🎭劇本殺27th──《花與愛莉絲》 👥️玩家：7位 ⛺️店家：@thetimes.larp 🗣主持：Lung ／ 係時空嘅獨家本，故事情節推進嘅過程到結局都好睇，然而我個人對部分手法上的解釋覺得不大合理。主角群共通之處都係有複雜麻煩嘅原生家庭問題，對角色個性都造成深深影響。 份本還原順利與否亦只睇互相分享同察覺細節嘅情況，團友之間無須隱瞞欺騙。過程都有跡可循，睇點樣聯繫前前後後已知事情，有敏銳嘅團友好早察覺到屬於自己嘅真相，厲害！ ／ 劇本簡介： 【花與愛莉絲】 「 致我們卑微的理想和缺憾的人生。」 貧困的小鎮、死寂的街道、隨處飄飛的廢紙和街角的野貓…… 在日本經濟危機的浪潮下，7名落魄的少年少女就這樣在福島縣一個普通的小鎮長大。 在這裡，沒有溫情和浪漫，有的只是冷冰冰、充滿金屬味的現實：父母酗酒、校園霸凌、失去了希望的未來和空蕩蕩的家。 但某天，兩名漂亮又出眾的女孩突然搬到了鎮上，如同一抹絢麗的陽光，為7名少年少女黑暗的生活照進了一絲溫馨和夢幻。 花和愛莉絲究竟是何許人也？ 【推理x還原x日式】 ======⚠️感受有劇透真真真相啊⚠️======= . .. ... .... ..... ...... ....... ........ ......... .......... . .. ... .... ..... ...... ....... ........ ......... .......... . .. ... .... ..... ...... ....... ........ ......... .......... 【角色：星介】 ／ 係精彩嘅還原本，有陌生網友感覺，又係一個大局佈置，不過愛莉絲冇預想有6個人節外生枝搞亂晒計劃。到B本發現主角六人既係弱者，亦係惡人，多咗嘅一人原來真身一早被殺死，留係度嘅只係六人組嘅想像。 最後，愛莉絲在良彥幫助犧牲下報復全員， 花與愛莉絲從此過幸福生活，Happy End?! ／ 睇A本描述時，我一直諗緊愛莉絲係咪ASD，佢係天才無容置疑，但人際交往上情緒冷漠，有種直來直往的感覺，不過後面劇情有見到佢喺感受上嘅其他變化，後記交待佢更多訊息時，見愛莉絲對為佢出頭而被殺嘅宮本有懷念、同佢17歲時曾經為良彥誕下嬰兒，都見到佢柔情嘅一面，前面大部分只會見到佢理性嘅一面。 ／ 憑感覺而言，還原同推理比例似7：3，前大半部分都會係還原，還原小熊事件、主角成班人嘅各自家庭問題、鎮上同K中裡面發生嘅事，同最重要嘅體育館事件，諗起團友「分頭」行動嘅形容，仲係覺得幾好笑🙊 體育館有反轉其實大家都察覺到，知道真相有另一面，而反轉都寫得好。前面一直係惡霸六人組虐待愛莉絲，被精神失常嘅愛莉絲反殺，但最後反轉事實就係學校同家庭飽受折磨嘅弱者主角六人組都因為各自嘅陰暗想法，變成對愛莉絲嘅施虐者，佢地殺惡霸六人組然後屈落愛莉絲身上都唔意外，而當佢地選擇殺埋完全無辜嘅管理員冬彥大叔黎掩飾，佢地完全成為惡人。 ／ 成個故事嘅好多角色都係兼具受害者同加害者兩重身份，就算係花與愛莉絲兩姊妹，本身搞咁多事都係想向惡霸六人組雄也佢地報復殺父之仇，而良彥最後殺主角六人組，亦係為心愛嘅愛莉絲同死去嘅父親冬彥報仇，同埋用私刑亦係知道未成年保護法只係縱容惡人苟活。 幾唏噓嘅一個後記細節，係dm口中交待，就係主角六人組死咗之後，各自嘅原生家庭都唔care只係想傾賠償想要錢。主角六人組嘅成長環境令到佢地嘅陰暗面年復年咁增加，有些人甚至只係因為嫉妒就想愛麗絲死。 星介就係以為愛莉絲殺咗女朋友花而想佢死，佢初戀就已經因為俾惡霸欺凌而自殺死，可能因為咁而當誤以為花係被愛莉絲所殺時，佢只想報復(其實呢個真係難怪星介誤會，本身花同愛莉絲就係刻意營造兩人感情惡劣嘅假象，花後面又扮失蹤黎等復仇大計進行落去)。後面佢成為咗酗酒又欺凌初中生嘅人，完全變成咗佢曾經最討厭嘅人─果個酗酒後家暴佢嘅爸爸。不過，睇後記我諗花都真係對星介有過好感，向愛莉絲提起星介時係覺得佢好好，如果星介知花其實冇死可能命運會改變。 ／ 臨尾會有單密室殺人事件，陽子護士之死似係良彥醫生意料之外嘅事，佢對愛莉絲係真愛嘅話，如果知道主角群對愛莉絲起殺意，應該會將防禦措施做得更好。但我都係疑惑兇手著住件係雪櫃拎出黎嘅外袍(10°C或以下)，係咪真係可以足以避開攝像頭？同埋佢殺完人兼推門嫁禍不成，仲要係門口再整茶杯裝置扮密室，呢段時間人體溫度唔會令件外袍提升？表面溫度高過10°C嘅大物體，會觸發熱感應嘅攝像頭。如果件袍溫度整得太低黎避熱感應加保留時間作案，兇手自己應該會凍傷，咁都係留低好明顯嘅痕跡。 同埋隻狗狗驚陽子，就算兇手著陽子嘅袍，隻狗唔敢吠都可以避走，真係會一覺訓天光訓得咁安穩？狗狗一動係會觸發攝像頭，兇手唔對狗狗落安眠藥驚留低證據，佢睇黎真係好放心隻狗會唔吠唔郁...... 其實，對真相嘅作案手法我係覺得有啲犯駁，但對真兇嘅推論係建基於邊個最有可行性施行呢種作案手法，所以真兇推論係冇問題，唯有當真兇就係咁衝動，諗到就去做，咁啱又事事如佢意咁發展成功殺咗人，只係佢認錯咗想殺嘅對象啫🙈 ／ 😂同埋我覺得兩姊妹借一樣嘅書，然後書上有橡皮擦痕跡係擦對方留言都係唔太合理，寧願話佢地係本書上做筆記算啦...佢地係住同一間屋，有咩重要事想講，係屋企傾就ok，如果坐飯廳驚俾人睇到佢地融洽嘅畫面，喺睡房細細聲講/紙上談兵唔得？ 雖然話係校園佢地唔可以主動同對方交流，但借圖書黎喺學校交流都有難度。首先問題係花還完書之後，愛莉絲都隔一陣去借，如果花有訊息留俾愛莉絲，唔驚呢段真空期俾同學拎黎睇到，同佢地一借就分別借好一陣子幾個星期幾個月咁計，咁點樣算係校園內互傳訊息？🙈明明佢地每晚返緊同一個屋企，關門拉簾就已經交流到，用得著借本書黎留言...... 我欣賞故事係環境對人性做成陰暗面嘅敘述，但硬係有啲手法上嘅解釋其實我接受唔到😂