《若問世界誰無傷》 一套一邊期待、一邊喺內心祈禱唔好咁快落畫嘅電影 每次諗起都無法撇除音調同節奏讀出嘅電影名 上映後兩個月 終於睇咗 以下含大劇透 建議一張白紙咁入場 大劇透 大劇透 大劇透 ===== 一句說話總結呢套電影： 「兒童性侵受害者的高中生日常」 重點唔係性侵 唔係受害者 唔係兒童 係「日常」 睇咗好幾篇導演專訪同觀眾評論 有人問 如果香港拍呢個題材 可能就會有浸鏗鏘集味 然後我先發現呢部作品真係完全冇鏗鏘集vibe 《年少日記》——第一下諗起嘅係陰沉灰暗色調嘅小學生坐喺天台邊 《青春末世物語》——第一下諗起嘅係紅色燈光、無線headphone、劃破寧靜嘅電車聲 《黑箱日記》——第一下諗起嘅係主角追著高層跑但不果嘅背影 而呢套《無傷》呢——第一下諗起嘅係主角喺操場同同學打鬧、喺班房同老best拍跳舞片嘅日常 一邊食零食一邊問細佬「邊個準你食零食」、 見到阿媽買咗鮮花但完全唔打理會話「阿媽果然到咗更年期」、 返學、放學、打跆拳道、笑細佬拙劣嘅魔術表演、唱K、拍拖 導演只係將一位韓國女高中生嘅日常拍咗出嚟 而呢位女高中生同其他嘅韓國高中生都冇太大分別 除咗佢嘅兒時經歷之外 冇刻意用好悲情好憤怒好厭世好消極嘅態度去講故事 亦冇將女主角嘅內心世界放到好大 更多嘅係近乎旁觀者角度嘅觀察同呈現 觀眾睇到嘅係主角同家人相處嘅日常、同同學老師相處嘅日常、同互助團體相處嘅日常 而唔係性侵受害者異於一般人嘅日常 睇完之後有好幾個當頭棒喝般嘅反省 首當其衝嘅係主角唔肯簽連署嘅原因： 兒童性侵必然會令受害者留下無法洗刷嘅傷痕、必然會徹底摧毀受害者嘅靈魂嗎？ 經常見到呢類型嘅論述 但我哋好似從來都從受害者嘅角度思考過 好似全然否定佢哋「平凡」嘅可能性 有呢種經歷就必然會好悲慘 畢生困喺傷痛中 但如果受害者自己唔同意呢句說話呢？ 佢覺得自己已經完全come through完全get over呢？ 就算觸碰昔日嘅傷口都已經完全唔痛呢？ 冇錯 呢種創傷好大 但係咪大到必然無法癒合？ 如果受害者出盡120分努力去活得像個平凡人 但社會只係不斷話佢哋嘅靈魂受到無法抹滅嘅傷害 咁係咪某程度上嘅二次傷害？ 你連痊癒嘅機會都唔畀我 另外就係關於痊癒同痛覺 「痛嘅話一定要講出聲啊」 有一種餓叫屋企人覺得你餓 都有一種痛叫其他人覺得你痛 手臂打曬石膏 貼咗膠布 紫紫紅紅嘅瘀痕 睇見就覺得痛 但本人話唔痛 小學被叔叔性侵過 聽到都覺得有事 但本人話冇事 咁所以到底佢哋痛唔痛、有冇事呢？ 係真係已經痊癒 抑或只係自己唔敢同人講自己嘅痛？ 定還是已經習慣性壓抑而導致痛覺變得遲鈍？ 我覺得導演冇交出答案 但正正係冇答案先值得觀眾思考 韓國片名直譯係《世界的主人》 而主角名叫主仁 同「主人」係雙關 中文片名係《若問世界誰無傷》 當然會直覺諗起Eason嘅〈天下無雙〉 無雙無傷 都係雙關 仲要意思都match 可能係今年最正嘅譯名 主仁決定用呢種態度過人生、看世界 但世界喺他人知道佢過去嘅經歷後驟變 主仁如何看待世界、看待世界嘅主人 即係自己 係呢套戲嘅主題 另一方面 人人都帶著或多或少嘅傷痛過活 一萬個人就有一萬種帶傷而行嘅方法 所以都係人人都係無雙嘅存在 若問世界誰無傷 答案應該係「沒有誰」 若問世界誰無雙 答案應該係「誰都是」 女主角係零演出經驗嘅素人 一方面素人感好強 另一方面佢完全說服到我 佢就係李主仁本人 成套戲都陽光普照 但有種隱形嘅tension 愈回想愈覺值得回味同深思嘅一部作品 cap圖分享導演專訪中覺得好有意思嘅段落 若問世界誰無雙 定是答：你從無雙 ❤️ 8.8/10