本書有啲沉重。令我思考如果係個個情況下，我會唔會有勇氣去叫人走。良心同自己條命，邊樣重要啲？道德高地嘅說話人人都識講，但我有冇辦法、勇氣，唔加入呢啲所作所為？
本書雖然係講猶太人屠殺，但係唔係講德國人，而係講波蘭人。
一個在波蘭的鎮，一半係猶太人、一半波蘭人，兩方相安無事咗5百幾年，點樣在無德國納粹黨強迫之下，波蘭人自發殺咗人地全家，成個鎮一半人口。但明明前幾日，仲可以互相交換物資。
本書利用當年嘅證詞、好彩逃離到嘅當事人嘅回憶，去講返事件。（不過，作者都好公平咁講，證詞嘅限制，例如：當年調查人員對案件唔重視，令證詞有矛盾、受害人數數字矛盾、有可能屈打成招，調查時間短）所以作者用咗大量嘅資料去交叉比對。
令人覺得驚訝嘅係，本書岀嘅時候（十幾年前？），當事人仲未死，加上大量資料比對，值得採信。在波蘭政府主導之下，有相關嘅悼念活動、宗教彌撒，個個鎮嘅居民（波蘭人）堅決否認相關指控，更阻礙活動進行，阻礙者包含天主教方人士。
令我當頭棒喝，何謂良心。
睇到後段，見到好人無好報，有啲波蘭人幫咗猶太人，但係佢就比波蘭人排斥，要搬屋，搬完一間又一間，連下一代到受影響。
做咗正確嘅事，可惜無正義嘅果。
