如果問我有咩長篇劇集係人生必睇，絕命系列相信會係我首選。《Breaking Bad》嘅出色我相信唔使我多講，香港都好多嘅討論（最近更加有「港版Breaking Bad」—K.Kwong, 雖然我就唔覺得兩者有好相似，但只少我知道好多人有睇《Breaking Bad》）。相對《Better Call Saul》喺香港就少好多討論，但睇完之後，我個人係更加鍾意後者。 有睇《Breaking Bad》嘅都知道Jesse同Saul喺Walter White嘅「王國」入面有幾重要，而《Better Call Saul》就係講作為王國嘅「法律顧問」—Saul，係點樣一步步成為一個專走旁門左道嘅「黑道律師」。我相信應該冇咩幾多個有意成為律師嘅人係一開始就以專幫黑道打官師做目標，Saul都一樣。更甚嘅係Saul本身就唔係叫Saul Goodman，而係Jimmy McGill。作為同系列嘅作品，開《Better Call Saul》之前，我有諗過會唔會同《Breaking Bad》一樣：Jimmy都係身不由己，逼不得已下成為Saul。如果係咁，我一定唔會特別推呢個系列，甚至畀咁高分。 如果話White係不得已下成為Heisenberg，咁Jimmy係事必成為Saul。觀眾用並唔多48小時睇住Jimmy由Slipping Jimmy變成Jimmy McGill，再由Jimmy McGill進化成Saul Goodman，再從Saul Goodman退化成Gene Takavic。喺成個「演化過程」，觀眾會知道主角點樣一點一滴咁失去重要嘅嘢。幾乎係所有重要嘅嘢都喺過程入面失去，最後剩低可能好多人都覺得最重要嘅嘢—名利。我咁樣講可能會令人覺得：吓？！又係老屎窟道理？NO NO NO!!! 劇集有講嘅絕對more than that！！ 長篇可以做到唔爛尾已經好難得，《Better Call Saul》唔爛尾之餘仲做到愈後愈精彩：個首尾呼應、個貫穿成個系列嘅Time machine、啲鏡頭運用通通都好出色，尤其係鏡頭，好耐冇睇過「用鏡頭成功交代故事」（用鏡頭同用畫面有些少唔同，畫面可以一幕cap出嚟睇，但鏡頭要整個段落講緊嘅嗰件事去睇）嘅影視作品。總之《Better Call Saul》可以話係重燃我當初追劇嘅樂趣。 最後要講嘅係，無論《Breaking Bad》定《Better Call Saul》都一樣，講人講得好好，嗰種好唔係單純講幾個角色講得好，而係只要出得場嘅角色，你都可以睇到角色獨特嘅性格、行為動機等等。對於好似我呢種「鍾意睇人」嘅觀眾簡直係「佳餚」。無獨有偶，冇幾耐之前香港有套又係好多角色（而且粒粒巨星），又有講到毒品嘅戲上，而唔少人都話作品入面嘅角色冇咩個人特色。雖然話劇同戲其實唔可以比較，但我個人覺得係可以參考下出色作品嘅處理方法/取捨。