呢類題材我諗唔係個個啱睇， 但我本身就幾鍾意睇大正時代嘅故事， 呢個時代嘅日本女性開始得到更多機會， 但同時仍然有好多受限， 係一個傳統同科技互相衝擊嘅時代， 同時又吸收緊好多西洋文化。 ／ 一開始，男主30歲，女主12歲， 女主15歲時先會正式結婚。 男女主嘅婚姻係家族訂立， 兩邊嘅家人都係好人，又唔係賣女求榮， 但確實兩邊都有對方需要嘅爵位或者錢財。 ／ 即使漫畫裡面，唔少人都覺得女主係可憐， 連男主都有咁嘅諗法，所以更珍惜女主， 但有一話男主下屬有提到一句其實男主都係可憐，因為佢都一樣係為咗家族由一開始放棄追求幸福嘅權利。(又確實，我都冇諗過呢個角度，好容易下意識就會覺得只有女主需要同情) 只係好幸運男主同女主都咁善良體貼， 如果唔係呢段婚姻注定不幸。 ／ 兩個人係日常相處，慢慢了解對方， 亦愈來愈萌生更多好感， 相信成為夫妻之後係細水流長嘅感情。 其實係當時時代背景下， 呢種感情應該算好難得， 比起相親一眼定終身， 兩個人有3年來往加深了解。 女主嘅同學同女僕， 以及男主嘅下屬都係幾可愛嘅配角。