Əfsanə şou nəhayət və çox təəssüf ki, başa çatdı! Ümumiyyətlə, Azərbaycanda bir tabu var: “Bizimkilər görən iş nə olasıdır ki?” Bu layihə həmin stereotipləri darmadağın etdi. 🔥 Bu 10 həftə ərzində hər bir iştirakçının ifasından tutmuş səhnəsinə, geyiminə, xoreoqrafiyasına, mahnı seçiminə, aranjmanına və ən əsası personaj seçiminə qədər hər detalın necə peşəkarlıqla hazırlandığının şahidi olduq. Hər maska açıldıqca mən daha da mat qalırdım. O qədər gözlənilməz personajlardan, onlarla tamamilə əlaqəsiz görünən şəxslər çıxdı ki, inanmaq olmurdu. Düşünürdüm ki, axı bu səsin sahibi necə bu insan ola bilər? Başlayım mənim favoritlərimdən — Pələng, Pişik və Qıratdan. Finala layiq hesab etdiyim iştirakçılardan biri məhz Pişik idi. Şölə xanımdansa daha çox Aysel Teymurzadə və Samirə Əliməryəm ehtimalları üzərində dayanırdım. Pələng isə bir-iki ifadan sonra kimliyini artıq bəlli etmişdi. Qırat isə finala qədər içərisində Çingiz Mustafayevin olduğuna əmin olduğum personaj idi. Finalda isə İlkin Dövlətovun zil səsini tanımamaq qeyri-mümkün idi. Məncə, münsiflər heyətinin dəyişilmə vaxtı çoxdan çatıb, hətta gecikib. Xalq yekdilliklə Nigar Camalı o kürsüdə görmək istəmir. Çünki onun biməzə zarafatları, məntiqsiz təxminləri və mənasız söhbətləri həm öz imicinə zərər vurur, həm də şounun səviyyəsini aşağı salır. Kamiləni isə müəyyən mənada intellektual səviyyəsi, düzgün nitqi və səhnə enerjisi vəziyyətdən çıxarır. Coşqun isə, təəssüf ki, Nigar kimi bu şounun məntiqini tam dərk edə bilmir. Hesab edirəm ki, şou-biznesə hakim olan, səhnə işığına sahib və sərrast nitq qabiliyyəti olan məşhurlarımız arasında həmin kürsüdə əyləşməyə daha layiq şəxslər kifayət qədərdir.Sevimli sənətçilərim Faiq Ağayev və Murad Arifin peşəkarlığı və zəkasına isə söz ola bilməz! Bu cür səviyyəli və zövqlü verilişlərə televiziyamızın çox ehtiyacı var. İstedadlı sənətçilərimizi fərqli tərəflərdən həm bizə, həm də onların özlərinə tanıdan İTV komandasına təşəkkürlər!