《紙嫁衣6千秋魘》後感（上） 玩完一段時間，想趁2024年完之前寫番後感記錄， 呢個系列好少令人失望，但今季劇情係幾燒腦。 第6季聯乘番《13號病院》，終於解開晒一切謎題，同見到肖醫生同奚醫生嘅真樣。 ／ 玩《13號病院》果時，我曾經係估計奚醫生已經被肖醫生錯手殺死，所以肖醫生先會接受唔到而幻想自己係奚醫生黎逃避現實，到結尾最後佢見到戴髮帶嘅木偶時，我以為係奚醫生嘅真鬼魂親自黎搵佢。 ／ 但係喺《紙嫁衣6》，終於發現戴髮帶嘅奚醫生由頭到尾都冇死到，13號病院院長做非法人體實驗時，肖醫生協助奚醫生逃離後，奚醫生就係出面收集證據轉交部門，然後佢就返咗黎搵肖醫生。 ／ 肖醫生自己冇成功離開病院，被院長被囚禁情況下，開始精神錯亂，發生襲擊病人同醫護人員事件，之後亦因為內疚感同分辨唔清現實，錯將自己當成奚醫生，模仿佢嘅行為，係咁搵自己，然後見到真正黎搵自己嘅奚醫生時又會將佢當成木偶。(呢段如果唔係有玩前期作品，同本身熟系列玩法，根本搞唔清楚發生咩事...) ／ 直至真正嘅奚月遙失足跌落個大坑，肖馳恢復意識救佢，兩個人先真正同時察覺對方一路而黎嘅存在，我諗呢段係要突顯奚月遙係肖馳心目中嘅重要性。 ／ 最有趣係肖馳意識清醒後，兩個人會不斷毒舌對話，但睇得出係感情好好嘅青梅竹馬。 由於兩個人都係奘鈴村出身，都有過一段童年陰影， 所以打算係村裡面搵線索破解加諸自身所謂嘅詛咒。 係奘鈴村，又見番前作系列著名嘅npc湯婆婆，而反派大巫賢鬼魂被當成換裝娃娃咁黎解任務嘅諗法幾有趣。 ／ 係故事裡面，又會知道更多六葬菩薩同奘鈴村同歷代大巫賢嘅黑暗面，簡單而言，就係想帶出人有各種貪欲，就好容易受邪教控制嘅訊息，有啲似電影《周處除三害》嘅情況。 ／ 今季男女主角嘅原生家庭問題同自己嘅精神病問題，都係受大巫賢同邪教所害，因為肖家同奚家祖先嘅問題，大巫賢就要幼年時期嘅肖馳同奚月遙承擔使命，強硬將千年前害死嘅一對鬼兄妹嘅靈魂轉入佢兩個身上，最諷刺係到結局唔止男女主角唔明白所謂修塔嘅使命係做咩，存在千年嘅靈哥鬼魂其實都唔知修塔嘅真正內容，而現代大巫賢都一樣係唔知道(因為早期嘅大巫賢成日係毒死上一代黎上位，所以好多資訊都會缺失)，我覺得呢個安排其實係好巧妙。 ／ 就係因為經歷咗童年劫難，女主角奚月遙所謂精神分裂，只係佢被人開咗陰陽眼，所以由細睇到其他鬼魂嘅存在，而男主角嘅解離症，係因為靈哥嘅鬼魂入咗佢嘅身體，所以果位殘暴有傷人傾向，造成醫院傷亡事件嘅8歲男童唔係男主角有第2種人格，而係因為佢精神受打擊，身體被靈哥侵佔造成。 ／ 靈哥之所以脾氣暴躁，係因為佢搵唔到自己妹妹，千年之前被父母欺騙，被大巫賢同封建迷信村民害死，然後受困千年，呢段時間都仲有妹妹陪伴，直至現代大巫賢要將佢地轉入男女主角身軀而意外分開，所以靈哥唔信任何成年人，有暴力傾向都講得通。 ／ 肖馳同奚月遙呢對CP幾可愛，希望佢地如字面意思一樣，無論繞再大嘅圈，都會係一齊 ==================== 《紙嫁衣6千秋魘》後感（下） ／ 靈妹嘅鬼魂其實一直匿係肖馳身上，肖馳係童年時為左保護奚月遙，所以主動擋係佢面前，令到靈兄靈妹嘅靈魂都入咗佢身體裡面，而靈妹一直沉睡，甚至忘記自己存在，直至肖馳以為奚月遙死亡後，經常想著她，才令靈妹係召魂儀式時誤以為自己係奚月遙，所以遊戲一開始嘅意識係靈妹本人。 ／ 靈兄靈妹身世非常可憐，雖然靈兄傷害過好多人，但佢其實有知道自己嘅錯誤。當佢想傷害奚月遙時，靈妹終於恢復意識出黎阻止，令靈兄停手，後續佢兩兄妹更一齊協助男女主角避開六葬天尊，逃出生天。 ／ 而果位出場幾個系列作，做咗一連串壞事嘅大巫賢，終於承受惡果落地獄，或者可能變成虛無，我仲記得佢係造就系列作大boss聶莫黎嘅原因，佢危言聳聽聶家父母，拋棄咗雙胞胎裡面嘅大家姐聶莫黎，令聶莫黎長大後對所有人心生怨恨，係第1作開始出黎作害他人。 ／ 明明事情解決後可以good ending，冇諗過故事組筆鋒一轉，變成sad ending，硬生生分開咗肖馳同奚月遙，然後奚月遙係片尾曲一直默默等肖馳返黎，由一開始湯婆婆抱住小白貓係度一齊等，到婆婆走咗，奚月遙自己抱住小白貓，到小白貓都冇咗，奚月遙頭髮變得花白，但仲戴住髮帶堅持等，只係因為佢係因為肖馳先開始戴髮帶。呢個時製作組又跟傳統講XXX沒有受到傷害，雖然今次小奚活下來沒有受傷，但玩家心靈受傷，果晚玩完餘韻好長。 ／ 好彩製作組冇真係咁黑心要奚月遙等一輩子，係最後彩蛋，結合第3季同第4季兩對CP嘅對話，可以知道第5季男主角最後係平安無事，我真係愈來愈喜歡第3季女主角嬌嬌，佢真係一個好善良嘅女仔，寧願自己繼續維持靈魂狀態，都願意去救另外一個陌生人(劇情上佢地仲未認識第5季人物)。最後，兩對CP去奘鈴村搵湯婆婆時，見到係度等肖馳返黎嘅奚月遙，今季故事就停係度啦～ 可見奚月遙等一輩子嘅結局只係另外一個可能性，仲係有一個可能性，就係所有歷代系列作主角結集對抗大boss，同破解奘鈴村詛咒嘅結局。