琪出走記──中上環一日遊🚶🏻‍♀️‍➡️ ／ 行程： 🏮文武廟＞🩺香港醫學博物館＞📺香港新聞博覽館＞🏛大館＞☕️On The Hill Coffee Bar(大館監獄內)＞🛒中環街市＞🍣壽司郎(上環店) ／ 講真雖然係香港生活都接近30年，其實有超多地方都未踏足過(sor其實係我太宅)，尤其港島一帶對我黎講就更加遠，所以都要多謝朋友提議，我先可以幫我腦海裡果幅香港地圖解鎖新地點，今日行程嘅所有地方都係初訪，所以好新鮮，而且同行嘅人都鍾意行博物館實在太好啦！大家會一齊認真睇晒各種展品，玩埋各種體驗遊戲，拎埋免費紀念品，然後又再掉錢加買紀念品！ ／ 醫學博物館固之然吸引，我地行咗2個鐘以上🤣天花同鼠疫呢類同當代民生息息相關嘅展覽係幾好睇，可以得到好多資訊，然後不禁感嘆好多醫學人真心係天才加通才！雖然冇買到器官公仔，但都入手得意嘅紀念品。 ／ 但香港新聞博覽館都好好行，而且係免費入場，佢就喺醫學博物館附近，都係可以順路行埋！本身佢唔係我地計劃之內，但經過就有種好奇心八掛下，裡面涵蓋咗報紙、電視、電台嘅新聞發展，而且有好多珍貴嘅訪問同直播影片，唔同年代新聞從業者嘅一手分享都幾有趣，我真心覺得呢度係可以睇到香港係有過新聞自由嘅證明，亦有好多資料提過政府曾經點樣影響新聞上嘅一啲運作，而當年嘅人係點樣堅持落黎。依家呢個館係自負盈虧，入面嘅職員全部都好好人，呢個館真心值得一去！ ／ 大館已經紅咗好耐，但今日先初次踏足，好大，大到唔知由邊度行起嘅感覺，由於前面行兩個館用咗唔少時間，所以大館嘅展覽應該只係睇咗一半(我估?)🙈前面一直掛住睇展，我係行到去大館先食全日第一餐，間On The Hill Coffee Bar係喺大館E庫監獄裡，我食嘅煙三文魚牛油果醬法包加杯dirty嘅set係幾好味，雖然法包確實幾硬🤣個set盛惠$108，同埋可以坐係古蹟裡面食都幾好。 ／ 中環街市係到夜晚先行，但都仲有唔少店舖逛下，睇下各種香港特色手信，而且終於係手機熄機前租到power bank，跟住去埋附近食埋2026年第一餐壽司郎，結束今日豐富嘅一日😆(雖然我返到屋企樓下，都係忍唔住散多陣步，行多3km左右先返屋企～)