大F人睇到淚流滿臉嘅紀錄片😭😭😭😭😭😭😭 睇過comment話好睇 但冇expect過係呢種程度嘅好睇 冇咩睇醫療docu嘅經驗 但呢套絕對稱得上係血腥 拍攝團隊完全冇打算迴避嗰啲爛肉斷骨爆缸血淋淋場面 如實地拍 色調都冇改 就係血紅一片 收音甚至聽到手術期間內臟被攪動嘅聲音 所以怕嘅人睇之前真係需要三思 但無論如何我都極力推薦所有人去睇呢套紀錄片 幾個主要反思位 ❤️‍🩹意外其實係可以發生喺自己身上 睇呢套嘅心驚膽顫來自感同身受 完全想像到「嘩其實發生喺佢身上嘅嘢絕對有可能發生喺我身上」 冇人預料到放工返屋企會俾車撞 冇人預料到玩機動遊戲會遇上故障 唔係時運低 唔係人品差 唔係冇積陰德 發生咗就係發生咗 一個意外就可以對當事人及其身邊嘅人往後嘅人生產生巨大嘅變化 每個受訪者都話發生意外後會更加珍惜生命 覺得每活多一日都係賺咗 慧重新思考到底自己想點樣過餘下嘅人生 唔需要親身經歷呢啲意外 睇電視就已經可以達到同樣效果 會拷問自己：萬一咁咁咁 你會想點點點 ❤️‍🩹醫護人員嘅偉大 人人都話醫護人員偉大 醫護工作好神聖 但呢套紀錄片係勁寫實咁反映出有如此偉大 如此神聖 佢哋係真心值得自豪自大 自吹自擂話拯救咗世界都不為過 因為救返一個人條命 就係拯救咗好多個人嘅全世界 實在太厲害 但呢套紀錄片做得好好嘅係 講咗好多單意外 涉及好多個受害者同家庭 由無數個醫生護士救護員處理治療 但每一單都輕描淡寫 唔會過分煽情 唔會特別highlight 救人係醫生嘅日常工作 每個病人都好特別好重要 但每個病人都一樣特別一樣重要 每時每刻都有人送入醫院需要搶救 唔刻意著重某個意外某個病人某個醫生某個故事 就好似講緊命運/世界/神對每一個人都係公平嘅 ❤️‍🩹人果然係血肉之軀 只不過係血肉之軀 因為係創傷中心 所以幾乎每個case都要做外科手術 又因為畫面非常寫實嘅關係 有好多好多開刀scene 可能外科醫生已經做到慣 但對layman如我而言 真係好震撼 用刀切開 其實每個人都不外乎係一舊被皮膚包住嘅肉 由肌肉同骨骼撐住 就係咁 僅僅如此 所以真係好兒戲 但又堅韌喎 不得不佩服人體結構 其實每一集每一個醫生醫護人員都起碼會講一句好touching好inspiring好insightful嘅說話 但我冇即時jot低所以不能盡錄 亦唔可以原句覆述 💬 有醫生形容每一個case都係一場team sport 但分別係 佢哋每次都贏 💬 有醫生話佢哋接觸嘅每個病人都係處於佢哋人生最最低谷、最最軟弱嘅時期 莫名地好touch到我 的確每次見醫生都係處於一個好脆弱嘅狀態 生理上and心理上 怕自己唔知有咩事 會唔會有後遺症 以後會點 所以好感激醫生嘅用心 💬 有醫生話其實治療病人嘅最終目標 其實係令佢哋儘量返返去入嚟之前嘅狀態 所以手術同fix各種器官骨折嘅受傷唔係唯一focus 點樣幫佢哋接受受傷後嘅自己以及往後嘅人生都係好重要嘅一環 自己唔係話受過啲咩好嚴重嘅傷 但都叫做入過幾次院 做過手術 深深體會到醫護團隊悉心照顧嘅重要性 微小到幫你量血壓、送飯嘅姐姐用咩稱呼叫你都已經可以好影響困喺醫院嘅你嘅心情 唔好話佢哋都係打工 都有出糧 冇嘢係必然 坐office嘅打工仔可以hea嘅時候 喺醫院返工嘅人都可以 所以don’t take it for granted 包括看似平凡嘅日常 一個意外就可以將你嘅人生打翻 真係真係真係好推薦 會有好多反思 如果你同我一樣係大F人就甚至會喺病人手術後甦醒張開眼之際比佢父母更快落淚💦 又一個求你看系列 🤍 10/10

呢兩日連續睇咗兩套有關現代女性地獄嘅紀錄片 冇錯 《虎毒不》對我而言就係一套紀錄片 睇之前見到評價好壞參半 而且壞得都幾極端 點知我意外地非常喜歡 成為今年睇過最中意嘅港產片 （nani 贏咗《看我今天怎麼說》？！ 係沉重嘅 係壓抑嘅 BB持續不斷此起彼落嘅喊聲係煩厭嘅 但 我哋只係觀眾 媽媽係要每日每夜承受呢堆壓力生活 過度完呢個階段之後就要返搵學校 讀書考試又係另一個截然不同嘅育兒地獄 第一次咁直觀同深刻咁感受到養兒一百歲 長憂九十九嘅苦 。 恕我學識淺薄 我真係唔識虎毒不吃兒呢個成語 今日早咗到戲院 我望住張大poster展板研究咗好耐 究竟點解叫虎毒不 完全唔make sense唔啱grammar 反而畀我從字型上發現咗啲嘢： 虎毒呢兩個字 有齊兒（儿）同母 完全就係呢套戲嘅主題 而且兒排先過母 母親一切以兒優先 淑貞就係一個嘗試掙扎說不嘅新手媽媽 女性一旦成為母親之後 係咪就必定會失去自我 全個世界都圍繞住兒女？ 說不嘅背後係自責愧疚、家人不諒解、旁人指指點點閒言閒語 英文戲名同樣值得一提 特別highlight “modern motherhood” 現代母親嘅難處 其實透過波姐嘅角色芬姨提及過 以前社會文化對母親同育兒呢兩個概念都同而家有好大出入 冇錯 以前男主外女主內嘅關鍵更根深蒂固 男人好似除咗打仔之外就唔參與育兒 但即使係媽媽點樣湊仔、仔女需要達到幾高嘅成就先反映出你教導有方 都係同而家有天淵之別 帶返頭盔 我唔係以前年代長大 最熟悉嘅都係阿爸同我分享佢嘅童年 所以唔可以好準確客觀咁講 我嘅理解係 只要有屋住有飯食有書讀 就夠 重點係有冇 質素從來唔係重點 經濟水平人人都一樣低嘅情況下其實就冇咩比較 開唔開到飯係全家最關心嘅問題 而且一定有工做唔怕搵唔到食 所以細路讀書唔成都不成問題 早啲畢業出嚟做嘢賺錢幫補家計仲好 但而家呢？ 六個月已經返playgroup 幼稚園入學都有面試預備班 唔好講咁遠 幾時識轉身行路講嘢 全部都會做record 以前根本冇發展遲緩讀寫障礙過度活躍 再講早啲 餵人奶定奶粉 糊仔定原型食物 全部都係問題 。 好深刻淑貞講過一句說話： 「無論幾努力都係一個唔合格嘅媽咪」 因為完美嘅滿分媽咪根本唔存在 如果滿分係無限 咁合格線都係無限（數學問題） 咁世上邊有可能有合格嘅媽咪呢？ 太多太大太重嘅愧疚同自責日復日咁壓住淑貞 無論點解讀嘅open ending 都不能否認淑貞被壓垮了 只係究竟佢最後可唔可以逃離呢個困境 究竟有冇人喺邊啲位可以插手拯救淑貞 防止悲劇嘅發生呢？ 導演畀觀眾嘅課題 留畀自己思考 。 。 額外一分送畀世上所有選擇成為母親同唔成為母親嘅女性 💙11/10💙

⚠️大劇透注意⚠️ 性侵受害者 同時係一名記者 同時係一名導演 前半段嘅時候我一路睇一路諗 「啊 點解佢可以咁堅強咁硬淨 好似完全冇事趕忙調查工作、寫書同官司？」 後半段佢自己揭露咗原因： 因為之前支撐佢繼續做落去、堅持生存嘅唯一動力 就係自己「記者」呢個身份 呢個身份賦予佢以第三人稱看待呢件事嘅能力 可以抽離 兩、三年後 佢終於意識到呢點之後 突然變返受害者詩織嘅身份 就原地崩潰了 。 有好多喊位 特別係對共情能力max嘅INFJ而言 透過另一個人讀出庭上發言嘅事件經過好深刻 但更想mention嘅係嗰啲其他牽涉案件當中嘅人釋出嘅善意 警察探員A願意透露警方內部嘅消息 並全力支持沙織出書 即使提及自己提供嘅情報都冇問題 只要唔開名就得 酒店職員目睹當日喺的士落車到上房嘅經過 四年後寫email同沙織講自己角度見到嘅一切 並願意出庭作證 詩織喺電話聽到職員肯畀自己用email作為呈堂證供嘅一剎係秒喊咗出嚟 我唔敢講呢啲係好小嘅事 畢竟答應幫忙都有機會影響自己前途同工作 但就係呢啲唔係老奉嘅善意一次又一次畀到支持當事人 力量唔知有幾多 但必不可少 。 睇嘅時候不斷勾起睇其他書嘅記憶 對於日本警察、司法制度、甚至記者俱樂部呢個term都係因為睇書而認識 而呢套紀錄片就好似將我呢啲文字上嘅認知同理解影像化 譬如同樣係記者偵查性侵案件 清水潔嘅《被殺了三次的女孩》 宮部美幸嘅《模仿犯》 東野圭吾嘅各作品 Netflix日劇《新聞記者》 以及不斷喺腦海盤旋嘅一句說話： 「生人都有好多地獄」 。 無法想像佢喺鏡頭前後流咗幾多眼淚 作為性侵受害人 要站在眾人目光下公開自己嘅經歷到底需要幾多勇氣 又不禁諗 咁另外嗰96%呢？ 缺乏記者呢個身份嘅人呢？ 冇helpful警察同酒店職員幫忙嘅人呢？ 根本畀唔起律師費嘅人呢？ 呼應返片尾最後一句 To all survivors 。 。 特別quote喺credit list非常吸引我眼球嘅一句說話作結 大大的respect 🖤10/10🖤

絕對係今年最愛嘅書之一 之前喺HyRead見到 通常見到有興趣嘅電子書都會去公共圖書館search下有冇先 點知真係有 終於借咗嚟睇 係比介紹更好睇更有趣嘅書！！！ 真係大推 我唔係歷史人 中學最憎嘅科目就係中西史 但呢本書係非一般嘅歷史書 作者用好幽默嘅筆觸寫人類歷史上各段錯得離譜嘅過去 最大嘅感受就係： 如果你想成為一個出名嘅人 只要做一件好錯嘅事就得 其實唔難 絕對唔難 舉啲深刻嘅例子 譬如原來美國曾經試過有河流著火 係 係河流 有水未乾塘嘅河流 而且不止一次 原因係條河有太多易燃垃圾 一個位意外著火後就全條河都著曬火 譬如中國嘅除四害運動 四害分別係：老鼠、蚊、烏蠅 同埋麻雀 「麻雀就是資本主義的爪牙」 讀到呢句嘅時候我literally笑咗出嚟 最終運動十分成功地殺咗15億隻老鼠、1100萬公斤蚊、1億公斤烏蠅、以及10億隻麻雀 又因為運動太成功嘅關係 幾年後旱災加蝗災 冇麻雀食蝗蟲 所以大饑荒死咗唔知幾多千萬人 譬如明朝有個皇帝喺宮內起咗個假得很真嘅市集 叫曬啲官員去扮檔主同平民百姓 為咗令自己可以體驗普通人出街買嘢係咩感受 埃及有個國王發夢俾獅子攻擊 第二日即刻去開羅動物園射殺全部獅子 又因為太愛自己部紅色Benz而下令全國人民不得擁有紅色汽車 土耳其有個總統好憎咖啡 下令土耳其境內禁止飲咖啡 甚至會喺夜晚著便服喺街度巡邏 見到偷飲咖啡嘅人就即場處決 曾經有一隻狗同一個足用藥粉brand喺民主選舉中當選成為市長/鎮長 二戰德國納粹有隻好先進嘅潛艇 因為廁所設計太先進 先進到冇人識沖廁 船長call咗工程師嚟搞 點知工程師錯手打開咗另一個閥門搞到隻艇充滿海水同排泄物 啲污水甚至滲入電池室搞到漏氯氣 冇辦法之下船長決定浮上水面 然後即刻被英國空軍戰機攻擊沉沒 比利時國王搞咗個慈善機構叫「國際非洲協會」 實際上就係將剛果變成一大片橡膠園 只要剛果人民冇達成生產目標就會斬手斬腳割鼻 斬落嚟嘅手一度成為當地士兵嘅貨幣 而呢個國王稱呼呢個地方為：剛果自由邦 講咗好多好多例子 睇書嘅話會有更多更多 除咗笑之外 其實有好多反思 點解會錯成咁？而家2025年嘅人類點解仲犯緊相同相似嘅錯誤？ 呢啲錯背後反映咗咩文化同價值觀？ 真心推薦俾所有人睇 🖤 10/10

第三次睇了 應該係我宮崎駿以外睇得最多次嘅電影 入戲院兩次 viu重播再睇 時隔三年 原來好多細節都仲記得好清楚 譬如食串燒 Candy問「其實做人有咩意義」 譬如喺太空人煙灰缸摷煙頭 睇戲聽返嗰把死人聲normal temperature真係恍如隔世😂 睇咗三次都係一樣咁中意 冇話講好多大道理 人生哲學 冇話好煽情 劇情好引人入勝 但就係好貼近現實 令人好相信呢個係一個好真嘅故仔 暖得嚟有啲痛 好中意好中意 作為一粒微塵 一不小心就會跌入懷疑塵生嘅陷阱 到底活著有咩意義 其實我咁渺小 咁努力為乜 嗯 冇錯啊 上天睇唔到微小嘅我哋 但同樣渺小嘅我哋可以睇到彼此 扣0.2分 因為覺得結局可以再好啲 🧡 9.8/19

趁Netflix 31/12下架前拿拿臨重溫一次 二刷再度感嘆 啊 德魯納真是個好東西 唔可以exact講到係我心目中top幾嘅韓劇 但肯定係最top 佢出色在所有線都好完整好完滿 各位主角配角嘅感情線 每隻鬼嘅故事 全部都寫得好好 煽情但唔過火 帶到啲message出嚟又唔覺得over 今次睇 發現「슬픈」悲傷呢個字嘅出現頻率實在有點高 不論係對白定ost歌詞都不斷不斷出現 呢套劇由一開始就註定會係悲劇 不論係前世嘅恨定今刻嘅愛 都冇辦法可以逃過悲傷嘅結局 滿月同燦星 好登對又好美麗嘅名字 但從來滿月同燦星都唔可以同時間出現 月亮咁光亮就唔會睇到星星 要睇到星星就要月亮走埋一邊 所以呢兩個名真係改得好好💦💦 必須等待一千三百年先可以重遇嘅緣分 希望下一次相遇唔需要相隔咁長時間 💜 9.6/10

終於有一次可以睇完本書即日做record 繼續係韓國文學系列 今次係非常唔同面向嘅作品 早就見識過呢本書名 因為太特別太難以理解所以印象深刻 上個禮拜喺圖書館意外見到 用咗三日就完讀 讀正文之前有各界推薦同導讀 見到不只一個人話睇到落淚 當時我憑住佢哋嘅隻字片語同書背嘅簡介 自大地覺得： 呢啲內容 不至於搞喊我掛 結果 呢本由四個故事組成嘅中篇小說 每一個故事讀到最後我都不能自控地心痛到喊 我唔係讀愛情嘢容易喊嘅人 比起愛情 親情友情同寵物情更容易觸動我 對上一次因為感情線而喊而書好似已經係五六年前嘅英文小說 粗暴嘅總括：呢本就係講述分手故事嘅小說 作者係朴相映 主角姓朴 叫映 用第一人稱寫 好難唔將主角代入為作者本人嘅故事 一邊睇一邊覺得： 啊作者真係一個好差勁嘅人 點解可以咁樣過日子 啊作者嘅日常真係好糜爛 啊作者咁做絕對係一個渣男 啊作者⋯⋯唉 睇完第一個故事〈在熙〉就已經覺得佢就係我最中意嘅一篇 睇完全本書之後都冇改變呢個想法 映係生理男性 同性戀者 在熙係生理女性 異性戀者 映嘅大學同學兼三年室友 佢哋兩個之間嘅感情好微妙 好親密 而且無以名狀 冇任何一個名詞可以適當準確地形容佢哋呢種關係 （絕對唔係曖昧 完全沒有一絲愛情嘅成分） 甚至中文書名完全就係為呢個故事而設： 在熙—主人翁 燒酒—映同在熙都係重度酒精愛好者 我—映本人 全書主角 冰箱裡的藍莓與菸—在熙會買藍莓畀映食 映為咗報答在熙就會買菸送畀在熙 擺喺雪櫃 因為在熙中意凍冰冰嘅菸嘅感覺 啱啱講咗 呢本係講分手嘅書 所以在熙都不例外 都同映分咗手 因為在熙要結婚 要脫離呢個同居室友 第二個故事係我睇到最一頭霧水嘅 但好多人都盛讚呢篇 主要係 我完全唔get映嘅呢位戀愛對象 反而我更focus喺佢同母親之間嘅關係描寫 映對呢個世界有好多不滿 從佢嘅反叛同幾乎沒有嘅貞潔可以反映出 而呢一切佢歸咎於自己嘅母親 到佢阿媽癌症末期真係死到臨頭嘅一刻 佢最最希望嘅係聽到阿媽嘅一聲道歉 非常可惜地 「媽媽完全不給我任何可憐她的機會，簡直太有才華了。」 最後兩章其實都係同一個故事 關於我最中意嘅角色：奎浩 一個可愛單純率直勤力但少少蠢嘅人 當然最後都係分咗手 呢段已經係呢本書裡面窺探到嘅映嘅唯一一段稍微正常少少嘅愛情關係 睇到最後不斷喺內心問如果同點解 點解唔聯絡？點解唔追？ 如果有會點？ 映嘅生活非常糜爛 如果唔係將佢嘅呢啲經歷寫成呢本咁出色嘅書 可謂人生一事無成 人生幾乎只有酒精同性愛 啊 冇錯 性愛係呢本書一個頗重要嘅元素 但絕不色情 因為只係平淡地誠實地描述映呢個人嘅日常 而做愛就係佢嘅日常 （同時）輾轉於不同男人之間就係佢嘅日常 毫無鬥志 污糟邋遢 非常不討喜嘅男主角 甚至讀到佢感染「凱莉」嘅時候有一刻覺得佢抵死 一刻咁大把 但係 作者實在非常成功地將映嘅悲傷不著痕跡地滲透出嚟 導致每一個故事、每一段關係嘅結束 都牽動到讀者嘅情緒 前面有幾好笑 後面就有幾悲傷 係真係覺得心痛嗰種 必須闔埋本書喊一陣發洩下先嗰種 唔知點形容呢本書 好神奇 第一次睇咁真實嘅描述同性戀者喺當代社會嘅情感生活嘅小說 真實到我冇辦法不相信呢個就係作者本人嘅經歷 同時唔希望呢個爛人映就係作者本人 愛情小白居然可以睇呢本分手書睇到喊 真係好厲害 睇完先明推薦序同導讀啲人講乜 因為自己都親身感受到了 擺雪櫃嘅藍莓同煙 我應該會記一世 🧡 9.6/10

2026年第一套完成嘅劇 為新一年開咗好好嘅頭 因為係優秀嘅作品🖤🖤🖤 《怪物》 聽過睇過好多人推薦 終於趁住舊年重溫完德魯納開嚟睇同樣係呂珍九主演嘅懸疑題材故事 好想多啲人睇到所以唔開劇透mode 盡可能喺唔劇透嘅情況下講講感想 循例自己寫之前睇下其他人點寫先 第一次見到「虎頭龍尾」呢個term 可見評價係幾高 而我覺得查案題材做到呢點係更加難 因為佈局同製造問號相對容易 但set到格局咁大 點收科先可以令觀眾接受 唔會覺得有太大落差之餘覺得心理平衡 警惡懲奸又唔太TVB大團圓結局 就好困難 而《怪物》係出色嘅 唔起眼嘅文洲市 裡面更唔起眼嘅萬陽邑 係呢個故事嘅舞台 首爾唔可以係呢個故事嘅舞台 釜山都唔得 必須要係好細嘅小城鎮 荒地多過建築物 遠離大城市嘅地方 因為需要全個鎮裡面嘅人都互相認識、建立到幾乎係親人嘅關係 呢個故事先成立 20年前 呢個細到藏不住秘密嘅小城鎮接連發生咗好幾宗女性失蹤案 懷疑係連環殺人犯所為 其中一個失蹤者係當年20歲嘅李東植嘅龍鳳胎妹妹 但李東植係連環殺人犯嘅嫌疑犯 一直搵唔到確實證據 妹妹亦一直失蹤 生唔見人 死唔見屍 就咁過咗20年 20年後 李東植係個警察 輾轉又返返嚟萬陽做派出所員警 偏偏呢個時候 萬陽時隔20年再次發生疑似謀殺嘅女性失蹤案件 一個動機不明嘅警察 韓洙元 由首爾調職過嚟呢個鳥不生蛋嘅萬陽派出所 所長安排洙元同東植做巡邏partner 一次又一次「意外」同各宗失蹤案同屍體發現案有關 全套劇嘅重點當然係搵兇手 20年前嘅兇手同20年後各兇手係咪同一人？一個人定多過一個人？ 東植妹妹嘅屍體到底喺邊？ 兇手嘅殺人動機係咩？ 以上 當然係重點 但我覺得可以將《怪物》分做上下兩part 而以上只係上半part嘅劇情重點 揭露兇手真面目之後先係套劇嘅精華所在 各人埋藏心底長達20年嘅秘密到底係咩 有冇不為人知嘅關係同合作 眾人如何不惜一切代價甚至自己都成為怪物咁去搵背後嘅怪物到底係邊個 冇辦法好似其他人咁仔細同深入分析呢套劇 講少少我覺得佢好想講嘅主題 一、家人 洙元嘅爸爸係韓國警察廳嘅候任廳長 洙元自己又係能力優秀嘅年輕警察 內外兼備嘅佢 本來完全係警界嘅明日之星 人生大贏家 但事實上佢同爸爸嘅關係唔好 甚至去到後半段 洙元係最希望同最落力要毀掉爸爸人生嘅人 東植話洙元係個完全不賦予任何意義畀「家人」嘅人 偏偏 故事嘅舞台 萬陽 就係一個彼此冇血緣關係都親近到好似家人嘅地方 顯得初來乍到嘅洙元喺呢個地方更格格不入 同時擔任一把刀 毫不留情地割開萬陽眾人努力收藏嘅遮羞布 係咪真係冇秘密？係咪真係完全信任對方？ 一切都係因為洙元嘅介入而開始 萬陽人彼此間嘅羈絆好深 bonding好強 呢點喺好多地方都顯現到 成日聚餐 個個都由細識到大 一方有難八方支援 相比洙元、佢阿爸、檢察官呢三個之間嘅相處又係好大對比 編劇同導演多番透過呢兩個地方對家人嘅理解、點對待所謂嘅「家人」 傳遞呢套劇嘅主題 好有張力 好好睇 二、法律 就快對韓國嘅法例清楚過對香港法例嘅了解😂😂 因為睇得多韓劇同懸案YouTube片 其中最常提到嘅就係失蹤 事實上人口失蹤係冇得報案嘅 因為基本上都係視作離家出走處理 由呢點引申到套劇其他嘅情節 多次強調法律嘅無力 東植之所以變成而家嘅癲佬 其中一個原因就係法律嘅無力 冇辦法搵到當年殺死自己妹妹嘅兇手 冇辦法好好制裁罪人 反而令無辜嘅人承受莫須有嘅污名同壓力 所以佢先投考警察 想用自己嘅力量向兇手同世界報仇 洙元本來係企喺東植嘅對立面 東植好多時都漠視程序正義 成日喺辦案過程中踩過界做不合法嘅事 洙元每每都會制止 但後來洙元都慢慢意識到原來佢一直信奉嘅法並唔係完美 有好多嘢冇辦法透過法律處理 有好多不公不義冇辦法透過法律伸張 呢個時候 洙元會如何選擇？ 心中重要支柱同信仰都一一倒下時 佢會唔會都一同崩潰成為怪物？ 頭幾集嘅疑團係多到覺得有少少拖戲 而且兩位主角嘅性格都好不討喜 所以一開頭可能有少少趕客 但拜託各位一定一定要捱落去 因為呢套劇真係愈睇愈精彩 可疑嘅人每集都換一個 終於鎖定嫌犯之後 導演話你知 sorry 真正嘅謎團而家先正式展開 不斷拋出拼圖 直到最後一集先完整交代清楚橫跨二十年嘅案件sss 演技全員在線 雙主角都極度優秀 李東植係痴狂嘅怪物 韓洙元係執著嘅怪物 其他角色唔講得 但大家都代表不同方面嘅怪物 講人喺利益面前 關係係如何虛偽 信任係如何脆弱 同時講人對家人、朋友、拍檔嘅bonding係如何強到成為自己最可靠嘅後盾 喊咗兩次 一次係大夥兒回憶一位死者生前嘅事 邊舉杯邊講對白： 「你們很有錢嗎？」 「沒有，大哥！」 「那你們健康嗎？」 「不，大哥！」 「那人生有甚麼大不了的嗎？喝吧！」 「喝吧！」 一次係最後最後一幕 東植同洙元分別講嘅說話： 記得好好食飯，好好睡覺，好好拉屎。 兩段都係刻劃緊好可貴好動人嘅bonding😭😭😭 虎頭龍尾唔係浪得虛名 呂珍九係實力派 睇到最後我發現飾演東植嘅演員申河均有啲似雷格西😂😂😂😂 非常非常推薦 🖤 9.4/10

想拜讀好耐好耐好耐好耐嘅作品 終於因為睇完極速一百米嘅電影而下定決心要開呢本關於跑步嘅小說 雖然一個係短跑一百米 一個係長跑箱根驛傳 箱根驛傳 應該不論對跑步嘅人定冇跑步嘅人嚟講都係一件好神聖嘅事 ——十個人接力跑半馬 而且唔係市區平地 而係跑上山 箱根山 半馬已經癲 半馬接力係咩概念？？？ 睇之前對箱根驛傳嘅比賽形式有個大概嘅概念 睇書先知呢件事最癲嘅係時間 通常啲人跑10K 一個鐘內完成都已經算好 半馬21K就兩個鐘至兩個半鐘左右 但箱根驛傳嘅選手 每一區嘅時間都基本上唔會多於一個半鐘 甚至講返參加預賽嘅資格（因為太多參賽隊伍 所以要先參加預賽挑選最快嘅10隊參賽） 每個人都必須要有5000米17分鐘內、或10000米34分鐘內嘅正式比賽record 10000米 即係10K 一般人一個鐘都算快嘅成績 連入圍資格都冇 所以書裡面形容跑手嘅速度仲快過單車 我真係信 我呢個完全唔跑步嘅人真係無法相信呢個世界上居然有人可以做到呢件事 大概三分鐘跑完1K 然後維持20-23K 中途上斜落斜 零下嘅溫度著短衫短褲跑地下結冰有雪嘅山路馬路 真係完全想像唔到 講返故事 箱根驛傳必須由來自同一大學嘅10位田徑隊選手完成 而《強風吹拂》就係圍繞住從來冇參加過箱根驛傳、甚至冇長跑田徑隊員嘅寬政大學 呢十個人本來只係單純嘅室友關係 一齊住喺破破爛爛嘅竹青莊 突然有一日 大佬青瀨話要一齊參加箱根驛傳 呢十個人裡面只有青瀨同新室友阿走平日有跑步習慣 亦即係 呢班由跑步門外漢、從來冇接受過正式跑步鍛鍊、甚至從來冇認真跑過步嘅人組成嘅寬政大隊伍 就憑住不知哪來嘅勇氣同鬥志 同其他田徑大學一齊跑箱根驛傳 故事就係講呢十個人如何備戰同如何應戰 主角當然就係青瀨同阿走 唯二識跑步嘅人 但兩人都因為跑步而留下啲陰影 青瀨有膝蓋舊患 阿走被以前嘅田徑隊員排擠 發生過暴力事件 各人如何克服自己嘅難關 一步一步完成自己嘅路程 從中得到教訓同體悟 就係呢本書好睇個地方 實在太欣賞青瀨同阿走之間嘅惺惺相惜同相處 阿走成為青瀨下定決心拉全竹青莊嘅人落水一齊參加箱根驛傳嘅最大動力 青瀨又係令阿走重新體會跑步到底為何物嘅靈魂人物 書裡面嘅角色不斷問： 到底跑步嘅目的係咩 到底我為咩而跑？ 跑步嘅真諦究竟係咩？ 十個人 得到十個不同嘅答案 而一百個讀者 又會有一百種解讀 竹青莊十個人嘅程度、長處都不一 有人速度快啲 有人擅長跑上坡 有人下盤穩陣 有人應變能力強 所以即使呢個比賽有20支隊伍 每區每個選手都喺同一條賽道上比賽 終點同目的地看似都一樣 但其實贏嘅定義對每位選手而言都不同 就好似人生 大家都係過自己嘅一生 遠睇人人都差不多 但何謂成功 其實人人都唔一樣 每個人嘅目標都唔同 所以速度快唔係跑步唯一準則 賺幾多錢 人際關係有幾好 有幾幸福 都唔係人生唯一準則 認清自己為何而跑 為何而活 先係重點 未完 更重要嘅係 認清目標之後你會發現 呢個目標根本就遙不可及到永遠都冇可能達成 而呢點係好事 正因為唔會達成 所以先會不斷有「下一次」嘅努力同嘗試 明明只係講跑步 全本書由第一章開始到最後一章都係圍繞住跑步 但透過跑步而傳遞到畀讀者嘅message遠超於跑步 只能夠自己讀自己體會 有鼓勵人心 有熱血沸騰 有搞笑 有感動 非常喜歡的小說作品 仲有改編嘅動畫 可以加入待睇清單 💛 9.2/10

喺threads見到有人話呢套經典終於上咗N記 聽過佢嘅名但冇睇過 好多時間嘅我今日終於睇咗了 事前冇查過劇情大綱 所以好surprise 居然係用poetry包裝呢個主題 好睇 喜歡 但我覺得我睇唔明 尤其係裡面嘅對白同詩句全部都好快咁讀出 我都未消化完 又有新嘅劇情發展😂 必須重睇起碼多一次 關於勇敢活出自己嘅人生 關於服從 關於反叛 關於詩歌 關於文學 關於藝術 關於 carpe diem 🤍 9.2/10

第一次喺度講YouTube片 可見我真係覺得佢好值得記錄同分享 從來都唔係試當真嘅fans 連觀眾都唔係 只係睇過口試王同墨魚遊戲 對許賢嘅認識就僅限於認識 因為睇過《公開試當真》所以對佢認識又多少少 其餘一概唔清楚 一連三集嘅《21K咋嘛》記錄咗許賢人生第一次跑半馬 比賽前六星期先開始練跑到比賽當日嘅過程 唔係因為對呢個人感興趣而開嚟睇 而係因為我仲喺強風吹拂x極度100米嘅跑步熱潮當中走不出來 見到有長跑topic就自然想睇 點知比想像中好睇太多 因為覺得自己人生好多方面都好𠽤、想有啲突破有啲挑戰 所以幫自己報咗半馬 而知道正式比賽前六星期都從來冇練跑 喺咁嘅前提下join running club、跟教練跟pacer上課表練習 去到跑完21K摸終點線 一路上好多思考 許賢用鏡頭將自己嘅訓練同思考分享畀觀眾 觀眾就可以好似陪同許賢一齊經歷以上種種 好中意許賢（喺呢幾條片）嘅地方係 佢可以好自然、好淡淡然咁講啲好有哲理嘅說話 有insight得嚟唔造作唔刻意 冇說教feel、唔似度咗好耐背稿讀出嚟 真係由心而發當刻諗到咩就講咩 好似言之無物但又幾有意思嘅說話 真係唔係人人做到 就係呢啲好似廢噏但又幾好聽嘅說話令呢幾條片咁好睇 跑步到人生 如何面對自己面對他人 面對瓶頸面對難關 唔識概括咩中心思想 建議自己去睇

因為金鐘獎入圍好多項 所以又挑起條根再睇多次 啊 都係覺得好好睇呢🥹 我心目中演員做得好嘅最高標準就係 佢令我相信佢就係呢個角色 呢個角色真實存在 而我只係透過呢套作品窺探到佢生活嘅某一個段落 而《影后》呢套劇 每個角色 係每個 都好說服到我佢哋就係真實存在嘅人 演員 經紀人 幕後製作 酒店員工 全部都係真實存在嘅人物 所以整個製作團隊 幕前幕後 全部都太厲害了 薛亞之同周凡以至女演員四人組嘅bonding都令人非常動容 飯局跳舞一幕 兩次睇兩次都落淚 周凡同流氓講成年人故事嗰段又係 喊到傻 周凡同流氓呢段大概係全套劇令觀眾最滿足最滿意嘅感情線 流氓嘅直球我畀一百分 最後用〈勇氣〉表白又係全劇經典 希望流氓可以成為接住周小凡嘅人 之所以咁中意呢套劇 係因為佢好真 但又好搞笑地其實我唔知到底台灣嘅演藝圈係咪真係咁運作 妙就妙在 佢完全說服到我「嗱 演藝圈就係咁㗎喇」 演員嘅掙扎同困難 經紀人嘅辛苦 導演製作人幕後團隊嘅工作 feel到導演aka編劇擺咗好多佢喺呢個圈打滾多年嘅所見所聞入去 有想控訴嘅嘢 用嘲諷取笑帶過一切辛酸不公 尤其focus喺女演員呢個身分 有好多唔合理但又好頑固嘅標籤同期望 希望佢丟出嘅呢粒石仔可以喚醒到業界嘅少少少少反思 拜託 楊謹華透過周凡攞影后 拜託 拜託 拜託 ❤️ 9/10

一本講現代飲食文化出咗咩問題、點解會出現呢啲問題嘅書 涵蓋好幾方面： 全球飲食單一化 — 全世界都食緊差不多嘅嘢 肥胖人口成為主流 — 其實錯不在自律或者懶惰 更應該負責任嘅係政府同食品商？ 現代人愈食愈多肉類同蛋白質 主食呢個概念逐漸消失 — 冇澱粉質嘅飲食先算係「健康」 充斥高度加工、高油高脂高鹽高糖食品 — again 政府同食品商嘅錯 etc 特別中意佢講肥胖嗰個chapter raise out咗好多發人深省嘅提問 當我哋可以輕易喺美人魚連鎖咖啡店買到一杯有102g糖嘅飲品 行入每一間超市便利店都可以喺cashier櫃檯搵到糖同朱古力 乜肥胖真係純粹係個人唔夠自律同懶惰而造成咩？ 美國有三分二肥胖人口 有冇一種可能係 其實另外嗰三分一瘦人先係「唔正常」嘅一群？ 我哋一方面不斷譴責歧視肥人 肥胖污名化嚴重到有學者話喺肥胖或過重喺美國不單止有害健康 更係「應受道德譴責」 另一方面毫無意識搞到現代飲食文化烏煙瘴氣嘅幕後黑手係邊個 絕口不提呢種垃圾食物隨手可得嘅有毒環境 究竟係推緊邊個落地獄？ 仲未提貧窮同肥胖嘅關係 係啊係啊買菜平過買肉 但你諗真啲 新鮮蔬菜抵食定高脂高鈉罐頭肉抵食？ 工時長人工低 屋企連proper廚房都欠缺嘅人會唔會喺屋企煮飯？ 喺外國仲有另一個情況：食物沼澤 唔係沙漠 因為並非0食物選擇 只係有得揀嘅都係毫無營養價值嘅速食 呢個情況尤其出現喺收入水平較低嘅城市同地區 都好make sense 學歷高人工高嘅社區有啲賣有機農產品嘅小店好正常 主要係有色人種住嘅移民、外勞貧民區 大概只係得M記同pizza hut 呢啲情況 我哋仲可唔可以咁理直氣壯理所當然咁指住啲肥人話 你哋肥係自己攞嚟嘅？ 原來自己對呢啲topic嘅書都真係幾感興趣 以後會借多啲嚟睇 💛 9/10

其中一套今年入場前最期待嘅電影 口碑好到完全唔知唔識歌舞伎都買飛睇 先講瑕疵 有某啲劇情轉折得好奇妙 尤其係俊介消失十年後點樣突然重返梨園 同埋沒落後嘅喜久雄點樣無啦啦同俊介組返半半組合 好莫名其妙 睇過幾篇影評都話電影簡化咗原著小說嘅劇情 唔知呢兩part係咪都係cut咗嘅部分 如果填返呢兩個窿窿 敘事會完整好多 喜久雄嘅感情線都係感覺上被取捨嘅一part 呢點連帶成套戲對所有女角嘅描寫都非常不足 已經分唔清係時代背景嘅普遍女性都係只為男人生存、完全冇自我 抑或係電影只想講男人世界嘅男人故事 裡面所有嘅女性角色都好卑微 冇了 冇其他瑕疵了 極致簡短嘅觀後感 三隻字可以總括： 毛管戙 好多幕都好震撼 。二半組合嘅「出道」作品 鏡頭跟住佢哋升上去 第一次見到台下咁多觀眾 。紅衣突然換白衣嘅換裝（抱歉只能用非常通俗非常門外漢嘅方式形容 因為我真係0識歌舞伎 。半二郎臨死前不斷呼叫自己個仔俊介嘅名 對歌舞伎完全唔認識 但呢套戲就係可以令所有門外漢都睇到目瞪口呆 內心不禁肅立拍掌叫好嗰種程度 真係靚得太誇張 但佢係淒美孤高又有少少華麗嗰種美 同主角喜久雄畢生追求嗰幀風景非常吻合 ——櫻吹雪 而櫻吹雪又無比貼合片尾曲 所以片尾曲係將結局嗰種毛管戙一直延續到曲終 實在揀得太好太好 片尾曲好加分 有一個鏡頭覺得拍得真係好好 劇場外春江拖住俊介隻手一齊離開 劇場內喜久雄捉住演員隻手奔跑 呢度就開始feel到唔對路（果不其然） 亦係係由呢度開始 我就覺得喜久雄呢個人一生都好孤獨 呢種只有自己一個嘅孤獨係我對呢個角色最大嘅感受 細細個就親眼目睹自己父親被槍殺 十五歲開始寄人籬下 生活重心只有女形嘅不斷練習 好努力好努力精進自己 但永遠都有道名為「血脈」嘅牆擋住自己 終於得到師傅認同 傳個名畀自己 點知師傅臨死前最記掛嘅依然係技藝不及自己、消失咗十年嘅親生仔 師傅一死就完全冇人理自己 渾渾噩噩過咗幾年 終於有機會可以上返舞台做主角 畢生拍檔兼兄弟兼對手俊介又糖尿病惡化需要截肢 後來走埋 仲未計由細識到大但最終都係離自己而去嘅春江、以及其他唔知有冇放過喺心上嘅女人 親生父母、幾乎係繼父繼母般存在嘅師傅師母、十五歲開始就一齊練習一齊生活嘅俊介 佢哋嘅離開一半係命運一半係無奈 而妻女就係喜久雄自己嘅選擇 因為對於成為全日本最好嘅歌舞伎嘅慾望同決心太強 強到其他事根本不值一提 近乎冷漠無情嘅程度 所以最終喜久雄身邊一個人都冇 又或者 佢身邊根本從來都係一個人都冇 冇人冇物 人生只為追求女形同演技嘅最高境界 喜久雄嘅人生實在孤獨到令人痛心 所以佢歌舞伎嘅表演永遠都帶一種淒美感 喺血脈世襲重要過技藝高低嘅歌舞伎世界 喜久雄天生就註定係nobody 所以佢同俊介講「我恨不得大口大口飲下你嘅血」應該係真實諗法 一個有技巧有野心嘅演員 只係欠缺一個名演員父親 只要擁有俊介身上流嘅血就可謂所向披靡 有乜辦法唔恨俊介 同理 俊介有天生嘅優勢 半路殺出呢個執返嚟嘅養子徒弟 叻過自己 父親重用佢多過自己 搶走本來屬於自己嘅一切 有乜辦法唔恨喜久雄 佢哋兩個呢種又愛又恨嘅複雜關係 又係令人好痛好痛 又講下製作 睇credit就已經留意到 攝影係外國人 維基查到係突尼西亞籍嘅攝影師 好有趣 居然係由一個外國人將日本文化中最最精髓嘅藝術拍到咁唯美 另一樣就係配樂 歌舞伎當然係用返日本傳統嘅樂器 但偏偏情感去到最最高潮嘅時候 好多幕都用管弦樂 情感澎湃嘅strings一響起就會令我即刻抽離 ：啊 我唔係呢套劇目嘅觀眾 而係《國寶》呢套電影嘅觀眾 《國寶》唔係一套歌舞伎 而係一套講歌舞伎、講演員如何追求演技最高境界、講喜久雄嘅電影 所以用最適當嘅電影語言去講導演想講嘅故事 最可以同觀眾connect呢種情感嘅就係管弦樂 好欣賞好欣賞呢種做法 用得唔多 但用親都好到位好準確 數唔清呢三個鐘喊咗幾多次 睇戲喊唔係咩罕有事 但呢種覺得不忿痛心可憐同情嘅眼淚真係第一次體驗 可以透過電影capture日本文化中咁獨特嘅一種國寶級藝術 傳遞到當中嘅辛酸無奈、淒美孤高 仲要成功到令海外觀眾有機會欣賞呢套作品 所有嘢都好唔容易 本身以為紋身會有後續伏筆 講如何報恩 送蛇定送老鼠 但最後都係冇交代 或者喜久雄呢位演員嘅一生就係最好嘅回答 冇提及過演員嘅演技 只能講佩服 《怪物》嘅黑川好驚艷 完全係前途無可限量 橫濱流星化妝後完全認唔到係佢 ❤️ 8.8/10

從來都冇睇賀歲片嘅習慣 亦從未試過初一同屋企人去戲院睇戲 今年老竇突然興起話要做下啲家庭活動 所以就開咗齋😂😂 有啲戲有啲劇本係可以令你無視佢嘅沙石 唔係話完美 但就係夠好 金多寶就係呢種戲呢種劇本 係我心目中賀歲片應有嘅溫度同立意 屋企人就係咁 笑下喊下 呃下𠱁下 鬧下攬下 💛 8.5/10

睇完第二季當然要睇第三季😂😂😂 用國家分隊比賽係另一種好睇 因為即使第一二季都有隊際比賽 隊員組合可能會改變 但國家team一係全留一係全走 而且背上國家榮譽嘅戰鬥一定係更有火 雖然唔太中意某啲人實在有啲太目中無人 但賽後見到各位嘅IG好似都真係可以建立跨國友誼 真係不得不佩服韓國隊嘅實力 斷過腳腕骨嘅仁兄連贏兩季 點搞🔥🔥🔥🔥🔥

近年睇過最滿意嘅Disney/Pixar電影 愈嚟愈覺得D記唔適合講啲大道理故事 講返呢啲大路又永遠可以講落去嘅友情同伴大愛捨己為人就係D記嘅拿手好戲 （來自吉卜力打手的大膽發言） 好完整嘅故事 所有嘢都睇得好舒服 每次睇呢啲外國動畫作品都會特別佩服本地嘅製作團隊 點樣透過劇本同配音令個故事更引人入勝 再昇華到3-80歲都理解又好笑 真係好唔簡單 大大的RESPECTTTTT 因為真係唔會有唔get嗰嘅地方 所以都冇咩好討論😂 就係一套好舒服好smooth嘅輕鬆好作品 我buy蘿蔔妹&橙色大狗係純粹的partnership🤜🏻🤛🏻🤝🏻 順便向中意Zootopia世界觀嘅所有人推薦另一套動物城市物種平等嘅日本動漫作品： BEASTARS 係大灰狼x侏儒兔嘅combo 不過後來你會發現兔仔係第三者 鹿先係真愛😌 🧡 8.6/10

終於睇咗呢套聽過好多次嘅神劇 女主角第一集死咗之後就開啟佢嘅重生之旅 重複過幾次第一世 每次都有啲改變 同新奇有趣嘅主題唔一樣嘅係 成套劇嘅節奏都係偏慢 用兩個字總括就係「日常」 冇試過睇一套作品會focus講咁多日常瑣事同細節（然後發現都係小伏筆） 可能有人會覺得悶 但我覺得好好 真係好似睇住主角過佢幾段人生咁 。 劇情重點之一當然就係主角友誼團 第九集我係睇到喊的 活咁多年 輪迴人世咁多次 就係為咗救第一round嘅死黨一命 為此甚至不惜放棄之後幾round同佢哋成為朋友嘅機會 最後大團圓結局非常好非常圓滿 。 睇嘅時候不斷思考人生 譬如係自己會唔會想重複活多次呢世呢？ 會唔會堅持輪迴到下世可以繼續做人呢？ 其實我想唔想繼續做人呢？ 點解我哋覺得做人好呢？自己因為我哋呢世係人類？ 即係如果我呢世係隻青蛙就會理所當然覺得青蛙嘅命係最好？ 如果我可以活多次呢世 我會唔會改變呢？改咩呢？ 諗下都覺得有趣✨ 。 。 說不上係神劇 但睇得好舒服好enjoy 🤍8.6/10🤍

見到有人推薦所以睇嘅美劇 一集大概一個鐘 total得8集 係可以輕鬆笑住追嘅懸疑查案題材作品 首先setting係白宮已經好有趣 我對白宮嘅認知係0 所以套劇點塑造白宮我就點相信😂 喺一場為澳洲首相&外交官舉辦嘅國宴上 白宮總管家發現陳屍喺樓上嘅遊戲室 迅速請來聽聞係the best detective嘅主角Detective Cupp 然後當晚在場嘅所有人 包括全部staff同賓客 包括美國總統同澳洲首相 都要留喺白宮直到宣佈解封為止 事件就圍繞住Cupp如何喺幾乎0科學蒐證嘅情況下 純粹靠推理同提問搵出兇手同犯案過程 前排先睇到一個講法係 現代嘅推理故事都好無聊 因為科學太厲害 所有嘢都講證據、指紋、血跡、DNA 可以畀偵探發揮嘅空間根本少之又少 所以要寫出優秀精彩嘅推理作品 必須去與世隔絕嘅荒島 而呢套劇正正就係精彩在唔知點解好似冇科學偵查參與嘅部分😂 除咗非常初步嘅死因推測之外 乜都冇 指紋血跡乜都冇查 可以話唔make sense但都因為咁 呢個故事先成立 先展現到主角嘅魅力 主角係個觀鳥愛好者 成日無啦啦都講雀仔 但又都好神奇地係同案件有關 佩服編劇導演團隊嘅腦洞 係幾耳目一新嘅作品 用一個字形容呢單案就係chaotic 用兩個字形容就係鬧劇😂😂😂 🤍 8.4/10

緊接第一季睇嘅第二季😂 阿莫帝真係由一開頭就睇好嘅選手 腳腕骨斷過都可以練到呢種體能 真係strong到不得了 令我覺得其實少少傷真係冇咩事 睇下佢 有咩做唔到