其實我耐唔耐都會搵啲陸劇睇下，睇得唔多但慶幸都唔差，例如《三十而已》、《玫瑰的故事》。之所以會開呢套《許我耀眼》係因為一直覺得女主趙露思幾有性格同埋靚女，而且劇集開播之後竟然冇批評陳偉霆演技嘅評論，就覺得可以試試佢。睇完之後嘅感覺係：咩現家家人們鍾意呢種「霸道總裁」？ 同霸道總裁戀愛從來都係歷久不衰嘅題材，所以講真嘅，應該荼毒咗唔少少女。但更年女權主義下，大家都覺得女性唔再係依附男性嘅附屬品，有能力追求自己想要嘅嘢。而亦都係咁，呢套劇都好正確地將女主角描寫成一個有能力，有野心，有追求嘅人（呢一點亦都好符合大陸嘅「反躺平」方向）。對於女主角嘅設定，我ok嘅，覺得趙都做到角色性格嘅。但係，陳作為男主角，做一個富二代，有見識有學歷有計謀、口硬心軟嘅霸道總裁，前面講到嘅角色設定，睇完劇集只係覺得口硬心軟呢一方面係表現到嘅，至於見識學歷計謀，就真係從陳嘅演繹中睇唔出，反而有種小朋友扮成熟嘅感覺。我個人唔反感嘅，只係覺得有啲好笑同埋「幾cute喎」。見到大陸網民似乎幾buy陳嘅「總裁感」，就知點解陳喺大陸可以咁紅，而喺香港就星路平平。 而故事上，知道劇集係改編自小說（網絡小說定真係一本書就冇太多考究），個改編都好似係幾大。原著係sad ending，劇集就TVB天台BBQ happy ending。雖然冇睇過小說，但劇集後面好多轉折同「高潮」都睇到我「吓？咁咋？/唓！都估到係咁！」 好多明明其實唔係咁容易解決嘅事，竟然一兩句說話都搞掂咗。唔係話唔得，但咁樣我真係唔覺得角色們有幾困難重重，有幾迎難而上囉。 好彩劇集定位係都市愛情，唔係咩勵志故事，我總唔能夠期望一套都市愛情嘅劇集講到啲咩大道理同感動人心。再者，如果個劇本真係咁有深度，男主應該唔係陳生嚕。