從來都冇睇賀歲片嘅習慣 亦從未試過初一同屋企人去戲院睇戲 今年老竇突然興起話要做下啲家庭活動 所以就開咗齋😂😂 有啲戲有啲劇本係可以令你無視佢嘅沙石 唔係話完美 但就係夠好 金多寶就係呢種戲呢種劇本 係我心目中賀歲片應有嘅溫度同立意 屋企人就係咁 笑下喊下 呃下𠱁下 鬧下攬下 💛 8.5/10

第一次喺度講YouTube片 可見我真係覺得佢好值得記錄同分享 從來都唔係試當真嘅fans 連觀眾都唔係 只係睇過口試王同墨魚遊戲 對許賢嘅認識就僅限於認識 因為睇過《公開試當真》所以對佢認識又多少少 其餘一概唔清楚 一連三集嘅《21K咋嘛》記錄咗許賢人生第一次跑半馬 比賽前六星期先開始練跑到比賽當日嘅過程 唔係因為對呢個人感興趣而開嚟睇 而係因為我仲喺強風吹拂x極度100米嘅跑步熱潮當中走不出來 見到有長跑topic就自然想睇 點知比想像中好睇太多 因為覺得自己人生好多方面都好𠽤、想有啲突破有啲挑戰 所以幫自己報咗半馬 而知道正式比賽前六星期都從來冇練跑 喺咁嘅前提下join running club、跟教練跟pacer上課表練習 去到跑完21K摸終點線 一路上好多思考 許賢用鏡頭將自己嘅訓練同思考分享畀觀眾 觀眾就可以好似陪同許賢一齊經歷以上種種 好中意許賢（喺呢幾條片）嘅地方係 佢可以好自然、好淡淡然咁講啲好有哲理嘅說話 有insight得嚟唔造作唔刻意 冇說教feel、唔似度咗好耐背稿讀出嚟 真係由心而發當刻諗到咩就講咩 好似言之無物但又幾有意思嘅說話 真係唔係人人做到 就係呢啲好似廢噏但又幾好聽嘅說話令呢幾條片咁好睇 跑步到人生 如何面對自己面對他人 面對瓶頸面對難關 唔識概括咩中心思想 建議自己去睇

因為網友推薦而開嘅綜藝 我係會睇曬所有前導trailer先開第一集嘅人 老實講 佢嘅trailer非常不吸引😂😂😂起碼對我而言好唔吸引 完全唔知個節目係做乜 只係feel到用剪輯營造出嚟嘅勾心鬥角同神秘氣氛 簡單嚟講就係不知所云 唔係網友推薦我真係絕對唔會開😂😂 但之所以要喺review特別提呢點就係想同其他potential會被失敗trailer嚇怕嘅人講： 呢套係值得投資嘅綜藝💥 12個來自不同領域嘅玩家被困喺同一個空間相處七日 每日玩1-2個淘汰遊戲 要盡力為自己爭取多啲生存籌碼之餘 又要增加贏家獎金 所以簡單嚟講就係一個智力遊戲生存賽 好佩服製作團隊度到啲咁複雜嘅遊戲出嚟 不敢想像幕後用咗幾多時間dem game debug 尤其後期嘅遊戲其實係會受剩餘生存玩家數量而有影響 佩服佩服 game設計得好只係背景 節目好睇在於參加者 好多都有好鮮明嘅character 而且唔係劇本寫到嘅嗰種real 尤其係有好明顯嘅兩派人： 社會福利主義拯救弱者黨 VS 必要時結盟但基本上靠個人力量黨 呢兩group人數極度不均、但能力又不相伯仲嘅人 喺不同遊戲不同settings下嘅衝突碰撞同合作 先係呢個節目最好睇嘅地方 不劇透 但有啲玩家真係好charm 最後一集播credit時展示啲幕後硬照 不排除攝影師係SEVENTEEN fans 好多勝寛😂😂😂 睇完第二季trailer 同樣毫不吸引😂😂但我都會照開 💙 8/10

今日喺牙醫診所等得太耐 耐到睇完擺喺診所嘅呢本書😂😂😂 左頁係字 右頁係插畫 所以其實可以好快就揭完 就係作者嘅心事合集 應該可以撫慰到某啲人嘅心靈 但對於等緊洗牙嘅我嚟講效果一般😂 🩶 6.5/10

荼毒室第二本完讀～ 冇上一本咁精彩 呢本特別在用「小日常」入題： 穿衣、工作、聽歌、演唱會、講故事、去旅行 睇標題完全唔會估到到底呢篇講咩topic 係幾有趣 不過冇咁多新insight 最中意講故事同習慣呢兩篇 期待之後兩本 大時代同人生種種 🩷 6.5/10

見到有人推薦所以睇嘅美劇 一集大概一個鐘 total得8集 係可以輕鬆笑住追嘅懸疑查案題材作品 首先setting係白宮已經好有趣 我對白宮嘅認知係0 所以套劇點塑造白宮我就點相信😂 喺一場為澳洲首相&外交官舉辦嘅國宴上 白宮總管家發現陳屍喺樓上嘅遊戲室 迅速請來聽聞係the best detective嘅主角Detective Cupp 然後當晚在場嘅所有人 包括全部staff同賓客 包括美國總統同澳洲首相 都要留喺白宮直到宣佈解封為止 事件就圍繞住Cupp如何喺幾乎0科學蒐證嘅情況下 純粹靠推理同提問搵出兇手同犯案過程 前排先睇到一個講法係 現代嘅推理故事都好無聊 因為科學太厲害 所有嘢都講證據、指紋、血跡、DNA 可以畀偵探發揮嘅空間根本少之又少 所以要寫出優秀精彩嘅推理作品 必須去與世隔絕嘅荒島 而呢套劇正正就係精彩在唔知點解好似冇科學偵查參與嘅部分😂 除咗非常初步嘅死因推測之外 乜都冇 指紋血跡乜都冇查 可以話唔make sense但都因為咁 呢個故事先成立 先展現到主角嘅魅力 主角係個觀鳥愛好者 成日無啦啦都講雀仔 但又都好神奇地係同案件有關 佩服編劇導演團隊嘅腦洞 係幾耳目一新嘅作品 用一個字形容呢單案就係chaotic 用兩個字形容就係鬧劇😂😂😂 🤍 8.4/10

十一月尾睇完原著小說 拖到一月尾先睇完得23集嘅動畫 先講結論： 我真係唔覺得有threads友講到咁出色咁神作 因為我係睇完書先睇動畫 所以係完全知道所有劇情走向咁去睇 基本上跟足90% 冇咩必要嘅微弱愛情線cut到幾乎冇 但我接受唔到結局咁模糊地處理 ===嚴重劇透警告=== ====== === 小說裡面 主角灰二係呢世都冇可能再跑步 之前膝頭已經傷過 做過手術 格硬用止痛藥同意志力跑完21K嘅箱根驛傳之後 膝頭骨骨折 行路都唔暢順談何跑步 好記得睇書嘅時候腦海浮現佢一路跑、舊骨一路喺關節度浪下浪下嘅畫面 我啲眼淚都一樣浪下浪下 但動畫完全冇認真提及過灰二嘅腳傷到底有幾嚴重 衝線前都只係一個定格鏡頭表示好痛 結局都只係一個鏡頭顯示佢行路趷下趷下 但完全冇講過傷勢 其實佢已經冇可能再跑步 而點解咁執著呢點係因為佢對劇情有好重要嘅意義 高中受傷後一度放棄跑步 特登揀間唔跑步嘅大學讀 點知發現其實自己不論跑定唔跑都一樣痛苦 咁就索性盡力跑一次 用自己嘅方法組一隊最好嘅團隊出嚟挑戰箱根驛傳 等咗四年 終於等到神隊友阿走加入 湊夠10個人可以參賽 人都湊得齊 訓練算不上苦 好努力好努力喺預賽入到十強 可以正式參賽 點知自己舊患復發 人生就係咁 喺所有嘢都好ready嘅時候要你kick一kick 但講真 去到呢個地步 冇可能放棄 正正係呢份明知以後唔可以再跑步都要跑落去嘅堅持先完整到灰二喺強風吹拂嘅故事 正如神童發高燒病到行路都唔穩陣 依然冇人可以開聲叫佢棄權 冇人可以勸服灰二棄權 但係 動畫完全skip咗呢part 扣分😞 唔知點解硬係覺得動畫有啲悶 尤其一開頭 我一邊睇一邊諗 乜冇睇過原著嘅人真係可以堅持睇落去咩？😂😂😂 就係咁誇張 所以我唔係好get到底點解四處都一片好評 神作神作咁稱呼 故事當然係好睇 但不至於神作吧 有句說話係睇動畫先真正get到佢嘅意思 跑得最慢嘅王子見到正式比賽中阿走嘅跑姿同速度 同灰二講咗句 「唉見到呢個人跑步 都唔知自己過去呢一年咁努力練習係為咗啲乜」 然後灰二答 「只要努力就一定可以成功 其實係一種傲慢」 呢度嘅對話同小說一模一樣 但當時我唔係好get 而家好似明白灰二點解要咁同王子講 阿走喺跑步方面係完美一般嘅存在 而如果你覺得你只要努力 總有一日都可以達到阿走呢種境界 其實係一種傲慢 因為你漠視咗好多完美背後、努力以外嘅好多其他因素 練習培訓嘅資源 教練 隊友 方法 場地 設備 天份 心態 飲食 休息 基因 好多嘢都唔係話你努力就追趕到 所以灰二唔係想打擊王子 反而係希望同王子講 你並唔係因為唔夠努力先跑得比阿走慢 你唔需要因此而自責自卑 get到之後更佩服灰二真係做教練嘅人才 欣賞動畫冇大改劇情 人物角色設計得好配合原著 動畫有聲有畫 可以更著重表現「強風正在吹」呢點 很好很好 略嫌阿走同灰二以外嘅竹青莊成員講得太少 主角亦由小說比較平均嘅阿走x灰二雙主角 變成比較偏向阿走 不過23集篇幅有限都係可以理解嘅 見到原來漫畫真人版電影電視劇舞台劇都有 一本小說可以改編嘅所有格式都出過曬了😂 可見強風吹拂真係非常優秀 啊結局真係意難平 我相信寬政大學陸上競技部後援會（製作團隊名）係可以做好啲㗎🥲🥲 如果未睇過嘅建議睇咗書先 如果已經睇過但未睇過原著 強烈建議睇小說！！ 💙 8.2/10

琴日睇完一套虎頭龍尾嘅劇 今日就即刻嚟一套虎頭蛇尾嘅戲 開頭真係幾OK 氣氛夠tense 角色都可以 但接近尾聲交代兇手同點自救嗰度就完全係放飛自我 真係睇到「吓？」出聲 啲逃跑路線完全唔make sense 轉折亦都好突兀 愈睇愈覺得唔掂 本身想睇原著小說 而家有少少被嚇怕 唔知道係電影改編差定本身都係咁 前面真係唔差但結尾扣好多分 💙 6.8/10

吉卜力迷當然不能錯過任何關於宮崎駿/吉卜力嘅書 偶然見到圖書館有呢本就即刻借 作者都係日本動畫界嘅人 製作人同評論家 平時睇網友share自己觀感就多 睇業界人士講吉卜力真係第一次 好多新奇嘅觀點 例如《千與千尋》 湯婆婆其實係製作人鈴木敏夫嘅化身 而油屋並唔係咩風化場所 而係吉卜力工作室 之所以全部員工都係女性 因為呢個就係吉卜力嘅情景😂 神明去油屋房東紓壓 隱喻緊睇動畫嘅觀眾透過吉卜力嘅作品暫時放下日常生活嘅壓力 而鈴木敏夫身為製作人嘅角色就係考慮商業元素 所以以宮崎駿為首個油屋員工都唔多中意佢 變咗反派角色 呢個解讀真係第一次聽！！ 又例如《幽靈公主》同哥斯拉都有關係 其實麒麟獸化身為螢光巨人 係暗示緊哥斯拉 新型武器嘅出現可以攻擊哥斯拉 達達拉城研發到槍砲都可以攻擊螢光巨人 哥斯拉又經常被當作核爆炸嘅代表 所以螢光巨人最後都有爆炸 不過喺宮崎駿嘅創作下 爆炸會帶來生機 正如麒麟獸可以給予生命 同時可以掠奪生命一樣 文明可以促使人類進步 亦可以加速人類滅亡 真係有好多好有趣嘅觀點 吉卜力迷值得一睇 🩵 7/10

2026年第一套完成嘅劇 為新一年開咗好好嘅頭 因為係優秀嘅作品🖤🖤🖤 《怪物》 聽過睇過好多人推薦 終於趁住舊年重溫完德魯納開嚟睇同樣係呂珍九主演嘅懸疑題材故事 好想多啲人睇到所以唔開劇透mode 盡可能喺唔劇透嘅情況下講講感想 循例自己寫之前睇下其他人點寫先 第一次見到「虎頭龍尾」呢個term 可見評價係幾高 而我覺得查案題材做到呢點係更加難 因為佈局同製造問號相對容易 但set到格局咁大 點收科先可以令觀眾接受 唔會覺得有太大落差之餘覺得心理平衡 警惡懲奸又唔太TVB大團圓結局 就好困難 而《怪物》係出色嘅 唔起眼嘅文洲市 裡面更唔起眼嘅萬陽邑 係呢個故事嘅舞台 首爾唔可以係呢個故事嘅舞台 釜山都唔得 必須要係好細嘅小城鎮 荒地多過建築物 遠離大城市嘅地方 因為需要全個鎮裡面嘅人都互相認識、建立到幾乎係親人嘅關係 呢個故事先成立 20年前 呢個細到藏不住秘密嘅小城鎮接連發生咗好幾宗女性失蹤案 懷疑係連環殺人犯所為 其中一個失蹤者係當年20歲嘅李東植嘅龍鳳胎妹妹 但李東植係連環殺人犯嘅嫌疑犯 一直搵唔到確實證據 妹妹亦一直失蹤 生唔見人 死唔見屍 就咁過咗20年 20年後 李東植係個警察 輾轉又返返嚟萬陽做派出所員警 偏偏呢個時候 萬陽時隔20年再次發生疑似謀殺嘅女性失蹤案件 一個動機不明嘅警察 韓洙元 由首爾調職過嚟呢個鳥不生蛋嘅萬陽派出所 所長安排洙元同東植做巡邏partner 一次又一次「意外」同各宗失蹤案同屍體發現案有關 全套劇嘅重點當然係搵兇手 20年前嘅兇手同20年後各兇手係咪同一人？一個人定多過一個人？ 東植妹妹嘅屍體到底喺邊？ 兇手嘅殺人動機係咩？ 以上 當然係重點 但我覺得可以將《怪物》分做上下兩part 而以上只係上半part嘅劇情重點 揭露兇手真面目之後先係套劇嘅精華所在 各人埋藏心底長達20年嘅秘密到底係咩 有冇不為人知嘅關係同合作 眾人如何不惜一切代價甚至自己都成為怪物咁去搵背後嘅怪物到底係邊個 冇辦法好似其他人咁仔細同深入分析呢套劇 講少少我覺得佢好想講嘅主題 一、家人 洙元嘅爸爸係韓國警察廳嘅候任廳長 洙元自己又係能力優秀嘅年輕警察 內外兼備嘅佢 本來完全係警界嘅明日之星 人生大贏家 但事實上佢同爸爸嘅關係唔好 甚至去到後半段 洙元係最希望同最落力要毀掉爸爸人生嘅人 東植話洙元係個完全不賦予任何意義畀「家人」嘅人 偏偏 故事嘅舞台 萬陽 就係一個彼此冇血緣關係都親近到好似家人嘅地方 顯得初來乍到嘅洙元喺呢個地方更格格不入 同時擔任一把刀 毫不留情地割開萬陽眾人努力收藏嘅遮羞布 係咪真係冇秘密？係咪真係完全信任對方？ 一切都係因為洙元嘅介入而開始 萬陽人彼此間嘅羈絆好深 bonding好強 呢點喺好多地方都顯現到 成日聚餐 個個都由細識到大 一方有難八方支援 相比洙元、佢阿爸、檢察官呢三個之間嘅相處又係好大對比 編劇同導演多番透過呢兩個地方對家人嘅理解、點對待所謂嘅「家人」 傳遞呢套劇嘅主題 好有張力 好好睇 二、法律 就快對韓國嘅法例清楚過對香港法例嘅了解😂😂 因為睇得多韓劇同懸案YouTube片 其中最常提到嘅就係失蹤 事實上人口失蹤係冇得報案嘅 因為基本上都係視作離家出走處理 由呢點引申到套劇其他嘅情節 多次強調法律嘅無力 東植之所以變成而家嘅癲佬 其中一個原因就係法律嘅無力 冇辦法搵到當年殺死自己妹妹嘅兇手 冇辦法好好制裁罪人 反而令無辜嘅人承受莫須有嘅污名同壓力 所以佢先投考警察 想用自己嘅力量向兇手同世界報仇 洙元本來係企喺東植嘅對立面 東植好多時都漠視程序正義 成日喺辦案過程中踩過界做不合法嘅事 洙元每每都會制止 但後來洙元都慢慢意識到原來佢一直信奉嘅法並唔係完美 有好多嘢冇辦法透過法律處理 有好多不公不義冇辦法透過法律伸張 呢個時候 洙元會如何選擇？ 心中重要支柱同信仰都一一倒下時 佢會唔會都一同崩潰成為怪物？ 頭幾集嘅疑團係多到覺得有少少拖戲 而且兩位主角嘅性格都好不討喜 所以一開頭可能有少少趕客 但拜託各位一定一定要捱落去 因為呢套劇真係愈睇愈精彩 可疑嘅人每集都換一個 終於鎖定嫌犯之後 導演話你知 sorry 真正嘅謎團而家先正式展開 不斷拋出拼圖 直到最後一集先完整交代清楚橫跨二十年嘅案件sss 演技全員在線 雙主角都極度優秀 李東植係痴狂嘅怪物 韓洙元係執著嘅怪物 其他角色唔講得 但大家都代表不同方面嘅怪物 講人喺利益面前 關係係如何虛偽 信任係如何脆弱 同時講人對家人、朋友、拍檔嘅bonding係如何強到成為自己最可靠嘅後盾 喊咗兩次 一次係大夥兒回憶一位死者生前嘅事 邊舉杯邊講對白： 「你們很有錢嗎？」 「沒有，大哥！」 「那你們健康嗎？」 「不，大哥！」 「那人生有甚麼大不了的嗎？喝吧！」 「喝吧！」 一次係最後最後一幕 東植同洙元分別講嘅說話： 記得好好食飯，好好睡覺，好好拉屎。 兩段都係刻劃緊好可貴好動人嘅bonding😭😭😭 虎頭龍尾唔係浪得虛名 呂珍九係實力派 睇到最後我發現飾演東植嘅演員申河均有啲似雷格西😂😂😂😂 非常非常推薦 🖤 9.4/10

睇完第二季當然要睇第三季😂😂😂 用國家分隊比賽係另一種好睇 因為即使第一二季都有隊際比賽 隊員組合可能會改變 但國家team一係全留一係全走 而且背上國家榮譽嘅戰鬥一定係更有火 雖然唔太中意某啲人實在有啲太目中無人 但賽後見到各位嘅IG好似都真係可以建立跨國友誼 真係不得不佩服韓國隊嘅實力 斷過腳腕骨嘅仁兄連贏兩季 點搞🔥🔥🔥🔥🔥

緊接第一季睇嘅第二季😂 阿莫帝真係由一開頭就睇好嘅選手 腳腕骨斷過都可以練到呢種體能 真係strong到不得了 令我覺得其實少少傷真係冇咩事 睇下佢 有咩做唔到

差啲唔記得記錄呢套！！ 出第三季嘅時候先終於開久仰大名嘅第一季嚟睇 咁啱碰上自己決心要做運動努力復健嘅時候 所以佢成為我居家運動嘅必備良藥 睇一班人做堆辛苦嘅嘢陪自己一齊辛苦 就好似冇咁辛苦 第一季張恩實嗰team黑馬真係好正 選五強嗰個神話concept 挑戰又係好正 我覺得神話concept係三季最佳challenge

嚟個repov版嘅年度wrap up～～ 2025嘅閱讀目標係韓國小說同自己書櫃嘅書 total睇咗33本書 當中有7本韓國作品 有詩作有散文有小說 fiction類最愛嘅都係韓國作品《在熙，燒酒，我，還有冰箱裡的藍莓與菸》 脫離全職學生生活後嘅第一張成績表都算滿意啦 出年想睇下兒童書 因為行圖書館發現好多童書其實都好有趣 譬如到底成年人覺得小學生應該要識嘅哲學知識係咩呢 書櫃嘅書繼續係急需清理嘅狀態 希望可以認認真真睇起碼一本哲學書 影視方面 今年都算課得幾多金去戲院 又加上今年屋企終於subscribe咗Netflix 所以睇多咗好多影視作品 有新睇有重睇 幽靈公主IMAX係honourable mention❤️ 又因為睇多咗戲所以同朋朋多咗好多激烈又愉快嘅電影討論 正如Netflix攞走德魯納酒店 又畀返極速一百米你 生命就係不斷咁give and take 以及被given被taken 希望2026可以繼續喺繁瑣忙碌悲傷痛苦嘅日常生活中抽少少時間去閱讀同觀看其他人嘅世界 💚 /!¿!\

趁Netflix 31/12下架前拿拿臨重溫一次 二刷再度感嘆 啊 德魯納真是個好東西 唔可以exact講到係我心目中top幾嘅韓劇 但肯定係最top 佢出色在所有線都好完整好完滿 各位主角配角嘅感情線 每隻鬼嘅故事 全部都寫得好好 煽情但唔過火 帶到啲message出嚟又唔覺得over 今次睇 發現「슬픈」悲傷呢個字嘅出現頻率實在有點高 不論係對白定ost歌詞都不斷不斷出現 呢套劇由一開始就註定會係悲劇 不論係前世嘅恨定今刻嘅愛 都冇辦法可以逃過悲傷嘅結局 滿月同燦星 好登對又好美麗嘅名字 但從來滿月同燦星都唔可以同時間出現 月亮咁光亮就唔會睇到星星 要睇到星星就要月亮走埋一邊 所以呢兩個名真係改得好好💦💦 必須等待一千三百年先可以重遇嘅緣分 希望下一次相遇唔需要相隔咁長時間 💜 9.6/10

近年睇過最滿意嘅Disney/Pixar電影 愈嚟愈覺得D記唔適合講啲大道理故事 講返呢啲大路又永遠可以講落去嘅友情同伴大愛捨己為人就係D記嘅拿手好戲 （來自吉卜力打手的大膽發言） 好完整嘅故事 所有嘢都睇得好舒服 每次睇呢啲外國動畫作品都會特別佩服本地嘅製作團隊 點樣透過劇本同配音令個故事更引人入勝 再昇華到3-80歲都理解又好笑 真係好唔簡單 大大的RESPECTTTTT 因為真係唔會有唔get嗰嘅地方 所以都冇咩好討論😂 就係一套好舒服好smooth嘅輕鬆好作品 我buy蘿蔔妹&橙色大狗係純粹的partnership🤜🏻🤛🏻🤝🏻 順便向中意Zootopia世界觀嘅所有人推薦另一套動物城市物種平等嘅日本動漫作品： BEASTARS 係大灰狼x侏儒兔嘅combo 不過後來你會發現兔仔係第三者 鹿先係真愛😌 🧡 8.6/10

之前已經想睇 見到電影中心有王劍凡做映後分享 即衝 睇完好慶幸自己睇有佢做映後分享嘅場次 如果唔係我應該畀得1分佢😂😂😂 因為我係 完 全 睇 唔 明 譯名已經好有趣 日文旅と日々 直譯係旅與日子 中文譯旅行的意義 英文譯Two Seasons, Two Strangers 英文名完全唔get 中文譯名就係意譯咗日文旅行與日子 故事可以話係無聊嘅程度 所以就唔多講 反而想分享劍凡分享嘅嘢 旅行同日常好多時都畀人一種二元對立嘅印象 甚至有好多人之所以去旅行就係為咗「逃離日常」 去個旅行 重整生活 但其實旅行同日常未必一定咁分割 旅行嘅mobility 日常生活都可以感受到 日常生活嘅rootiness 旅行都可以體驗到 或者最理想嘅境界就係可以用旅行嘅心態感受日常 所以比起旅行的意義 告訴更加感受到日常的意義 有一句好深刻但唔係好關事嘅說話： 「其實你覺得好warm嘅呢種感受 重點唔係人哋給予幾多 而係你接收幾多」 人哋給予100但你接收60 同人哋給予80但你接收75 其實係好大分別 雖然都係唔get 不過劍凡嘅分享真係令我明多咗少少少少🤏🏻 🤍 6/10

簡介比正文吸引嘅書 作者真係去咗郵輪打工 呢本書係佢嘅親身經歷 唔知係咪100% 但一定係啟發自佢嘅工作所見所聞 係好有趣嘅題材 裡面嘅事都算得上有趣 但唔知點解就係覺得本書有啲無聊 冇追看性 而且法文翻譯做中文都唔傳神 尤其敘事者「我」有鄉音、英文唔叻、仲要搞翻譯不能嘅gag總係覺得奇奇怪怪咁 不過都算係對郵輪嘅了解深入咗 💙 5/10

年尾嘅閱讀速度就會直線上升 因為迫切地想喺今年內完成已經開咗嘅書😂 貫徹全年嘅韓國文學目標（唔理 小說都計） 關於青年被困精神病院嘅故事 到底邊個負責寫中文譯本嘅內容簡介！！寫得極差 令讀者我帶住完全錯嘅expectation去睇呢本書 睇簡介會以為係兩個無辜嘅正常廿幾歲青年唔知點解去咗精神病院、講佢哋如何奮力逃離 結果佢兩個根本就有病 睇呢本書嘅心情好複雜 成日睇到笑 但觸動情緒嘅位又喊到好崩潰 *註 睇書可以喊到崩潰係極其罕有嘅事 一向好欣賞幽默嘅作者 好感激呢位作者充分運用佢嘅幽默感 主角秀明好細個就有幻聽 出入過好多次精神病院 幻聽終於消失後 又因為口吃同好大程度上嘅社交恐懼而日日匿喺屋企 有日被阿爸趕出街 無啦啦就被人告非禮強姦 阿爸送佢入精神病院 聲稱佢要喺裡面直到永遠 另一個主角承民係財閥家的廢柴私生子 十幾歲就有縱火前科 又係有入住過精神病院嘅經驗 但同擔驚受怕嘅鵪鶉秀明唔同 佢係易燃嘅爆竹 非常火爆 亦可以話係性格鮮明 以前係滑翔翼飛行員 點知後來眼病發作被取消飛行資格 從此佢失去呢個世界上唯一一個自由嘅空間 同精神病有關嘅作品都必定有抹悲情嘅色彩 悲來自自由、夢想同希望呢三樣人生最光彩嘅東西同時被剝奪 出唔到院固然令人絕望 但原來更可悲嘅係畀你出到院都無補於事 因為你以前仰望窗外嗰個自由嘅世界其實並唔係你嘅現實 現實係你已經失去喺外面世界「正常」生活嘅能力 所以千辛萬苦終於批准出院 你又開始盼望可以入院 所以最自由嘅竟然係喺醫院窗邊望向外面世界嘅呢個幻想空間同時間 承民用盡方法想逃離 因為佢好想喺完全失明前飛多最後一次 豁出性命都在所不惜 秀明就連出院嘅動力都冇 因為佢好清楚 佢出到去都係呢個死樣 咁不如留喺醫院裡面仲安全仲舒服 兩個人嘅差異造成好大嘅拉扯 亦係呢本書最觸動人心嘅地方 結局我覺得係作者可以創造到最好最理想嘅happy end 因為兩個人都搵到自己自由飛翔嘅嗰片天空 睇到好後先明白點解書名叫「射向我心臟」 原因擺quote 好耐冇讀過完全0愛情線嘅故事 秀明承民呢對唔可以稱為兄弟嘅特殊關係 更貼切嘅形容係戰友 因為形象同性格都刻劃得好深刻 反差好大 所以腦海裡面有好清晰嘅二人身影 承民自稱歐巴算係其中一個好深刻嘅畫面 *註 韓文歐巴oppa係女性對較年長男性嘅稱呼 姑且當係哥哥 男性對男性應該叫hyung 不過有睇開韓劇嘅各位應該都好清楚 所以承民呢度係取笑緊秀明一把及腰嘅長髮以及清秀嘅外貌 少少覺得唔完整就係護理師崔基勳嗰part 以為呢個角色係伏筆 點知係我諗多咗 故事有改編做電影 封面已經寫住呂珍九嘅大名 咁啱呢排重溫緊德魯納酒店 真係好難想像具燦星變成李秀明嘅形象😂😂 🖤 8/10

因為書名太靚而借嘅書 微風行過我們的髮絲 而英文係 The wind blowing through our sorrow 點解髮絲係sorrow 抱住呢個疑問去睇呢本處處透露哀傷嘅小說 果然好哀 短短二百幾頁嘅偵探小說 涵蓋議題包括： 養父母、父母虐打、戀童癖、身體殘障、剝奪個人理想志向目標 縱火、溺水、墜樓、絞殺、燒傷、刀傷 睇書背簡介會以為係一個少年嘅故事 仔細研究封面會以為係兩個少年嘅故事 實際上 係三個少年同一個女孩嘅故事 兩個各自過住好苦好苦但說不得嘅人生嘅少年遇上彼此 微妙嘅情感因為對對方嘅遭遇嘅同情而變成恨意同殺意 結局係我唔中意嘅open ending 但對呢四個人嚟講 就係最好嘅結局 書嘅主視角用偵探嘅身份撥開重重案件嘅迷霧 一路理清案件之間嘅關係 意外發現兩位少年令人心碎嘅經歷 查案嘅描述有營造到撲朔迷離嘅感覺 但犯案手法略嫌有少少唔真實 遭遇太痛心 睇完好沉重 心口有重物壓住 呼吸不暢順嗰種 希望有日象徵希望、幸福、未來嘅微風可以行過少年少女嘅髮絲 🩶 7.2/10