🤣人生第一齣睇嘅泰國影集(暫時到依家未睇過其他泰戲，泰國電影有睇過幾部)，然後當時睇完寫咗太多嘢，因為完全冇預期佢嘅劇情走向係咁，覺得太驚訝！ 佢開頭係喜劇加愛情，後面忽然提昇層次到反烏托邦(但係合理嘅)，包含嘅元素遠超我想像，多種情感都有涉足，個劇本係我前所未有見過咁貪心想寫咁多嘢🤣搞到我果時睇完都寫咗好多字嘅感受。 ==========劇透線=========== 🙈話說我最近睇緊一套泰劇(全套6集) [廢話] 因為我又想睇番啲英文劇，避免自己英文廢過頭，所以我有開番netflix，不過改左唔用信用卡，用payme俾就可以更好控制係咪每個月都要交錢。因為想睇啲唔用腦嘅英文劇，所以即使我見到House，有興趣睇(以前明珠台叫醫神果套)唔敢追睇，醫療劇英文好難明，我將目光轉成戀愛劇同曾經睇過嘅劇，可以轉用英文食飯時睇下，例如“The end of fucking world”,“You”,“Sex education”...戀愛劇啲英文會比較易明或者叫易推測... [正話] 呢套“Ready Set love”雖然係最新嘅泰劇，但Netflix有英文配音，所以我用英文聽同睇英文字幕，好彩仲睇得明，而且比想像中好睇。 以為係套純戀愛喜劇，但原來有反烏托邦背景元素， 意外得黎但又好吸收。 但個故事設定本身就好特別，因為全球男性人口急降，於是政府以提供更好的照顧為理由，圈養了所有男性，而那個地方叫“The Farm”，聽名已經諗起另一套漫畫“約定的夢幻島”。 係Farm裡面嘅男性係“Gentlemen”，係受政府監管下係Farm成長同生活，長大後參加“Ready Set Love”呢個節目同其他女性配對結婚。 [更多嘅廢話+劇透] 節目中5個Gentlemen，有1個好冇存在感完全唔記得名，但其他4個都有自己嘅明顯故事線。 Son，係第一男主，細個時曾經嘗試同爸爸一齊逃離Farm但失敗(雖然現有線索營造到爸爸好似死咗咁，但我又覺得可能有反轉都唔定)，於是同細個嘅女主角Day見過面被佢所幫助，大個後係節目重遇。所謂SonDayCP會係劇情主線。 Max，一個好鐘意除衫show off胸肌嘅男配，係節目裡面鐘意Chanel。Chanel係organic girl嘅設定，即係係Farm裡面長大嘅女仔，完美人設樣樣強，但因為家庭背景承受好大嘅壓力，與其話佢係鐘意Son，係因為佢媽媽已經規定咗佢要同Son係一對，佢根本唔會去諗有冇其他可能性嘅存在，所以我覺得佢後期劇情如果覺醒，想要返自己嘅人生，會同Max一齊都唔定。 Almond，係意外嘅一條線，5個中嘅溫柔大哥哥，由一開始就鐘意Day。但意想不到係佢係Day嘅best friend Valentines嘅親哥哥。Valentines係節目工作人員，但佢入劇組係為咗完成媽媽心願，搵番親生哥哥令佢同媽媽見面，佢呢條線會見到節目下隱藏嘅黑間，但設定同所有烏托邦故事設定差唔多，政府為左令所有事係掌握之內，會設定好多唔合理嘅規條，基層得到嘅遭遇係唔公平。所以Valentines媽媽係一生咗第1個仔，仔仔就被政府抱走咗，然後被迫食藥改變精神狀態。 Paper，係更加意外嘅一條線，佢係一個唔知現實殘酷嘅忙內小弟弟，以為佢係同Chanel嘅好朋友Bovy一條線，但估唔到原來呢條線係用黎揭示呢個世界觀之下掙扎嘅一班人，即係有班男人逃離Farm隱居生活。因為Bovy介紹之下，Paper聽到一個叫Chun嘅男人主持嘅神秘電台，先萌生想離開Farm出去睇下世界嘅衝動。最重要嘅一點係Paper以為自己鐘意Bovy，但Bovy令佢明白佢嘅鐘意唔係心動，甚至同佢講你可能係鐘意男仔，所以佢離開Farm應該係想同Chun見面。 女性角色嘅故事，主要圍繞Day，Chanel，Bovy三位女參賽者，同Valentines，Jenny呢兩個重要配角。Jenny係les，亦係呢個節目製作人，佢本身係服從Farm設定，但係佢同醫生情人秘密懷孕嘅寶寶性別係男仔，似乎令佢產生動搖。所以當佢就算知道Valentines嘅故事，佢都冇舉報佢，或者踢佢出呢個節目，而且佢似乎都好厭煩MsKwan嘅控制。(MsKwan應該係呢個政府重要人物，亦係Chanel嘅親生母親。)估Jenny係後期劇情有好重要嘅推動作用，而且佢可能為左肚裡嘅BB，選擇同逃脫嘅男性組織合作都唔一定。 我起初以為呢一個係純粹嘅喜劇，依家佢雖然以喜劇為基調，冇話係要令到個故事變得沉重，但適當時機係會令你得到一啲訊息，可以再深思。 ==========結局劇透=========== “Ready Set Love”結局後感追加 兩個我最喜愛嘅角色係女配們，Bovy & Chanel。 1)Bovy 係最好嘅朋友，亦係我最喜愛角色。佢默默幫助朋友不求回報，一個係由細識到大嘅朋友Chanel，一個係節目中成為音樂知己嘅Paper，就算有一關佢明明可以贏，佢知道Chanel嘅家庭背景，選擇咗俾Chanel贏，希望Chanel可以為自己而活。佢自己本身係鐘意Max，但佢知Max同Chanel互相鐘意，所以Chanel最後揀Max嘅時候，佢係真心替佢地開心。而且冇佢嘅引導同介紹，Paper唔會知道Farm嘅真相，亦唔會意識到自己係Gay，Paper就唔會搵到自己鐘意嘅人。呢點唔難理解，Paper被Farm教育長大，思想上受局限，佢唔會去有個諗法原來自己對女仔從來唔感興趣，係因為自己可以鐘意男仔，就好似Day第一集係男厠做出嘅失禮行為，係因為佢來自Farm外面嘅平民世界，所以根本冇男女厠嘅認知(故事世界觀設定人口99%都係女性)。 2)Chanel同Son係青梅竹馬，佢對Son從來唔係男女之情，佢從小到大只係想得到媽媽嘅認同讚美同關注，所以要求自己樣樣完美，直至媽媽第一次直接讚佢，只係因為佢同Son可以係一齊，佢其實覺得好空虛好難過，以前付出嘅努力根本冇用，呢個時候安慰佢傾聽佢真正心聲嘅係Max。最終Chanel贏咗比賽，遵循內心揀左自己所愛亦係被愛嘅Max做終身伴侶，算係故事中幸福嘅人，佢有愛人，有好朋友Bovy，有錢，亦有愛佢嘅家人(爸爸)。結局佢被媽媽摑了一把時，勇敢同媽媽講“我知道你好失望，但你要習慣呢件事，我只會選擇我所愛的人結婚”，真係好好睇。之後佢同爸爸傾訴心聲，我係幾感動，爸爸同佢講“你令我感到驕傲，唔係因為你贏咗比賽，係你有勇氣選擇自己想要嘅生活”，而且爸爸仲勸Chanel唔好太嬲媽媽，因為媽媽呢一生都係同佢唔愛嘅人生活(即係佢自己)，所以佢係用佢嘅角度去俾我地最好嘅生活。當Chanel問爸爸‘“你唔覺得疲倦嗎？”，爸爸回應“我知你同我都好疲倦”，然後兩父女默言相擁果幕真係好感動。 3)Jenny如我所料倒戈相向，幫助主角一群人，並且同愛人同肚裡嘅BB搬去地下組織City Ground生活，Paper，Day，Son都一樣去左City Ground，主線SonDay開心快樂生活就係想當然嘅結局，而Paper最後係同Chun互表心意一起了。我覺得很難得的一件事，係呢套以戀愛喜劇形式包裝嘅劇，裡面隱藏嘅深意有咁多，而且即使係異性戀嘅主線下，配角線另有三條多元化的CP。 主線SonDay係一般男女配，去了City Ground生活，Day患病嘅妹妹都平安冇事，4年後兩人仲有一個兒子。配線Max同Chanel，都係男女配，係決賽後留係Farm嘅生活冇顯示，但如果有下一季，Chanel會係好大嘅助力改變Farm。 劇裡面有兩對同性CP，一對les CP，Jenny同佢嘅醫生女朋友，佢地係專業又成熟嘅CP，而且應該係以人工方式有咗小朋友（但都唔排除可能其實呢對CP有個係跨性別）。如果唔係因為Jenny有嘅BB係男仔，佢為左可以同愛人親手養育自己嘅小朋友，先選擇幫忙組織。另一對係Gay CP，Paper離開Farm後同Chun一齊，享受自由嘅生活。Paper係Gentlemen最年輕果個，所以佢明顯對Farm真相係難以接受，表現最激動果個，但一旦明白真相就會想逃離。 值得一提嘅Bovy，我估計佢係雙性戀，雖然佢係一直鐘意Max，但佢係引導Paper思考時，有提過自己有幻想過同女仔Kiss，而且佢敢提出Paper喜歡男仔嘅可能性，除了可見佢係一個敢於想像同探索嘅人，亦見到佢某些同性嘅戀愛傾向。 點解會想講呢件事，我覺得係亞洲地區，係戀愛多元化接受度最高嘅始終係泰國，而且創意表現上都以泰國最優越。即使唔少韓劇劇情都好癲，但唔會夠泰劇多元，韓劇嘅癲都係有跡可尋。台灣係第一個行同性婚姻合法，但媒體呈現上仲係好保守。泰劇之後，比較自然呈現嘅我私心覺得係日劇。 4)又繼續去返套劇，5個Gentlemen，有個好冇存在感嘅原來係Jin，作用係劇情工具人，係冇咩特別嘅，畢竟係節目中需要有人out，有人輸，有人唔小心講咗秘密，就係四眼仔Jin負責，呢位演員抽到呢個角色，冇任何發揮空間。 Son,Paper,Max情有所歸，我最意外嘅係Almond嘅編排，佢會背叛主角一群人唔難估，因為佢嘅設定係喺Farm生活得最耐嘅大哥哥，所以佢嘅思想受Farm影響最深遠係好合理，比起素未謀面嘅家人，佢嘅認知中Farm真係佢嘅家，而所有Gentlemen係佢嘅兄弟，所以佢先想保護家人，佢覺得離開Farm唔係一個好嘅選擇。我真正意外嘅點係佢同Valentines相認後，亦知道佢原來有個媽媽，而親生媽媽一直冇放棄搵番佢，佢雖然感動，但最後都係選擇唔離開Farm，“Farm is my home”，因為長年累月嘅生活令佢被同化咗，但冇人會指責佢，Day只係同Valentines講“我地要離開啦，佢已經做咗佢嘅選擇”。 5)所以套劇唔係Good Ending啊～Farm個system有冇改變到係唔知道嫁，情況就同hunger game差唔多，女主角同男主角厭倦一切，選擇隱居嘅平凡幸福生活，然後有自己嘅下一代。但套劇係有留伏線嘅～