終於開第3季睇，以下感受不含劇透，雖然IG同thread可能已經講晒賽果😂 ／ 日本隊糸井嘉男真係好正！之前係netflix另一個節目Final Draft，佢已經係我最鍾意嘅選手，佢自己又有實力，亦對自己實力有自信，但唔會因為咁而輕視其他對手，而且又幽默，對後輩嘅態度亦好友善，一個肌肉版嘅暖男大叔feel。 ／ 今季嘅場地佈置同埋比賽設計依然好正，而每個國家俾我感覺都係好認真參賽(雖然google search嘅關鍵詞係造假)。 ／ 雖然澳大利亞開頭好似有啲囂張，但我睇落佢地係真心敬佩強者，而且有個女選手係吊環比賽嘅表現令我好感動，咬緊眼關堅持2個幾鐘痛到喊，但唔想拖累隊友而死頂落去，見到佢地啲拚勁同團隊意識好強。 玩跑酷嘅男選手，靚仔得黎又好有速度！ Btw外國隊參加真人show，係訪談時講嘢嘅tone真係常見果種感覺，😂我唔識點形容。 ／ 印尼隊隊長登場好似超兇狠，又好大隻咁，但我發現佢係正宗嘅我好大隻但其實我好溫柔嘅人 佢好識鼓勵同安慰隊友，最重要係佢面對失敗嘅坦蕩態度都好正！面對對方隊伍故意的激怒策略，同其他隊嘅輕視，佢都係平常心看待，佢會雲淡風輕咁同人地講保持呢種士氣，佢好清楚無論點都係自己隊嘅表現最重要，無論贏輸都係要先要求自己呢邊做得好，好有大將之風！土耳其隊係搶球賽正面迎戰日本隊男選手嘅果位女選手都好有毅力好勁，超級型！ ／ 泰國隊有個黑馬選手，係前排球選手，佢初出場時真心覺得佢好搞笑，好有綜藝感，但諗住佢實力普通，但事實係佢超級厲害，頭腦亦轉得好快，同隊友之間合作好好，同所有隊友嘅關係好好，睇人地國家比賽時亦會超級肉緊，我好buy佢呢種投入程度。 ／ 蒙古隊俾我感覺係沉默嘅鷹，佢地實力雄厚，對敵人虎視眈眈，對勝利渴求，佢地會比較少講嘢，但我好鍾意佢地團隊pose拉弓射箭，好正！馬戲團男選手卸妝之後好靚仔，而且比想像中更有毅力，吊環比賽開正佢範疇，表現令人印象深刻！小鬍子都好厲害，佢證明咗身高同力量唔係正比關係。 ／ 菲律賓隊我感覺係知道自己實力唔係最好，但佢地係堅持到底，隊員之間互相鼓勵同接納，佢地嘅士氣係好熱烈，無論係劣勢同優勢時都係咁。 ／ 土耳其隊同韓國隊都強，但唔會係特別引起我關注，或者有某個位、某項表現好觸動嘅隊伍，而我覺得係兩方隊長問題，土耳其女選手嘅一句總結講得好啱，佢地嘅驕傲同自大令佢地由領先變落後。 有啲位係諷刺，當土耳其隊好想人地唔小心失誤，然後自己隊可以贏時，結果反而係自己隊員失誤，所以都係話唔好理人地點樣，應該專注自己先最重要。 ／ 然後韓國作為東道主，同埋頭一二季嘅節目國家，我對韓國隊真係有好多嘢想吐糟(的確係我嘅主觀感覺) 話說有樣嘢我由第2季已經開始，到第3季我更加確認，就係我係討厭金東炫選手(但我唔係討厭佢成個人或者綜藝表現)，即係韓國隊隊長。 金東炫係參加大逃脫同其他綜藝嘅表現都係幾有趣，我都鍾意睇，我一直覺得佢嘅自大驕傲係誇張法嘅綜藝人設，但黎到呢邊真人show體育競技，某程度我會覺得佢真係就係咁樣🤦🏻‍♀️ 我係好討厭佢嘅表現同某啲說話(係連續第2季同第3季我都不期然有咁嘅感覺)，第2季開頭所有選手係獨立參賽都算啦，但去到後面團隊賽佢一做隊長開始真係有反感，更何況第3季佢係做代表韓國嘅隊長。 我好少會有咁嘅感覺，所以我都想搞清楚自己點解會有咁嘅情緒而上網睇埋其他意見。有位網友嘅評價我好認同，呢類節目首先以熱血做賣點，大家係光明正大、又好正氣凜然咁樣參賽想打敗對方，但金東炫係好似會有種為咗贏而想避戰嘅心態，只要唔係對上最強果隊，自己呢邊最好對上最弱果隊先出線就好，而且佢好多時都因輕視而錯判人地嘅實力。 又舉例如果知道對方失誤，自己呢一隊即刻晉級，佢會太常七情上面想人地失敗(雖然其他隊都有呢種情況，但最弊佢真係情緒外露到極嘅果種人，對方語言不通唔代表唔知道囉，所以我完全feel到菲律賓隊係唔鍾意佢)，如果佢係一個隊員我可能感受還好，但佢係要帶領隊員對抗強敵嘅國家隊隊長，咁樣嘅表現好唔得體亦好冇風度。 見網上粉絲有幫手解釋話佢係拳擊選手，習慣單打作戰，加上佢本人都有話過自己係剩識打架嘅人，但我覺得最大問題係佢唔適合做隊長，仲要國家與國家較量呢類真人show節目，有邊個唔想贏，但佢想贏嘅表現令我好冇熱血感，佢如果係做隊員可能我就冇咁討厭。 韓國隊如果要搵隊長，我更想係第2季冠軍阿莫帝黎做，實力唔會比金東炫差，最主要係佢夠沉穩同成熟，亦更識得鼓勵隊友，而且佢本身就更似團隊嘅核心，隊友會話信賴佢，而且團隊賽佢俾嘅意見都好實用，就算處於劣勢時都會鎮定應對。只可惜韓國階級觀念好重要，金東炫只係勝在年紀最大，同因為參演綜藝而知名度最高。 而且，雖然金東炫應該都係冇心，但呢啲真人show真係會被人審視到佢某啲真心，第一，佢俾我一種唔太care任何人嘅感覺，包括自己隊，只係第3季團隊賽，隊員影響自己輸贏時佢先會care，如果隊員輸咗，佢嘅安慰感覺好敷衍(咁都可能係佢真係唔識點做，所以我先話佢唔太啱做隊長)；第二，佢骨子裡好似有種韓國傳統大男人主義，佢有時有啲說話外露咗佢並唔覺得女選手有幾勁嘅真心。有一幕我好唔鍾意，就係澳大利亞女選手咬緊牙關忍痛係吊環賽死頂落去時，佢係訪談一副不可思議咁嘅樣話點解佢咁都可以堅持落去，郁咗咁幾多次都冇跌，點解要用生命撐落去咁，就算佢輸咗都唔影響澳大利亞本晉級blablabla...大佬啊！人地梗係為咗想贏，女選手都有自己自尊，同埋要為國家戰鬥到底嘅決心嫁，同埋人地唔係求晉級就算！ ／ 唔關比賽結果事，我最鍾意嘅隊伍都係蒙古隊！聽講因為蒙古隊實在人氣高企，所以有推番外篇，大家拉大隊去探蒙古隊，遲啲再睇。