最近見到我媽咪係度睇《贅婿》，我先醒起呢套我都睇過。 因為郭麒麟參與某季密室大逃脫做常規主持時，我果陣好欣賞佢，覺得佢係比外表更有智慧嘅人(我係認真讚嫁🤣)，所以見到呢套佢第一次擔正做男一嘅戲就睇咗。 劇情算高開低走，其實前面搞笑成份比較多，係幾好睇嘅，佢演嘅男主係現代商人穿越返咗古代做贅婿，睇佢點樣係古代運用商業頭腦。 但中後期加入極多黨派權謀，戰爭死人嘅情節後，就開始變調，而且劇情愈黎愈拖，就愈黎愈唔吸引，2倍速都唔多頂得順。 仲有個欣賞之處係，電視有比小說更合理嘅改編係男主對妻子一心一意，從來冇娶妾之心，雖然叫做有幾個紅粉知己，但都冇做過親密舉動。反而小說男主明明係贅婿身份，可以娶幾個女人就有啲反感(其實我冇睇小說，只係有睇人分析)。 我妹話男女主好冇CP感，因為佢地係《慶餘年》好似演姐弟，所以呢套變夫妻好難代入。