘅塑造 性格經歷設計得好 演技都好 用健身做題材係幾新鮮 有鼓勵到我 男主係個好神奇嘅存在 劇裡面愈睇愈順眼愈睇愈靚仔 但睇佢自己IG嘅相又完全冇feel😂😂😂 💚 7.6/10

因為朋朋推薦而開嘅劇 都算睇過不少法庭律師作品 公益律師作為題材真係第一次 少少新奇但其實都係幫弱勢嘅典型法庭劇情節 一路睇 其中一個好強烈且反覆出現嘅感受就係 韓國真係好中意拍呢類型嘅題材： 大財團x官員黑箱作業隻手遮天 有一排好迷一個分析韓國真實罪案嘅YouTube channel 所以對於真實世界嘅韓國財團略有了解 就真係咁無法無天 勢力大到法紀都完全唔係佢對手 然而呢個國家嘅影視作品仍然一而再再而三咁講呢啲題材 所以反映到韓國人其實係都幾care呢件事 題材cover虐狗、身障人士、藝人、私生飯、移民 幾impressed佢揀咗呢幾個issue去講 唔算係法庭劇大路嘅topic 可以透過電視劇令更多人認識 呢點非常欣賞 最最印象深刻都係一個十幾歲有先天肢體殘障嘅輪椅小朋友同律師講： 我想告老天爺 明明我都冇話想出世 你憑咩逼我出世仲要搞到我由出世到而家都過得咁慘？ 呢單官司去到最後嘅爭議點係 若然要判罪成 就必須承認呢個細路嘅人生由頭到尾都毫無價值可言 佢嘅出生就係一個錯誤 好多值得反思嘅位 另一個逼出眼淚嘅故事就係藝人炎上事件 起初係一段藝人掌摑fans嘅片流出 經紀公司想息事寧人 後來演變成有關藝人係咪一件商品、藝人嘅生活被放到公眾面前放大審視係咪合理、所謂嘅公眾知情權適唔適用、以及親人間嘅金錢偷襲糾紛係咪有罪 裡面輕輕提到因為無法承受輿論壓力而選擇離開世界嘅諸位星星 我第一次喺韓國嘅影視作品見到佢哋address呢個問題 諗起一套非常非常喜歡嘅webtoon《還有明天》（都有拍成韓劇但我未睇）都有一個故事係講類似嘅題材 然後無可避免地諗起我認識嘅星星 睇嘅時候多次pause低去抄有意思嘅台詞 說到底睇法庭劇都係為咗爽 唔會有壞人得逞嘅結局 因為若然要睇呢啲結局 睇新聞就足夠了 所以睇完後心情係矛盾嘅 一方面覺得佢燃點起一絲絲🤏🏻對呢個世界嘅希望 覺得好似仲有得救 起碼韓國人自己都會用呢啲事件去拍劇 但另一方面好清楚知道 世界依然好崩壞 《公益律師》嘅製作班底有《惡魔法官》嘅編劇 當年睇《惡魔法官》正正係我對「正義」呢個詞非常著迷嘅時候 事隔幾年 韓國又交出一套令觀眾思考何謂正義、法律意義何在嘅作品 然而 「正義」喺我心目中已經唔再係咁bling bling嘅字了 劇情上最唔吸引我反而係最後嘅高潮同結局😂 少少沙石啦 主角團有啲角色覺得好似冇咩發揮 但整體而言都係好完整嘅作品 全員演技在線 引用朋朋精準嘅comment： 睇佢哋用魔法打敗魔法真係好爽 🖤 8.6/10

被Netflix演算法推過好多次嘅電影 終於開咗嚟睇 umm中規中矩啦 故事設定喺英國一間香港人定義嚟講極度奢華嘅老人院 有超多閒暇活動可以自由join 有四個老人家自己組咗個興趣小組 逢星期四集合去破n年前嘅懸案 名叫Thursday Murder Club 點知有一日喺呢班老人家身邊發生咗一宗命案 同一時間老人院面臨拆卸嘅危機 故事就係咁展開 開頭以為只係一單謀殺案但原來不只一單 第一次睇咁多老人家嘅戲 都幾震撼😂😂 但除此之外都係中規中矩嘅破案電影 🩵 7/10

久違地睇N記嘅docu 開頭只係冇個吸引到我就是但揀一個 但呢套愈睇愈好睇 短短六集 但討論咗六大種毒品 cover咗好多個持分者同角度 吸毒者 販毒者 製毒者 醫生 研究人員 農夫 議員 軍人 武裝分子 生意人 黑社會 美國人 巴西人 肯亞人 緬甸人 墨西哥人 泰國人 唔係每集都講曬咁多持份者 但六集加加埋埋就可以令觀眾對整個毒品食物鏈有初步嘅了解 黑社會同跨國販毒集團點樣控制曬整條生產+銷售鏈 穿洋過海嘅走私路線 另類嘅farm to table（？？？？ 點解販毒咁好賺 最有意思嘅位係 佢每集都會有幾個製作團隊問自己嘅問題 係推動佢哋深入研究毒品議題嘅問題 同時叩問觀眾嘅內心 例如我哋好容易就直覺認為販毒嘅人冇道德 透過傷害他人而賺錢 但當你賣一包粉所賺到嘅錢等同你做生做死一日打三份工嘅糧 你會發現販毒嘅人都只係make緊無比rational嘅經濟選擇 咁係咪仲可以咁理直氣壯譴責佢哋？ 又例如緬甸近年好積極咁發展民主運動 想推翻腐敗嘅政權 實現民族自主 但若然呢個咁高尚嘅運動嘅背後 係武裝分子同販毒集團透過傷害無數生靈得來嘅金錢support 咁呢場運動仲算唔算高尚？ 好多反思 但反思都要有一定嘅認識先 推薦推薦 睇完覺得呢個地球呢個物種真係冇得救系列 🖤 8.4/10

心情沒有很好的晚上 記錄一下呢套神劇 第一次聽佢個大名係Year 2上大學通識哲學course 當時嘅professor推薦我哋去睇 然後我去咗睇wiki 嗯 幾有趣 完 到後來Year 4屋企有N記 發現N記有佢 又配合天時地利人和就開咗 好睇到impressive到完全係唔識評價嘅程度 從來冇睇過美國sitcom 原來可以高質到呢個程度？？？ 但礙於太好睇 實在太好睇 唔捨得睇完 又撞正final year嘅最後一次final 所以一直唔開final season嚟睇 兩年後 又配合天時地利人和 終於肯繼續TGP嘅journey 不得了 真係不得了 冇辦法唔用神劇嚟稱呼佢 決定用生命推薦 但佢最神嘅地方在於 我幾乎冇嘢可以介紹 因為每講多一滴資訊都會減少好多觀看樂趣 所以以下係我僅餘可以提供嘅簡介： 四個國籍職業性格各異嘅陌生人發現自己死咗 嚟到「良善之地」（The Good Place） 顧名思義 生前係好人先可以嚟 喺呢個天堂一般嘅地方度過無限長嘅時間到底會發生咩事呢？ That’s it 不能再說更多了 但求你去看 真係真係好好睇😭😭😭😭😭 又有得笑又有得思考嘅sitcom What more can you ask for!? 💚 20/10

之前有被聳動嘅中文譯名《三人要守密，二人得死去》吸引去睇trailer 但trailer實在太莫名其妙： 一個脾氣暴躁嘅疑似男主角問一個目無表情冷靜切菜嘅疑似女主角 你部手機喺邊？ 因為太莫名其妙所以冇開嚟睇 最近喺threads不斷見到有人話佢好好睇同好難睇 評價之兩極終於驅使我give it a try 第一集係正常開展嘅婚外情出軌劇情 起碼所有嘢都make sense 之後就逐步走歪 我唔會話佢唔make sense到不能接受 但啲plot twist集中曬喺最後半集嘅後果就係其餘集數都只有故弄玄虛嘅煩躁感 「到底你想講乜？」 好彩佢只係得6集 冇一個角色係討好嘅 可能係成功嘅角色塑造？但都真係幾唔討好😂 總之就一言難盡 不至於超級難睇 但絕對絕對絕對唔deserve threads上嘅吹捧好評 🩶 6.4/10

最近喺threads見到不少影視作品推薦 一一cap低慢慢睇 呢套係其中一套 非常有based on小說嘅romcom feel 但成功🌟 熱愛旅遊、喜歡即興、冇腳嘅雀仔女主 vs 零旅遊經驗、喜歡計劃、渴求安穩嘅男主 由誤打誤撞嘅旅遊buddy開始建立嘅關係 劇情可預測得嚟又不至於cliche 輕鬆嘅作品 無聊想kill time都幾推薦 眼球會喜歡 希望今年內會睇到原著小說（我個list愈嚟愈長goshhh 🧡 8/10 ***** 七月睇完原著小說後再睇一次電影 評分有下降☹️ 💚 7.2/10

主要講一個隔絕生活中塑膠產品嘅實驗 為期三個月 睇下可唔可以改善體內微塑膠水平 以及最重要嘅 可唔可以改善不育情況 因為有研究發現近代人類嘅生育率低同精子數量&質量大幅下降有關 而咁突然嘅下降非常大機會同環境毒素有關 塑膠就係其中一種環境毒素 發現我對呢個地球同人類呢個物種已經絕望到 我聽到佢話塑膠問題嚴重到威脅人類存亡、可能無法繁衍後代嘅程度嗰陣 我第一反應係：咁咪幾好！？ 本身以為係講微塑膠到底有幾有害同埋如何減少攝取吸入嘅方法 點知其實係研究實驗嘅docu😂 不過都係有趣嘅 💙 7.8/10

終於睇咗 實在估唔到香港居然都可以成功上映 故事比想像中簡單 就係一個鄉下女隻身去台北殯儀館領哥哥嘅屍體 路上遇到熱心嘅人力車車伕 兩個人一齊籌錢輸錢趕路追趕逃亡嘅故事 唔識評價 但係一個好睇同值得睇嘅故事 冇交代亦唔需要交代哥哥被追捕通緝槍斃嘅原因 呢個時代背景之下 唔需要原因 欣賞結局嘅處理 所有角色都演得好有說服力 冇expect過曾敬驊係特別出演 得咁少鏡頭但又極度重要 「走咯」

無法客觀評分嘅一套劇 😶 早排因為朋友推薦睇咗原作webtoon 而朋友推薦嘅時候就已經講過佢翻拍嘅電視劇拍得好爛 所以我睇webtoon嘅心態從一開始就係「睇下你有幾好睇」 又真係好好睇 繼而抱住「即管睇下套劇拍得有幾垃圾」嘅心態開套劇嚟睇 身為喜歡原作嘅觀眾 實在不得不說 劇集改編簡直係一塌糊塗 一套講轉生、擁有n段前世記憶嘅作品 居然將記得前世嘅原因改頭換面 完全失去本來嘅感動同意義 仲未提角色嘅改動 男主角演員人選第一眼就已經冇角色嗰種vibe 再睇佢嘅演繹同劇情發展更加印證到呢個根本唔係原作裡面嘅文瑞夏 本身係好討人喜歡嘅男二何秘書喺劇裡面只係一個毫無特色毫無魅力嘅配角 前半part毫無追看性 後半part嘅追看性來自我想知你點收科 改編作品嚟講真係非常非常失敗 之但係 一邊睇我一邊幻想 如果我係冇睇過原作webtoon嘅觀眾 我會點睇呢套劇？ 睇完頭11集之後我都冇答案 因為我想像唔到 但去到最後一集嘅最後結局 忽然我又覺得喺冇原作前提下 呢個收尾其實不錯 但僅限於呢個收尾 前面嘅缺陷不足依然非常扣分 因此 我評唔到分 如果用「改編作品」嚟睇 絕對低分 但無視原作嘅話係咪真係咁差？我唔識講 總括而言 webtoon好睇 去睇webtoon👍🏻 🩷 ?/10

作為不盡責的AROHA 呢套係唯一一套on檔咁睇嘅劇🫣😂 睇之前冇咩期待 點知unexpectedly好睇呢🌟🌟🌟 因為接觸到受污染嘅河水所以突然有超能力 vs 細細個喺孤兒院俾人當實驗品所以有超能力 老實講主線劇情略嫌少少不足 不過八集嚟講尚算可以接受 第一集真係有啲悶有啲不知所云 而且人物妝容啊畫面色調都好陰沉 第二集之後就冇問題了（因為車生出現就自帶光芒）（不是） CG特技好好 不少批評係話兩位男配好煩 但我覺得佢哋呢個性格設定好make sense 1999年嘅小市鎮 正常水平嘅貧窮 屋企有老婆有女 只顧自己利益、冇著數唔做嘅市儈性格係好合乎情理嘅人物設定 況且佢哋嘅超能力都係靠把口啟動 所以我覺得冇咩問題 總括而言係輕鬆搞笑嘅超能力x喪屍x邪教電視劇 送飯睇不錯 🖤 8/10

有friend話好好睇 錯過咗戲院上映就喺N記睇 hmmmm冇想像中咁好睇呢 所謂雙囍就係新郎新娘需要喺同一日同一間酒店不同樓層搞兩場婚禮 因為新郎爸爸同媽媽離咗婚 為咗唔好得失兩方就決定搞兩場 最動容反而係新娘同佢阿爸嘅part 每次見到新娘喊我都跟住喊（該死的F人） 大概佢哋就係show緊理想良好嘅單親家庭關係係點 有矛盾 但好有愛 父親嫁女會不捨 相反新郎嘅家庭就典型嘅阿爸大曬嚴肅威嚴管教 ending好似好突然嘅大團圓結局 but what do you want 我都未諗到更好嘅處理方法😂但我覺得可以更好 余香凝真係好靚 ❤️ 7.2/10

喺睇完超能路人甲之後想睇甜甜的戀愛 諗起好耐之前喺threads睇完cut之後被深深吸引然後加入我的清單但一直未搵到合適時機開嘅呢套愛在大都會 睇完 嘩 完全係驚人地好看及對味 首先必須承認當初引我落疊嘅cut係冇欺騙成分嘅 甜嘅部分真係甜到令人忍唔住扯頭髮大叫 啲畫面係靚到三番四次令人要playback再playback 但我冇expect過呢套嘢令我流咁多咁多眼淚 黐線 係喊到必須pause 喊陣先可以繼續睇嗰種喊 好耐好耐好耐冇試過睇劇睇到咁 一開頭覺得女主提分手嘅理由好唔充分 再站在可憐嘅男主視角 要同一個共同擁有咁多金色記憶球（開心幸福到唔係黃色咁簡單）嘅人離別 係有幾傷心有幾痛 然後大F人就攤喺床諗起自己最愛嘅屋企人 幻想未發生但必定會發生嘅未來 凌晨三點喊到眼腫面腫 另一個又係喊到死嘅位係三位主角嘅友情 唔劇透但真係好動人 唔係冇瑕疵的 套劇用類似拍紀錄片嘅清奇手法拍攝 但佢係貨真價實嘅電視劇 個人覺得突然之間做人物訪問嘅手法有點突兀 同埋我明導演編劇大概係想呼應劇名 探討都市人嘅愛情 但focus喺男一女一、極其量男二女二嘅愛情線就夠 其他有點多餘 搞到好似有啲鬆散 但係！ 整體而言都係好好好中意 中意到睇睇下跳咗出去查wiki到底導演編劇有咩前作品 結果發現 導演之前拍過男朋友 編劇之前編過羅曼史是別冊附錄 aka兩套我心目中完美演繹「浪漫」嘅top tier韓劇 that’s why呢套愛在大都市如此對味 所有畫面都拍得好靚好有feel 節奏 劇情發展 對白 角色設定 全部都恰到好處（除咗以上提及嘅瑕疵） 睇嚟我同呢兩位對浪漫嘅詮釋完全吻合呢🤝🏻 另一個surprise就係池昌旭 非常抱歉但都係要講 之前對池昌旭嘅印象就係靚仔啲嘅李敏鎬 （again 非常抱歉 我真係完全get唔到李生。。。） 但係！！！ 池昌旭飾演嘅朴宰元係charm。到。不。得。了。 而且完全做到我對好演員嘅唯一準則：演嘅角色有說服力 佢完完全全就係朴宰元 講嘢語氣、小動作、眼神、微表情 全部都好準確地自然 同金智媛嘅chemistry係正到不得了不得了 金智媛某啲位可愛到令我諗起三流之路 （PS 三流之路永遠都係我心目中嘅SSS級韓劇 大推） 公平啲講 主角群演員全部都演得好好 冇一個有挑剔 半個鐘一集 total 17集 冇負擔但極具追看性 非常眼球friendly 友情愛情都有動人刻劃 角色可愛立體得嚟真實 總而言之就係非常推薦 附上朴宰元得戚的樣子 ❤️ 9.4/10

之前見到有人推薦 但我覺得我嘅人生閱歷不足以具備懂得欣賞呢套作品嘅能力🫥🫥🫥 拍得好靚 尤其森林樹景全部都好靚 係寧靜嘅美 但我真係唔識欣賞😐 💚 6/10

前排都幾多人討論嘅N記新docu 講有個冇大肚嘅女人抱住個初生嬰兒話呢個係佢個女 點知去到醫院check 血型DNA全部都不吻合 然後先倒敘講返呢個奇怪女人嘅故事 到底係邊個個B 點解佢會攞到人哋個B 點解佢要呃全世界自己大肚 睇完之後我都係唔太get佢到底點解要呃人自己有咗 但成件事真係非常駭人聽聞 點解呢個世界有啲咁變態嘅人 🩷 8/10

早前見到有人好大力推 以為已經錯過咗上畫 點知居然N記有得睇 於是就睇咗人生第一套阿拉伯語電影 故事setting喺90年代嘅伊拉克 受國際制裁所以民不聊生 但獨裁者依然要求全國人民為佢慶祝生日 喺遠離城市嘅一個河邊小鎮 一個9歲女童被軍官老師抽籤選中負責整生日蛋糕 兩日後就要 但窮到連飯都冇得食嘅佢 邊有可能以前買材料整蛋糕？ 與此同時 同佢相依為命嘅嫲嫲計劃將孫女賣畀城市裡面一位相識嘅朋友（？）因為自己已經無力撫養 去到城市得悉此事嘅細路女即刻逃走 然後就同佢嘅鄰居aka同學一齊喺陌生嘅城市想盡辦法搵麵粉雞蛋砂糖同發粉 中間少悶加上節奏慢 睇到瞓著咗（MY BAD） 但串流平台嘅好處就係可以playback😌 除此之外係幾inspiring嘅 到處都係獨裁者嘅相片同畫像 非常諷刺嘅係 人民已經窮到必須自私 仍然開口埋口我要為你奉上性命 睇其他人嘅影評見到一點 女孩同男孩喺片中三度玩鬥唔眨眼遊戲 觀眾解讀為： 要睜開雙眼睇清楚呢個政權嘅腐敗 sad end到你未意識到佢sad已經end咗💧 🩶 8.2/10

喺唔太記得前作講咩嘅狀態下入場 有某啲位睇到滿頭問號 咦點解胡迪唔喺度？ 吓乜巴斯光年同翠絲係一pair？？？ 但呢啲都係我個人嘅問題 其他人嘅comment沒有很正面所以都冇咩expectation 睇完冇失望 幾好幾好 唔知有冇Toy Story 6呢😂😂 🩵 7.6/10

再一次意識到韓劇的可怕 睇到一半嘅時候 好想攬攬未來同未知兩姊妹 睇完之後 好想攬攬導演 到底你係如何、為何製作出咁多套夭心夭肺嘅作品😭😭😭 完美touch中好幾個非常intimate嘅位 所以唔想睇太多其他人嘅解讀同評價 唔想其他人影響自己嘅觀感 幾乎每條線嘅發展都好喜歡 尤其三段親子情 玉熙-未來未知嘅母女關係 玉熙-婆婆嘅母女關係 粉紅-昊洙嘅母子關係 冇expect過呢套劇會講咁多親子關係 亦冇expect過會寫得咁好 一路睇住佢哋同自己嘅母親和解 放下 內心靠近擁抱 雙手奉上眼淚🤲🏻💧💧💧 粉紅成為本劇我最喜愛角色 同時榮登我最喜愛媽媽角色第二名（第一名係波兒嘅理莎） 每次見到昊洙自以為體諒咁推開阿媽 鏡頭影住粉紅瞬間碎裂嘅樣 我都會反思我有冇曾經咁樣hurt過自己阿媽 第二次睇Jinyoung做戲 對上一次惡魔法官都係律師角色呢 呢種溫柔暖男真係好適合佢嘅氣場 每次望住未知笑 眼睛都流露出愛意 好jenggg 未來嘅感情線同樣好得我心 可能會有人覺得遺憾 點解導演編劇唔幫佢哋寫多一步 但呢種kind of開放式結局就係最符合未來角色設定嘅安排 世振就係要好慢好慢 一步一步敲開未來嘅心 所以我完全接受 又係演技全員在線嘅劇 玉熙呢種母親真實到多次令人心碎 所有老人家都做得好好 當然不得不提一人分飾四角嘅朴寶英 到底係點做到 crazzzzzzy 眼神語氣小動作都一定有特別設計過 撇除髮型都可以一眼分得出到底而家呢個係未來定未知 攞女演員獎絕對係實至名歸 又一套會擺喺內心深深處嘅優秀作品 朴信宇導演嘅作品好睇到我暫時唔敢再開多套 導演到底你經歷過啲咩😭😭😭 💙 9.6/10

聽過呢套戲好多次 甚至以前哲學course講自我講何謂真實都會提及 好新奇嘅idea 男主角Truman活喺一個精心度身訂造嘅小島 裡面每個市民都係演員 Truman由出世開始嘅每一日都24/7 on live咁播畀全世界睇 而不自知 名副其實嘅真人show 你如何確保自己身處嘅世界唔係由一個高階存在物為你創造嘅「虛構」世界？ 但你自己每日嘅經驗又真實無比 咁何謂真實何謂虛假？ 真真假假又係咪真係咁重要？ 覺得導演同製作團隊好過份嘅時候 我又諗 咁Truman離開後可以去邊？ 佢每次笑都標準到好似假嘅emoji咁😄 🩵 9.2/10

基本上見到嘅comment都正面 所以都帶點expectation入場 turns out好似有少少高估咗嘅劇情嘅精彩程度🫢🫢 有唔合理嘅地方 但因為係呢套戲所以唔合理都ok可以接受（劇情有address過何謂合理嘅問題） 男主角德仔真係好似死亡筆記嘅N 只不過係黑髮ver ❤️ 7.4/10

自從睇過呃人自己有咗仲殺人搶嬰案之後 已經冇嘢嚇到我了😬 呢個世界真係大到無奇不有 🖤 7.4/10

不時見到N記推呢套畀我 但一直提不起興趣 見八月中下架就give it a try 講一個酒店門童跟酒店經理學做嘢 當中經歷嘅一切劫難😂包括爭身家同逃獄 色彩構圖好靚 要grand嘅場景都好grand 但劇情不是我杯茶😬😬 有不少地方都略顯莫名其妙同兒戲 cast有震撼到我 🩷 7/10

唯一一套睇過嘅戀綜居然出Season 2 仲要繼續有徐仁國 當然係睇睇佢 覺得第一季好睇啲 所以稍微低0.1分 終於有一個同我一樣諗法嘅參加者： 點解可以喺咁短時間內對一個/多個人產生戀愛嘅衝動？！！ 即係咁講 單身咗咁多年就代表喺咁長嘅人生中遇到咁多人都冇發生到戀愛關係 咁要喺短短十日嘅人工環境下識到對象係一件幾高難度嘅事？！ 可能係嚟呢個節目必定要拍到拖嘅決心唔夠強 又或者因為我都係母胎單身一分子所以唔理解 anyways 唔知點解我睇到最後一集都冇辦法記得男嘉賓嘅名😂😂😂 所以suppose喺threads俾人不斷劇透 但因為我完全load唔到邊個打邊個所以完全不受影響😂😂 兩季嘅男嘉賓都一言難盡 但第一季嘅女嘉賓更討喜 所以第一季好睇啲 期待另外六集番外 可能會係最有趣最好睇嘅特輯😂 🩷 6.9/10

好唔想畀咁低分但我真係唔識欣賞呢套🥲🥲 懷疑係全網評價最低嘅人 見親都讚嘅韓劇 甚至唔係單純讚 係去到人生韓劇、top top tier嘅程度 實在聽過呢個名太多太多次 所以即使《浪漫的體質》呢個名對我毫無吸引力 我都終於開咗嚟睇 但頭兩集我已經想棄。。。 三個30歲閨蜜嘅同居生活故事 三個人嘅人生都好不一樣 一個係新人編劇 一個係痛失未婚夫嘅待業富婆紀錄片導演 一個係單親媽媽職業女性 雖說三條故事線有些微交疊嘅地方 但基本上都係完全獨立嘅故事 即係 敘事好跳 而且慢 似有若無嘅主線 經常閒話家常好似冇重點嘅對話 為數不少嘅配角 著墨都不少 係好似睇曬呢三位主角身邊不同人嘅事 角色立體 但真係唔知故事想講乜 如果係處境劇可能容易啲接受 但作為一套16集嘅韓劇真係 I can’t 本身對我而言最有追看性就係單親媽媽同公司新人嘅社內年下愛情線 究竟最後會唔會有進一步發展 結果拖到最後一集先交代 而且結局令我非常無語 我真係睇到吓咗出聲 乜嘢啊😭😭😭😭😭 好少數每個角色都討喜但完全無法欣賞套劇嘅情況 我真係完全唔知呢套劇有咩可取之處🕳️ get唔到其他人嘅共鳴位喺邊 係咪我人生經歷未夠豐富 總之佢對我而言就係no no 唔好睇到即使想儘快了斷都快唔到 呢個分數已經極度畀面 🩷 5.8/10

（1103 update咗大劇透觀後感） 20251028✍🏻 因為未process到劇情 所以以下係不含劇透嘅記錄 畫面好靚 真係好靚好靚 香港製作 credit驟眼睇幾乎全部都係香港人名字 單憑呢點已經需要入場睇 最amazed嘅係打鬥場面 真係真係好精緻🥹✨✨✨ 唔中意啲人用「唔失禮」去形容 根本唔需要比較 冇嘢好失禮 根本就係掂 好掂 第一次睇謝票場 結局喊到不似人形 播完credit終於平復好心情 點知美術總監、童童泰妹一行出嚟 啲眼淚又莫名其妙地不斷流出嚟 真係莫名其妙💦💦💦💦💦 有個觀眾分享自己故事 又喊 行出戲院 friend問我 你OK嗎 又喊多次 喊到有個位係真係唔知自己喊緊乜😭😭 feel到想講啲好deep好大嘅議題 但我喊到腦袋變成漿糊 劇情理解加載中😂 打算聽下睇下訪問片再digest下先 //-//-//-//-//-//-//-//-//-//-//-// 20251103✍🏻 經過多番與同行友人嘅討論 以及不斷不斷睇其他人嘅comment之後 我終於都整理好自己對於世外嘅觀後感 兩句粗暴總結： ① 憑咩 ② 恨鐵不成鋼 且同鋼嘅距離不近 真係好mixed feeling 睇之前見到咁多宣傳 見到係香港本土製作嘅動畫 仲要係講放下執念同轉世concept嘅作品 超級期待 不負所托甚至out of expectation嘅係動畫製作之高質 我唔識好technically去睇去評價咩2D 3D animation 但成個世外世界觀嘅設定 打鬥場面嘅呈現 全部都好好睇 但正正因為太欣賞藝術作畫方面嘅製作 所以對於劇本同故事本身更加抌心口地覺得可惜 「啊 點解會咁！？」 ⚠️以下大劇透⚠️慎入⚠️ 【憑咩】 小鬼憑咩擁有回到過去嘅超能力 小鬼憑咩可以有黑天貼身保護 小鬼憑咩得到天女嘅種種優待（以上都係天女安排） 小鬼憑咩相信人性善良 小鬼憑咩叫人類放下 到頭來： 小妹憑咩 喺眾生平等嘅世界 點解小妹同小鬼好似有特權咁 我唔相信喺小妹第一世嗰個咁窮困、受饑荒之苦嘅時代 小妹係唯一一個經歷呢啲慘劇嘅家庭 又或者咁講 小妹唔會係特別嘅人 就算世外、天女、靈守偶爾會被某啲亡魂感動到 我都唔覺得小妹嘅經歷說服到我佢deserve故事裡面嘅一大堆特別待遇 可能喺世外先生出鬼角、而且只係生得一隻係從未試過嘅特例？ 碰巧負責小妹呢個亡魂嘅靈守係初出茅廬嘅小鬼 小鬼未見識過太多人間嘅不幸 所以覺得小妹真係好慘好可憐 又好天真地相信小妹其實本性善良 唔應該以消滅人鬼嘅方式處置小妹 咁但係我唔認為世外係一個可以為個別亡魂開特例嘅地方 世間咁多悲劇 如果個個都可以好似小妹咁 咁其實世外根本就冇秩序可言 小鬼可以話係因為經驗尚淺 咁但係天女唔會未見過慘過小妹嘅人吧 點解會容許呢件事發生？ 仲要一而再再而三協助小鬼喺一千年間阻止小妹變成人鬼？ 世外唔suppose可以多番干涉人間的吧 【邏輯】 我覺得世外劇本最大嘅問題係邏輯 邏輯混亂 前後不一 古蘭公主可以回到過去兩次、第一次太遠太早睇唔清所以需要睇多次 呢個只係淺層嘅illustration去說明佢嘅邏輯龍門真係好任意 明明前面一直強調鬼角生出嚟後就冇得返轉頭 小妹出現可以一隻一隻生嘅先例 OK 咁兩隻鬼角都生曬出嚟就等如完全成為人鬼 點知小英生曬兩隻鬼角 黑天都仲可以話「等到啲骨包住曬就真係冇得救㗎喇」 所以即係點？人鬼嘅定義到底係咩？ 【心結】 一直以為心結係人間嘅產物 只有人類先會有心結 去到最後居然話要解決世外嘅困境就必須解開小鬼嘅心結 我一個大問號 吓？？？小鬼點解會有心結 小鬼點解可以有心結 佢靈守嚟咋喎 仲要區區一個靈守嘅心結足以撼動世外存亡咁誇張 我以為佢終於要交代小鬼嘅故事 猜測佢會唔會前世係人類 或者甚至佢係神之類嘅化身？ 點知就只係一個同人類做咗1000年約誓嘅普通靈守？？？ 可能天女講小鬼嘅心結只係比喻 但呢套戲本來就將平日語言嘅「心結」實體化變成真嘅結 如果呢度只係比喻意義上嘅心結 咁觀眾如我就真係會好混亂 如果佢真係指小鬼心裡面有心結 咁到底係佢開頭對心結嘅定義不完整 定又再次任意詮釋自己前面提出嘅概念定義？ 【姜山】 區分開我自己同某啲其他網上comment嘅睇法差異 姜山嗰part係我覺得寫得最有說服力嘅 小鬼面對古蘭公主嘅心結 基本上只係畀佢睇清事實真相 同埋用把口說服 大概係小鬼經過幾世嘅練習之後有所長進 佢勸姜山嘅方法係畀啲反例佢睇 而當中呢隻怪力手同段兄係交代得最最完整嘅故事同角色： 完全明白點解佢哋會變成人鬼、篇幅恰當、雖然係配角但情感deliver得恰到好處 所以姜山見到呢兩個例子後放棄做人鬼嘅念頭 好make sense 至於頗多人詬病嘅斬手糧倉事件 我都覺得完全冇問題 本身官員嘅設定就係狗官 覺得狗官會存有一絲良心被姜山感化根本就係觀眾同村民嘅癡心妄想 正如一千年來都盲目相信人性本善嘅小鬼 呢個belief都只係佢嘅癡心妄想 比起點解狗官要答應開糧倉結果喺裡面處決所有人 我更不理解點解小鬼咁堅持人類其實善良 【善良】 好多宣傳稿、訪問都提到「善良」呢個關鍵字 但老實講 我完全feel唔到善良係呢套劇重點討論嘅主題 放下執念我明 原諒自己我明 但善良？ 到底邊個善良？邊度體現咗善良？ 小妹不知情下食咗自己細佬 小鬼同佢講 唔好忘記其實自己係個善良嘅人 但呈現畀觀眾睇嘅小妹完全冇可以體現佢善良嘅事蹟 就係一個普通嘅小女孩 話小妹係善良有少少太牽強 反而漠視人間種種悲劇 見證過黑化（鬼之芽發芽）小妹多次後 依然堅定不移人類/小妹係善良嘅小鬼 好似仲善良 然而重點係 小鬼 唔 係 人 一個設定係不懂人情世故嘅非人角色去講人性善良本身就已經冇咩說服力 但作品居然將「善良」呢個作為好核心嘅中心思想？？ 小鬼仲要三番四次勸服經歷緊苦難嘅人類放下執著 轉世後嘅小妹根本就唔識小鬼 一個初次見面三唔識七嘅奇怪物體叫我放下執著原諒自己 點解我要聽你講？？？ 我呢part真係完全get唔到 同友人傾完嘅結論：最善良嘅其實係黑天 成日口講嫌棄小鬼 話佢廢 話佢孱 話佢煩 但每次都不離不棄 仆心仆命救佢救小妹轉世 黑天大人最高🙌🏻🙌🏻 【敘事問題？】 粗暴將我見到嘅評論分成兩類 一類係只有稱讚欣賞支持 一類係表達對劇情同故事嘅不解/批評 我最唔中意就係將所有批評當作「你理解唔到啫」嘅comment 「插敘都唔識？小學都教啦」 「你自己get唔到就話人寫得差」 正如我上面多番強調 我認為世外最大嘅問題係邏輯 而以上嘅例子都說明 呢個唔係敘事手法造成或可以解決嘅核心問題 編劇刻意最後先交代小妹、古蘭公主、姜山、小英之間有咩關係 一次過穿橋製造驚喜 呢個安排冇問題 但有更多我同其他觀眾睇完後覺得不解嘅地方係更關鍵嘅故事內容 係 可能佢背後牽涉佛學嘅概念 唔係每個人都熟悉 我都唔識 但再撇除埋呢啲深層意義嘢 都依然存在好多邏輯上前後矛盾嘅地方 沙沙石石加埋一齊就令到成個故事好唔合理 見到其中一個最不合理嘅comment係話 「呢套戲唔適合太理性去睇 要感性啲先感受到佢想講嘅嘢」 ？？？？？完全問曬號 撐都唔係咁撐吧ching 【恨鐵不成鋼】 愈同友人傾得多 愈再深入仔細諗成個故事嘅鋪排 就愈覺得可惜 咁難得有咁多人才做咁優秀嘅製作 難得有咁多noise 但劇情本身真係support唔到🥲🥲🥲 感動歸感動 喊歸喊 劇情唔合理歸唔合理 Don’t get me wrong 非常非常欣賞世外整個製作班底 尤其美術團隊 完全feel到爆肝用心程度 但編劇啊導演啊 真係有頗大嘅進步空間啊 唔愛唔支持就唔會花咁多時間睇採訪睇comment同人討論劇情寫呢一大篇文 恨鐵不成鋼 且同鋼嘅距離真係仲有一截🥲🥲🥲🥲🥲 好欣賞世外將轉生、心結呢啲concept變成好實在嘅題材 令更多人認識 Feel到佢哋嘗試用呢個故事講放下執著嘅message 但執行起嚟就真係唔太完美🥺 唔知會唔會有角色/世界觀設定集 希望可以解答到觀眾嘅眾多不解 🩵 7.6/10

2026年第一套完成嘅劇 為新一年開咗好好嘅頭 因為係優秀嘅作品🖤🖤🖤 《怪物》 聽過睇過好多人推薦 終於趁住舊年重溫完德魯納開嚟睇同樣係呂珍九主演嘅懸疑題材故事 好想多啲人睇到所以唔開劇透mode 盡可能喺唔劇透嘅情況下講講感想 循例自己寫之前睇下其他人點寫先 第一次見到「虎頭龍尾」呢個term 可見評價係幾高 而我覺得查案題材做到呢點係更加難 因為佈局同製造問號相對容易 但set到格局咁大 點收科先可以令觀眾接受 唔會覺得有太大落差之餘覺得心理平衡 警惡懲奸又唔太TVB大團圓結局 就好困難 而《怪物》係出色嘅 唔起眼嘅文洲市 裡面更唔起眼嘅萬陽邑 係呢個故事嘅舞台 首爾唔可以係呢個故事嘅舞台 釜山都唔得 必須要係好細嘅小城鎮 荒地多過建築物 遠離大城市嘅地方 因為需要全個鎮裡面嘅人都互相認識、建立到幾乎係親人嘅關係 呢個故事先成立 20年前 呢個細到藏不住秘密嘅小城鎮接連發生咗好幾宗女性失蹤案 懷疑係連環殺人犯所為 其中一個失蹤者係當年20歲嘅李東植嘅龍鳳胎妹妹 但李東植係連環殺人犯嘅嫌疑犯 一直搵唔到確實證據 妹妹亦一直失蹤 生唔見人 死唔見屍 就咁過咗20年 20年後 李東植係個警察 輾轉又返返嚟萬陽做派出所員警 偏偏呢個時候 萬陽時隔20年再次發生疑似謀殺嘅女性失蹤案件 一個動機不明嘅警察 韓洙元 由首爾調職過嚟呢個鳥不生蛋嘅萬陽派出所 所長安排洙元同東植做巡邏partner 一次又一次「意外」同各宗失蹤案同屍體發現案有關 全套劇嘅重點當然係搵兇手 20年前嘅兇手同20年後各兇手係咪同一人？一個人定多過一個人？ 東植妹妹嘅屍體到底喺邊？ 兇手嘅殺人動機係咩？ 以上 當然係重點 但我覺得可以將《怪物》分做上下兩part 而以上只係上半part嘅劇情重點 揭露兇手真面目之後先係套劇嘅精華所在 各人埋藏心底長達20年嘅秘密到底係咩 有冇不為人知嘅關係同合作 眾人如何不惜一切代價甚至自己都成為怪物咁去搵背後嘅怪物到底係邊個 冇辦法好似其他人咁仔細同深入分析呢套劇 講少少我覺得佢好想講嘅主題 一、家人 洙元嘅爸爸係韓國警察廳嘅候任廳長 洙元自己又係能力優秀嘅年輕警察 內外兼備嘅佢 本來完全係警界嘅明日之星 人生大贏家 但事實上佢同爸爸嘅關係唔好 甚至去到後半段 洙元係最希望同最落力要毀掉爸爸人生嘅人 東植話洙元係個完全不賦予任何意義畀「家人」嘅人 偏偏 故事嘅舞台 萬陽 就係一個彼此冇血緣關係都親近到好似家人嘅地方 顯得初來乍到嘅洙元喺呢個地方更格格不入 同時擔任一把刀 毫不留情地割開萬陽眾人努力收藏嘅遮羞布 係咪真係冇秘密？係咪真係完全信任對方？ 一切都係因為洙元嘅介入而開始 萬陽人彼此間嘅羈絆好深 bonding好強 呢點喺好多地方都顯現到 成日聚餐 個個都由細識到大 一方有難八方支援 相比洙元、佢阿爸、檢察官呢三個之間嘅相處又係好大對比 編劇同導演多番透過呢兩個地方對家人嘅理解、點對待所謂嘅「家人」 傳遞呢套劇嘅主題 好有張力 好好睇 二、法律 就快對韓國嘅法例清楚過對香港法例嘅了解😂😂 因為睇得多韓劇同懸案YouTube片 其中最常提到嘅就係失蹤 事實上人口失蹤係冇得報案嘅 因為基本上都係視作離家出走處理 由呢點引申到套劇其他嘅情節 多次強調法律嘅無力 東植之所以變成而家嘅癲佬 其中一個原因就係法律嘅無力 冇辦法搵到當年殺死自己妹妹嘅兇手 冇辦法好好制裁罪人 反而令無辜嘅人承受莫須有嘅污名同壓力 所以佢先投考警察 想用自己嘅力量向兇手同世界報仇 洙元本來係企喺東植嘅對立面 東植好多時都漠視程序正義 成日喺辦案過程中踩過界做不合法嘅事 洙元每每都會制止 但後來洙元都慢慢意識到原來佢一直信奉嘅法並唔係完美 有好多嘢冇辦法透過法律處理 有好多不公不義冇辦法透過法律伸張 呢個時候 洙元會如何選擇？ 心中重要支柱同信仰都一一倒下時 佢會唔會都一同崩潰成為怪物？ 頭幾集嘅疑團係多到覺得有少少拖戲 而且兩位主角嘅性格都好不討喜 所以一開頭可能有少少趕客 但拜託各位一定一定要捱落去 因為呢套劇真係愈睇愈精彩 可疑嘅人每集都換一個 終於鎖定嫌犯之後 導演話你知 sorry 真正嘅謎團而家先正式展開 不斷拋出拼圖 直到最後一集先完整交代清楚橫跨二十年嘅案件sss 演技全員在線 雙主角都極度優秀 李東植係痴狂嘅怪物 韓洙元係執著嘅怪物 其他角色唔講得 但大家都代表不同方面嘅怪物 講人喺利益面前 關係係如何虛偽 信任係如何脆弱 同時講人對家人、朋友、拍檔嘅bonding係如何強到成為自己最可靠嘅後盾 喊咗兩次 一次係大夥兒回憶一位死者生前嘅事 邊舉杯邊講對白： 「你們很有錢嗎？」 「沒有，大哥！」 「那你們健康嗎？」 「不，大哥！」 「那人生有甚麼大不了的嗎？喝吧！」 「喝吧！」 一次係最後最後一幕 東植同洙元分別講嘅說話： 記得好好食飯，好好睡覺，好好拉屎。 兩段都係刻劃緊好可貴好動人嘅bonding😭😭😭 虎頭龍尾唔係浪得虛名 呂珍九係實力派 睇到最後我發現飾演東植嘅演員申河均有啲似雷格西😂😂😂😂 非常非常推薦 🖤 9.4/10