🎭劇本殺26th──《假如天堂有假期》 👥️玩家：6位 ⛺️店家：@larp.tavern1.13 🗣主持：Joyce ／ 入坑larp以黎，最一言難盡嘅體驗...... 在我角度，認真講份本係伏，但間店配套本身都勁多扣分位，「大而無用」係我嘅感想，我完全唔推薦玩呢個本🤦🏻‍♀️已經唔關係咪菠蘿頭，而係角色嘅選擇同遭遇都好難令人接受，都幾肯定間店係原本直出，冇修改過行為邏輯，無任何繁化精修。 ／ 以為可以準時開始，結果到店齊人做心測用咗20分鐘。間店大伏，啲硬件配套全部唔掂，我打開𨋢門果吓以為自己誤入地盤，唔知以為係未裝潢好就趕開店，難以置信開業接近5年幾。 主持嘅演繹我覺得唔錯，但帶本都表現係需要改進，不過份本問題係更加大，加上我又坐個行為邏輯難以接受嘅老豆角色。 ／ 入坑到依家，呢份本、呢家店我第一次真心會用「差 」字黎評價，客氣唔到。我只可以講得主持唔係咁差，佢嘅演繹我係欣賞，如果佢係新手，我會更包容，但我係唔會再踏入呢度。 即使啲古風裝潢係有落心思，但完完全全冇係任何細節位做好，帶俾顧客嘅體驗真係唔得。 (Btw我玩現代情感本，古風再靚都唔關事，但如果唔提吓呢樣嘢，間店就冇咩可取之處) ／ 開𨋢就見到嘅一大堆工業材料、厠所凌亂地面好多散落石灰塊、廉價嘅內地飲用水牌子、近乎冇墨嘅好幾枝筆、斷斷續續好打擾嘅音響(扭到最細聲又自行變返大聲，唔係恐本係情感本但好多窒聲)、完全冇清潔乾淨仲有上手食物殘渣嘅枱面、有啲團友嘅紀念品手帳係舊嘅有人用過嘅(反映冇人檢查過啲嘢)、份本咁大問題但好似直出冇修改過(冇繁化同得普通話錄音其實唔係最大問題，角色行為先係🙃)...... 正常暑假檔期係啲店嘅旺季，但呢度似唔care有冇生意，由得個大堂咁趕客？ ／ 主持扮老奶奶嘅演繹係幾好，有助令人沉浸，但帶本流程上有改進空間，除非佢係臨時被間店安排帶呢本，咁我會覺得佢做得幾好，但係如果本身負責dm就係佢本人，我最想講手機派心測分角係更方便嘅做法，冇玩家會預料開本嘅時間會先用超過20分鐘時間黎做心測分角，同埋如果唔埋呢個本，就改吓啲流程唔好跟足組手，唔好cue幾個玩家講返又講過嘅事，尤其夜已深大家精神都疲倦時。 至於角色問題，雖然唔建議玩呢個本，但都唔直接劇透，係預防劇透線下面再講多幾句。 ／ 假如呢個本想係行治癒路線，真係好失敗...... ／ 真心有貼錢買難受嘅感覺，每次去新店都帶住好奇，基本上唔介意有下次，唯獨呢間係滿滿嘅失望，係唔敢再有下次。 ／ 劇本簡介： 【假如天堂有假期】 我們總以為自己的愛夠偉大，可以跨越星辰大海，穿越時間空間，其實它脆弱到無法跨越生與死，無法穿越天堂與人間。 世上流傳著一個美麗的傳說，善良的人死去後，會在一隻「小狐狸」的接引下，去上天堂。在那裡，人們會像活著的時候一樣一般，過著更幸福快樂的生活。 倘若在人間的親人對逝者懷有足夠的思念，那麼逝者就可以在除夕的那天，從天堂請假回家，與親人團聚。 我們之間隔得實在太遠，那是書信無法送達的遠方，那是夢也傳不過去的彼方，那是…天堂與人間。 【情感x沉浸x治癒】 ======⚠️感受有劇透真真真相啊⚠️======= . .. ... .... ..... ...... ....... ........ ......... .......... . .. ... .... ..... ...... ....... ........ ......... .......... . .. ... .... ..... ...... ....... ........ ......... .......... 【角色：宋偉山】 一個咩都唔講，以為就係為人好嘅大直男角。 童年死爸爸，被媽媽含辛茹苦拉扯長大，娶到個好老婆，佢做警察收入微薄，全家靠老婆做生意辛苦養家先買得起樓 中年死媽媽，然後同老婆一齊睇住一對仔女被人插十幾刀死，然後間屋又燒咗，被老婆憎恨而離婚，但犧牲家庭盡忠職守嘅結果係被市民厭惡網暴，被迫離開認真做大半輩子嘅工作。 即使最後一幕想俾返good end，我都係覺得好搞唔掂。 ／ 我嘅坐角實在有太多問題，佢嘅選擇、經歷、掙扎同結局都有種即使不符人情亦要強按我頭迫我硬食嘅感覺。經歷網暴同後面網民又重新讚美返我果part係最難以接受，尤其個角本身就為咗救廣大市民，白白睇住仔女慘死眼前，都仲要因為猶疑果幾分鐘被人網暴造謠，認真做警察守護人民大半輩，失去一切，但被人民所討厭同恐懼，甚至造謠佢係殺人魔，搞到佢臨近崩潰。有種被精神強暴嘅感覺，所以後面想轉折返受人民讚揚已經好難代入。 ／ 唔同老婆又唔同女兒溝通，係心裡面講有幾愛有咩用。話就話一家之主，經濟上根本係靠老婆，冇好好關心老婆，兼之冷處理問題😐最難理解係明明咁愛女兒，點解唔早早同阿女講明佢有病，自以為是地守護，其實個女中學大病一場根本就係爸爸害慘，佢從來冇交待病源，個女點會識得自我保護、點會注意飲食，同埋剝奪個女嘅夢想，覺得顏料會害個女生病而唔俾佢畫畫，但其實劇本文字描述上，醫生係講「可能」，係爸爸唔知點解就認定咗。 Btw藝術媒介咁多樣，當油畫過敏咪轉畫水彩，角色學識淺薄唔係問題，但直接迫人接受自己果套真係好無言。 ／ 角色描述上寫得最合情理嘅掙扎，就係自己媽媽跌倒要做開顱手術果段，佢最後冇為咗表面嘅孝順令媽媽活著受苦，想媽媽一路好走而簽放棄治療，但因為好痛苦，而需要老婆握住隻手一筆一筆簽名，係我相對較欣賞嘅一幕。 ／ 呢次店舖體驗完全激發我作為天蠍座嘅本我🦂第一次寫後感寫得咁mean👿但其實呢個版本我已經修飾過用詞，同刪咗當下嘅意氣說話😗