終於有一次可以睇完本書即日做record 繼續係韓國文學系列 今次係非常唔同面向嘅作品 早就見識過呢本書名 因為太特別太難以理解所以印象深刻 上個禮拜喺圖書館意外見到 用咗三日就完讀 讀正文之前有各界推薦同導讀 見到不只一個人話睇到落淚 當時我憑住佢哋嘅隻字片語同書背嘅簡介 自大地覺得： 呢啲內容 不至於搞喊我掛 結果 呢本由四個故事組成嘅中篇小說 每一個故事讀到最後我都不能自控地心痛到喊 我唔係讀愛情嘢容易喊嘅人 比起愛情 親情友情同寵物情更容易觸動我 對上一次因為感情線而喊而書好似已經係五六年前嘅英文小說 粗暴嘅總括：呢本就係講述分手故事嘅小說 作者係朴相映 主角姓朴 叫映 用第一人稱寫 好難唔將主角代入為作者本人嘅故事 一邊睇一邊覺得： 啊作者真係一個好差勁嘅人 點解可以咁樣過日子 啊作者嘅日常真係好糜爛 啊作者咁做絕對係一個渣男 啊作者⋯⋯唉 睇完第一個故事〈在熙〉就已經覺得佢就係我最中意嘅一篇 睇完全本書之後都冇改變呢個想法 映係生理男性 同性戀者 在熙係生理女性 異性戀者 映嘅大學同學兼三年室友 佢哋兩個之間嘅感情好微妙 好親密 而且無以名狀 冇任何一個名詞可以適當準確地形容佢哋呢種關係 （絕對唔係曖昧 完全沒有一絲愛情嘅成分） 甚至中文書名完全就係為呢個故事而設： 在熙—主人翁 燒酒—映同在熙都係重度酒精愛好者 我—映本人 全書主角 冰箱裡的藍莓與菸—在熙會買藍莓畀映食 映為咗報答在熙就會買菸送畀在熙 擺喺雪櫃 因為在熙中意凍冰冰嘅菸嘅感覺 啱啱講咗 呢本係講分手嘅書 所以在熙都不例外 都同映分咗手 因為在熙要結婚 要脫離呢個同居室友 第二個故事係我睇到最一頭霧水嘅 但好多人都盛讚呢篇 主要係 我完全唔get映嘅呢位戀愛對象 反而我更focus喺佢同母親之間嘅關係描寫 映對呢個世界有好多不滿 從佢嘅反叛同幾乎沒有嘅貞潔可以反映出 而呢一切佢歸咎於自己嘅母親 到佢阿媽癌症末期真係死到臨頭嘅一刻 佢最最希望嘅係聽到阿媽嘅一聲道歉 非常可惜地 「媽媽完全不給我任何可憐她的機會，簡直太有才華了。」 最後兩章其實都係同一個故事 關於我最中意嘅角色：奎浩 一個可愛單純率直勤力但少少蠢嘅人 當然最後都係分咗手 呢段已經係呢本書裡面窺探到嘅映嘅唯一一段稍微正常少少嘅愛情關係 睇到最後不斷喺內心問如果同點解 點解唔聯絡？點解唔追？ 如果有會點？ 映嘅生活非常糜爛 如果唔係將佢嘅呢啲經歷寫成呢本咁出色嘅書 可謂人生一事無成 人生幾乎只有酒精同性愛 啊 冇錯 性愛係呢本書一個頗重要嘅元素 但絕不色情 因為只係平淡地誠實地描述映呢個人嘅日常 而做愛就係佢嘅日常 （同時）輾轉於不同男人之間就係佢嘅日常 毫無鬥志 污糟邋遢 非常不討喜嘅男主角 甚至讀到佢感染「凱莉」嘅時候有一刻覺得佢抵死 一刻咁大把 但係 作者實在非常成功地將映嘅悲傷不著痕跡地滲透出嚟 導致每一個故事、每一段關係嘅結束 都牽動到讀者嘅情緒 前面有幾好笑 後面就有幾悲傷 係真係覺得心痛嗰種 必須闔埋本書喊一陣發洩下先嗰種 唔知點形容呢本書 好神奇 第一次睇咁真實嘅描述同性戀者喺當代社會嘅情感生活嘅小說 真實到我冇辦法不相信呢個就係作者本人嘅經歷 同時唔希望呢個爛人映就係作者本人 愛情小白居然可以睇呢本分手書睇到喊 真係好厲害 睇完先明推薦序同導讀啲人講乜 因為自己都親身感受到了 擺雪櫃嘅藍莓同煙 我應該會記一世 🧡 9.6/10