香港叫《出精特工隊》，有啲位同廣東話對白確實幾好笑，但如果用劇情同性教育角度睇就唔算好掂當，我覺得佢最有用嘅資訊就係開頭果一分幾鐘嘅精子結局短片。 另外，呢套戲嘅歌都係好夾硬黎，配音方面呢套配音嘅演員同網紅陣營其實人多勢眾過《世外》，但各有不同問題。我覺得《世外》配音嘅情況係演出者配音經驗及技巧不足，演繹唔到角色嘅心態變化，而呢套《出精特工隊》嘅情況係啲粵配對白同歌詞有時係Kam得黎但唔好笑，好想融入本土特色，整啲得香港人先明白嘅嘢，但唔係好襯啲情景。 但最出事確實係性教育部分，尤其人體結構同繁殖方面嘅內容都錯錯地，而且我唔知佢究竟有冇心鼓勵啲青少年要做安全性行為。 - ******以下有劇透部分****** - 其實阿聰同麗莎互相表白咗先有性行為，都見到係有感情連結嘅性行為，而且仲做晒安全措施，阿聰用安全套，麗莎用埋殺精劑同事後丸，但竟然咁樣都中招有BB係咩事？！ 我知唔係有安全措施代表100%避孕成功，但一對青少年情侶做三重措施都懷孕，機率真係超級微，而且會唔會令少年觀眾覺得如果點都有機會中招，我有冇必要咁認真做措施？ 最離譜係成功中招果條精子，係阿聰用後入麗莎肛門做愛形式中招？？？點解肛門最後可以通向子宮，真係百思不得其解，我差啲以為自己Bio真係咁差，好奇心驅使下我真係search肛交同懷孕嘅關係，又真係發現有醫生講都有機會，但屬於極罕見情況。 咁即係阿聰嘅精子真係超級勁啊！ 最後兩個人知道自己負擔唔到新生命選擇墮胎，其實都係負責任嘅表現，而且可以睇到兩個人係認真交往，會互相關心，唔係為咗性愛先一齊，仲會一齊做其他事。 本身結局處理可以更有意義，但安排醫生用載歌載舞形式講墮胎choice，成件事變得好唔嚴肅，的確有種中咗都唔緊要，落咗就算負責嘅不成熟觀念。 呢齣戲唔值用超過$50的價錢去睇。