每次經過書店，總見《解憂雜貨店》穩佔暢銷榜前十，加埋東野圭吾呢位日本懸疑大師嘅名號，令我一直都對呢本書好好奇。某個晚上，我終於拎起咗呢本書，就發現咗佢唔單止有懸疑嘅刺激，仲有種溫暖療癒嘅感覺，夾雜住一啲人生哲學，真係一本幾特別嘅書。 從嗰晚開始，我每晚臨瞓前都好期待匿喺被入邊慢慢睇呢本書。每次睇到攰攰哋，闔上書嘅時候，全日積壓喺心頭嘅不安，都被書入面嘅故事神奇地咁撫平咗。 相較於好多療癒系作品常顯得節奏緩慢、情節平平無奇，呢本書的節奏反而拿捏得恰到好處，而且每個篇章都細膩描繪了一位角色的煩惱，讀到你可以好自然咁投入佢哋嘅世界。喺作者揭開謎底之前，我總係一直喺度諗「究竟發生緊咩事？點解會咁？」直到最後，所有角色的故事環環相扣，彼此交織，解憂雜貨店的運作方式先漸漸浮現，睇完有種「原來係咁！」嘅滿足感。 如果你都有啲心結未解，不妨試吓閱讀呢本書，話唔定會搵到屬於你嘅答案。 冇劇透引文分享： - 「通常諮詢者心裏已經有了答案，找人諮詢的目的，只是為了確認這個答案是正確的。」 - 「我發現我的答覆之所以能夠對他們有幫助，是因為他們自己本身就擁有正確的心態。如果他們沒有想要認真生活、努力生活的態度，無論別人回答什麼，恐怕都幫不了他們。」 - 「如果說，來找我諮詢煩惱的人是迷路的羔羊，通常他們手上都有地圖，卻沒有看地圖，或是不知道自己目前的位置。但我相信你不屬於任何一種情況，你的地圖是一張白紙，所以，即使想決定目的地，也不知道道路在哪裏。地圖是白紙當然很傷腦筋，任何人都會不知所措。但是，不妨換一個角度思考，正因為是白紙，所以可以畫任何地圖，一切都掌握在你自己手中。你很自由，充滿了無限可能。這是很棒的事。我衷心祈禱你可以相信自己，無悔地燃燒自己的人生。」