感謝大數據介紹，成就咗一場極限即日來回首爾嘅奇妙之旅。凌晨2點機出發，夜晚8點回程，就係為咗睇呢套 긋모닝 흥콩 （香港早晨）。 全劇以紀念哥哥張國榮為主軸，故事講述一班喜愛張國榮嘅韓國人，係19年6月嚟到香港，透過翻拍電影經典場面紀念哥哥，點知途中遇上19年社運，雖然拍攝不斷被迫中斷，但意外見證住一個又一個令人難以啟齒嘅時刻，作為遊客都忍唔住嘆息何解香港變成咁。 故事穿插咗英雄本色、倩女幽魂等劇情，說來慚愧，作為香港人都未睇曬哥哥嘅作品，反而韓國人背到滾瓜爛熟。最令我佩服嘅係，無論係舞台道具、服裝、抑或佢哋嘅台詞同口號，都99.9%還原咗當年社運場面。每個場景，每句口號，演員沾滿血嘅衣著，滿地滿牆嘅slogan，都將我帶返去2019年。 睇完之後，我會話絕對值得付出呢個時間同金錢到此一遊，睇到韓國演員好努力講好廣東話台詞，好努力呈現返當時嘅事情。基本上一入場已經眼濕濕，當今日嘅香港越嚟越陌生嘅時候，有人係異國將香港毫不保留地帶俾當地人。引用劇中一句台詞：「只要有人繼續講呢個故事，『香港』就會繼續係度。」 只係冇諗過，繼續說香港故事嘅人，竟然係韓國。 未睇嘅，聽唔眀都極力推介。 // 最喊到停唔到嘅moment係，原本只係介紹潮鞋嘅韓國kol 幾經艱辛買到哥哥著過嘅Nike波鞋，點知一場混亂中係示威區整唔見咗其中一隻鞋，最後熱心嘅香港人都幫佢搵返呢隻鞋，即使自己身受重傷，都要親手將波鞋交到呢位kol手上，更為波鞋沾滿鮮血感到抱歉☹️ 即刻喊到決堤… 呢套話劇係2022年12月第一次演出，當時只係公演咗大概10日，24年9月重演咗3個星期，而今次重演則為期1個月，更剛好搭正哥哥死忌重演，唔知下次仲有冇機會重演，所以諗都冇諗就衝咗去睇。 📍세실극장