重post紀錄 ======================== 電影原來真係改編自我認知嘅日本電影， 中國版同日本版嘅主題性係一樣， 但女主角嘅性格同遭遇都有唔同咗。 賈玲一年內減肥50KG固然好震撼， 但佢的確冇將呢件事當做sellingpoint不斷放大， 佢係訪問都有提過想觀眾留意電影主題。 賈玲嘅綜藝有睇過，導演嘅戲未睇過， 雖然知道前兩套都好出名， 但呢一套特別有印象係因為首主題曲加MV。 所謂“贏一次”唔係比賽上嘅輸贏， 係比賽結果上點都係輸左，仲要捱打得好慘。 因為無論中日版，女主角就算幾努力訓練， 都不過係新手上場，冇贏係件好正常嘅事， 但佢地嘅“贏”亦唔係單純阿Q精神，自我安慰， 而只係去好努力為自己完成咗一件事， 冇輕言放棄，堅持完成。 中國版女主角杜樂瑩比賽後，終於識得為左自己而拒絕人，講出自己真正想講嘅事，唔再係為左迎合他人而勉強自己。 片尾有賈玲真實訓練嘅片段，同專業拳擊手認真比賽一次嘅片段，仲有減肥後嘗試兌現自己承諾去電大波浪著晚禮服嘅心願，不過髮型師話因為係海邊影相大波浪吹唔起，所以反而幫佢拉直咗頭髮，但佢話唔緊要，以後仲有好多機會。 但我始終唔明點解戲名叫“熱辣滾燙”，英文名“You only live once”倒配合主題(btw日文版係100日圓的愛)。 最近幾次睇戲始終都係不得安寧，唔同戲院都係咁，😅運氣問題遇唔到稍為考慮下他人嘅同場歡眾。 P.S.我覺得度宣傳語嘅人唔係真係咁清楚套戲嘅意思，“扭轉命運，一拳翻身”唔係電影情節，我相信亦唔係導演想講嘅訊息。 女主角樂瑩善良待人卻遭遇種種打擊，連跳樓自殺都死不去(因為係4樓加有障礙物加樂瑩太肥)，自殺呢part係中國版有但日本版冇，呢部份自然有唔合理嘅地方，但大概明白樂瑩對白話明明好痛點解冇傷口嘅意思。 因為女主角性格比較內向，唔會直接表露自己好受傷，親情、友情、愛情都一而再遭受打擊。 最後佢打完拳賽，佢嘅命運其實冇咩大改變，佢依然係一個人，但今次係佢自己選擇，佢冇接受到前男友嘅示好，然後打住拳繼續行返屋企。 佢係冇“翻身”，佢嘅物質生活完全冇變好，有嘅只係心態上有改變，佢願意為左自己繼續行落去。