終於睇完呢本買咗好耐但實際打開又冇乜動力睇嘅書🫣 全書圍繞一個轟動全球精神醫學同心理學界別嘅實驗同研究： 八個假裝自己有精神病嘅「正常人」成功瞞騙精神科醫生，入住精神病院，成為「精神病患者」，以正常人嘅雙眼觀察同記錄精神病患者到底喺醫院經歷緊啲咩 作者自己曾經被誤診患上嚴重精神病，食咗好多年精神病藥物，完全冇好轉跡象之餘甚至愈發嚴重 後來發現佢係免疫系統病，自己啲細胞不斷攻擊大腦導致一系列同精神病非常類似嘅病徵 作者因為自身經歷而對精神病好感興趣，並且好希望為患者發聲 透過深入研究呢個實驗，發現好多精神病、精神醫學、精神病院、監獄等背後嘅過去同現在 研究呢part係有趣嘅，但中間加插太多知識，所以前半段睇嘅時候真係有啲乏味 但我真係估唔到咁科普向嘅nonfiction都可以有劇情反轉 關於個實驗同研究，原來都係一場騙案 唔劇透，但真係好震撼，居然係作假寫出嚟嘅研究論文 。 本身對精神病可謂一無所知 讀到好多關於精神病嘅歷史 以前診斷同治療嘅方法固然之無法想像，例如係鑿穿頭顱釋放體內鬼魂惡魔、喪親導致情緒低落都係精神病 但更大感受嘅係，居然去到如此發達嘅現今世代，精神病人嘅待遇依然係荒謬地差 究竟何謂正常，何謂有病？ 如果精神病的致病原因都不外乎係大腦出咗問題、各種荷爾蒙內分泌失調等等，咁應該點界定精神病同生理病？ 好多好深刻嘅反思 雖然書好厚，中間有啲悶，但overall都係好正嘅exploration 。 。 有太多想分享嘅quotes repov有正式嘅引用符號實在太開心了

本來唔打算完讀前分享 但呢段文字實在太有感 呢本書係中意到搭飛機都要帶去睇 阿媽教落去旅行唔好帶圖書館借嘅書 萬一唔見就好煩 但 呢本真係好好好好睇

本身好期待嘅書 睇簡介係中意到去一拳訂嘅程度 睇完之後慶幸當初一拳話冇貨訂唔到 因為真係唔係咁值得期待🥲🥲🥲 主角成瀨係個好有趣嘅角色 會為咗證實頭髮生長速度係咪一個月1cm而剃光頭 人生目標係活到200歲 屋企附近嘅百貨公司倒數一個月倒閉就每日去打卡 不論性格定行為舉止都係好有趣嘅character 但可惜在本書發揮唔到 明明咁人物塑造咁好 成本書睇落就係唔特別 甚至可以話有啲悶 又或者因為睇之前真係好期待所以特別失望 💛 6/10

買畀朋朋嘅生日禮物 送之前自己讀一次先😎 意外地好中意呢 最大嘅感受係：啊原來古人都會有呢啲唔開心、抑鬱苦悶個情緒 理智上當然知道佢哋會 古人都係人 當然都會唔開心 但呢啲喺中文中史科課本出現嘅歷史人物 對我而言實在太遙遠 虛到某程度上好似神化咗佢哋咁 所以當知道佢哋都同樣有一般人嘅情緒、而佢哋選擇用詩詞抒發出嚟嘅時候 個感覺好神奇 而且身為精神科醫生嘅作者會解釋翻譯古典 啱曬我呢啲文言文文盲 用專業嘅醫學terms去分析古人嘅情緒同處境 順便科普情緒病嘅知識 呢個concept真係好正 仲可以睇到唔同人面對憂鬱嘅方法 睇佢哋點開解自己（成功或失敗） 順便開解自己 好睇好睇 好意外嘅收穫 🩵 8/10

今年其中一個閱讀目標係韓國文學 點知到五月先真正開始睇第一本😂😂 詩集 作者都出名 點知 嗯 都係少少失望 唔知係咪翻譯問題 硬係覺得怪怪地 不過都有好幾篇係有feel嘅 🤍 7/10

絕對係今年最愛嘅書之一 之前喺HyRead見到 通常見到有興趣嘅電子書都會去公共圖書館search下有冇先 點知真係有 終於借咗嚟睇 係比介紹更好睇更有趣嘅書！！！ 真係大推 我唔係歷史人 中學最憎嘅科目就係中西史 但呢本書係非一般嘅歷史書 作者用好幽默嘅筆觸寫人類歷史上各段錯得離譜嘅過去 最大嘅感受就係： 如果你想成為一個出名嘅人 只要做一件好錯嘅事就得 其實唔難 絕對唔難 舉啲深刻嘅例子 譬如原來美國曾經試過有河流著火 係 係河流 有水未乾塘嘅河流 而且不止一次 原因係條河有太多易燃垃圾 一個位意外著火後就全條河都著曬火 譬如中國嘅除四害運動 四害分別係：老鼠、蚊、烏蠅 同埋麻雀 「麻雀就是資本主義的爪牙」 讀到呢句嘅時候我literally笑咗出嚟 最終運動十分成功地殺咗15億隻老鼠、1100萬公斤蚊、1億公斤烏蠅、以及10億隻麻雀 又因為運動太成功嘅關係 幾年後旱災加蝗災 冇麻雀食蝗蟲 所以大饑荒死咗唔知幾多千萬人 譬如明朝有個皇帝喺宮內起咗個假得很真嘅市集 叫曬啲官員去扮檔主同平民百姓 為咗令自己可以體驗普通人出街買嘢係咩感受 埃及有個國王發夢俾獅子攻擊 第二日即刻去開羅動物園射殺全部獅子 又因為太愛自己部紅色Benz而下令全國人民不得擁有紅色汽車 土耳其有個總統好憎咖啡 下令土耳其境內禁止飲咖啡 甚至會喺夜晚著便服喺街度巡邏 見到偷飲咖啡嘅人就即場處決 曾經有一隻狗同一個足用藥粉brand喺民主選舉中當選成為市長/鎮長 二戰德國納粹有隻好先進嘅潛艇 因為廁所設計太先進 先進到冇人識沖廁 船長call咗工程師嚟搞 點知工程師錯手打開咗另一個閥門搞到隻艇充滿海水同排泄物 啲污水甚至滲入電池室搞到漏氯氣 冇辦法之下船長決定浮上水面 然後即刻被英國空軍戰機攻擊沉沒 比利時國王搞咗個慈善機構叫「國際非洲協會」 實際上就係將剛果變成一大片橡膠園 只要剛果人民冇達成生產目標就會斬手斬腳割鼻 斬落嚟嘅手一度成為當地士兵嘅貨幣 而呢個國王稱呼呢個地方為：剛果自由邦 講咗好多好多例子 睇書嘅話會有更多更多 除咗笑之外 其實有好多反思 點解會錯成咁？而家2025年嘅人類點解仲犯緊相同相似嘅錯誤？ 呢啲錯背後反映咗咩文化同價值觀？ 真心推薦俾所有人睇 🖤 10/10

睇完電影之後睇咗好多篇文章 知道佢拍電影前其實已經出咗本書 見到圖書館有就即刻預約 因為係睇完紀錄片之後先睇書 所以唔多唔少帶住啲期望去讀 本身以為會深入啲 結果反而係電影有更多資訊更豐富 可能因為電影拍到訴訟完結 但日文書係2017年就已經出版（如果我冇記錯的話 所以案件嘅後續發展喺紀錄片先有交代 書反而係多啲關於伊藤詩織呢個人嘅背景 點解想做記者 佢以前嘅學業同工作 事件發生後嘅日常生活 朋友家人關係等等 內心掙扎嗰啲都有交代嘅 但我覺得電影交代得更好 見到清水潔呢個名字出現又係好驚喜 因為佢嘅書我之前都拜讀過：《被殺了三次的女孩》 非常 非常 非常好睇 一個記者追查一宗案件嘅記錄 少失望但都算係令我對呢個人同呢件事嘅了解深入咗 🖤 7.6/10

喺圖書館書架搵其他書嘅時候見到《紅鶴》 因為睇過中意《紅鶴》所以就攞起咗同一個作者寫嘅呢本《綁架之日》 都係懸疑小說 一句說話簡介呢個故事： 一個綁匪反被人質控制嘅家庭倫理基因工程悲劇 綁架犯男主角叫金明俊（題外話：我唯一追嘅男團ASTRO有個成員都係叫金明俊🤣 因為個女患重病冇醫藥費所以決定綁架富豪個女 用贖金支付高昂嘅手術費 點知揸車去到富豪間屋前 乜都未開始做 架車就撞到準備綁架嗰個細路女 唔理三七廿一先帶走個女 後來先發現原來佢父母已經死咗 換言之綁架換贖金呢個計劃已經唔work 但金明俊依然好頭痕 到底要點處理呢個細路 以及自己個細路 冇開spoiler所以唔講太多 雖然見到金明俊同人質細路女羅熙嘅反轉互動有時係搞笑嘅 但本書好多情節都幾細思極恐 關於改造天才 自私自利 結局又埋咗條可怕嘅伏線暗示呢一切可能又會再度發生 啱啱search相先知原來有翻拍做韓劇 搵日睇睇 好睇！ 💙 8/10

終於有一次可以睇完本書即日做record 繼續係韓國文學系列 今次係非常唔同面向嘅作品 早就見識過呢本書名 因為太特別太難以理解所以印象深刻 上個禮拜喺圖書館意外見到 用咗三日就完讀 讀正文之前有各界推薦同導讀 見到不只一個人話睇到落淚 當時我憑住佢哋嘅隻字片語同書背嘅簡介 自大地覺得： 呢啲內容 不至於搞喊我掛 結果 呢本由四個故事組成嘅中篇小說 每一個故事讀到最後我都不能自控地心痛到喊 我唔係讀愛情嘢容易喊嘅人 比起愛情 親情友情同寵物情更容易觸動我 對上一次因為感情線而喊而書好似已經係五六年前嘅英文小說 粗暴嘅總括：呢本就係講述分手故事嘅小說 作者係朴相映 主角姓朴 叫映 用第一人稱寫 好難唔將主角代入為作者本人嘅故事 一邊睇一邊覺得： 啊作者真係一個好差勁嘅人 點解可以咁樣過日子 啊作者嘅日常真係好糜爛 啊作者咁做絕對係一個渣男 啊作者⋯⋯唉 睇完第一個故事〈在熙〉就已經覺得佢就係我最中意嘅一篇 睇完全本書之後都冇改變呢個想法 映係生理男性 同性戀者 在熙係生理女性 異性戀者 映嘅大學同學兼三年室友 佢哋兩個之間嘅感情好微妙 好親密 而且無以名狀 冇任何一個名詞可以適當準確地形容佢哋呢種關係 （絕對唔係曖昧 完全沒有一絲愛情嘅成分） 甚至中文書名完全就係為呢個故事而設： 在熙—主人翁 燒酒—映同在熙都係重度酒精愛好者 我—映本人 全書主角 冰箱裡的藍莓與菸—在熙會買藍莓畀映食 映為咗報答在熙就會買菸送畀在熙 擺喺雪櫃 因為在熙中意凍冰冰嘅菸嘅感覺 啱啱講咗 呢本係講分手嘅書 所以在熙都不例外 都同映分咗手 因為在熙要結婚 要脫離呢個同居室友 第二個故事係我睇到最一頭霧水嘅 但好多人都盛讚呢篇 主要係 我完全唔get映嘅呢位戀愛對象 反而我更focus喺佢同母親之間嘅關係描寫 映對呢個世界有好多不滿 從佢嘅反叛同幾乎沒有嘅貞潔可以反映出 而呢一切佢歸咎於自己嘅母親 到佢阿媽癌症末期真係死到臨頭嘅一刻 佢最最希望嘅係聽到阿媽嘅一聲道歉 非常可惜地 「媽媽完全不給我任何可憐她的機會，簡直太有才華了。」 最後兩章其實都係同一個故事 關於我最中意嘅角色：奎浩 一個可愛單純率直勤力但少少蠢嘅人 當然最後都係分咗手 呢段已經係呢本書裡面窺探到嘅映嘅唯一一段稍微正常少少嘅愛情關係 睇到最後不斷喺內心問如果同點解 點解唔聯絡？點解唔追？ 如果有會點？ 映嘅生活非常糜爛 如果唔係將佢嘅呢啲經歷寫成呢本咁出色嘅書 可謂人生一事無成 人生幾乎只有酒精同性愛 啊 冇錯 性愛係呢本書一個頗重要嘅元素 但絕不色情 因為只係平淡地誠實地描述映呢個人嘅日常 而做愛就係佢嘅日常 （同時）輾轉於不同男人之間就係佢嘅日常 毫無鬥志 污糟邋遢 非常不討喜嘅男主角 甚至讀到佢感染「凱莉」嘅時候有一刻覺得佢抵死 一刻咁大把 但係 作者實在非常成功地將映嘅悲傷不著痕跡地滲透出嚟 導致每一個故事、每一段關係嘅結束 都牽動到讀者嘅情緒 前面有幾好笑 後面就有幾悲傷 係真係覺得心痛嗰種 必須闔埋本書喊一陣發洩下先嗰種 唔知點形容呢本書 好神奇 第一次睇咁真實嘅描述同性戀者喺當代社會嘅情感生活嘅小說 真實到我冇辦法不相信呢個就係作者本人嘅經歷 同時唔希望呢個爛人映就係作者本人 愛情小白居然可以睇呢本分手書睇到喊 真係好厲害 睇完先明推薦序同導讀啲人講乜 因為自己都親身感受到了 擺雪櫃嘅藍莓同煙 我應該會記一世 🧡 9.6/10

一本講現代飲食文化出咗咩問題、點解會出現呢啲問題嘅書 涵蓋好幾方面： 全球飲食單一化 — 全世界都食緊差不多嘅嘢 肥胖人口成為主流 — 其實錯不在自律或者懶惰 更應該負責任嘅係政府同食品商？ 現代人愈食愈多肉類同蛋白質 主食呢個概念逐漸消失 — 冇澱粉質嘅飲食先算係「健康」 充斥高度加工、高油高脂高鹽高糖食品 — again 政府同食品商嘅錯 etc 特別中意佢講肥胖嗰個chapter raise out咗好多發人深省嘅提問 當我哋可以輕易喺美人魚連鎖咖啡店買到一杯有102g糖嘅飲品 行入每一間超市便利店都可以喺cashier櫃檯搵到糖同朱古力 乜肥胖真係純粹係個人唔夠自律同懶惰而造成咩？ 美國有三分二肥胖人口 有冇一種可能係 其實另外嗰三分一瘦人先係「唔正常」嘅一群？ 我哋一方面不斷譴責歧視肥人 肥胖污名化嚴重到有學者話喺肥胖或過重喺美國不單止有害健康 更係「應受道德譴責」 另一方面毫無意識搞到現代飲食文化烏煙瘴氣嘅幕後黑手係邊個 絕口不提呢種垃圾食物隨手可得嘅有毒環境 究竟係推緊邊個落地獄？ 仲未提貧窮同肥胖嘅關係 係啊係啊買菜平過買肉 但你諗真啲 新鮮蔬菜抵食定高脂高鈉罐頭肉抵食？ 工時長人工低 屋企連proper廚房都欠缺嘅人會唔會喺屋企煮飯？ 喺外國仲有另一個情況：食物沼澤 唔係沙漠 因為並非0食物選擇 只係有得揀嘅都係毫無營養價值嘅速食 呢個情況尤其出現喺收入水平較低嘅城市同地區 都好make sense 學歷高人工高嘅社區有啲賣有機農產品嘅小店好正常 主要係有色人種住嘅移民、外勞貧民區 大概只係得M記同pizza hut 呢啲情況 我哋仲可唔可以咁理直氣壯理所當然咁指住啲肥人話 你哋肥係自己攞嚟嘅？ 原來自己對呢啲topic嘅書都真係幾感興趣 以後會借多啲嚟睇 💛 9/10

一直都好想睇韓江 但圖書館唔係成日有佢嘅書 有次見到佢嘅呢本散文集 並唔係熟悉嘅名字 諗住 啊 不如睇咗佢本散文先開始佢出名嘅小說作品 但我睇到一頭霧水 真係睇唔明 所以連comment都畀唔到 🤍 6.2/10

如果《白》係單純嘅睇唔明 呢本《素食者》就係睇唔明再加恐怖 寫呢篇嘅我未睇過任何網上嘅評論分析 單憑我自己弱小愚鈍嘅腦袋閱讀完之後嘅最大感想係 不適 我相信令讀者感到不適係韓江嘅目的 但點解要咁做 佢呢個故事到底想講啲乜 我真係完全get唔到🥶🥶🥶🥶😨 基於呢個原因 我2025年韓國文學嘅目標要暫時放下韓江了 我未handle到你sorry 💚 6.4/10

每次睇叔叔個書櫃都蠢蠢欲動借返屋企睇 點知第一次就中伏 睇書背介紹 以為係探討社會議題嘅偵探懸疑小說 但唔知係咪我睇唔慣舊一輩嘅日本推理小說 定純粹呢個作者唔係我杯茶 完全唔ok 不斷講登山 但仔細冗長到我跳住讀 好多over咗嘅修飾句 好多比喻暗喻講官僚系統但太婉轉艱澀 好多內心獨白但唔係好覺有助劇情推進 我expect推理查案小說節奏要明快啲 但呢本係好慢好慢 慢到好悶 純粹想八月完咗佢所以速戰速決 🤍 3/10

朋友去英國買嘅手信 雖然好中意Pooh但從來未睇過佢嘅書 作者好準確咁拿捏到故事簡單嘅程度 簡單但不至於無聊 係好難嘅事 太愛呢隻bear of little brain了 💛 7.6/10

吾父畀我嘅required reading😂😂😂 人生第一次認認真真睇理財/投資書 雖然裡面有好多概念已經喺阿爸口中理解過 佢令我有種安慰嘅感覺： OK我而家份人工係好奀好奀 但我勝在夠後生 而投資最厲害嘅係compound interest 所以只要我早開始投資就冇問題 🧡 7.6/10

中文書名：七十歲死亡法案，通過 被非常有趣嘅題材吸引到而快速讀完嘅小說 日本人口老化問題實在太嚴重 導致好多社會同經濟問題 新首相公佈將於兩年後實施「七十歲死亡法案」 顧名思義 只要到咗七十歲就要死 法案實施後 已經過咗七十歲嘅都要喺三個月內死 故事主要圍繞一個有齊不同年齡層嘅家庭： 經濟支柱父親（58） 家庭主婦母親（55） 臥病在床奶奶（82） 單身獨居長女（31） 啃老繭居族細仔（28） ［年齡未必準確 記憶開始丟失 +-5咁上下］ 講呢一家人對於呢條法案有咩反應同行動 必須睇到最後先會get玄妙之處 呢度唔穿橋 睇完之後有種「冇想像中咁好睇」但又「比想像中好睇」嘅感覺 前者嘅失落來自呢條法案背後想帶出嘅message 我略嫌有啲巧立名目 以為會講多啲支持同反對嘅人之間嘅拉扯 但冇乜 主要都係主角媽媽嘅內心吐槽 但後者嘅驚喜來自支線 啃老細仔嗰part 佢係一個名牌大學畢業嘅年輕人 exactly就係「社會大眾」期望會有「一番作為」嘅「未來社會棟樑」 而現實就係畢業後第一份工做得唔理想 裸辭之後一直失業 已經維持咗呢種幾乎不出房門嘅狀態第三年 講到放不下自己尊嚴 同時社會對年輕人就業嘅苛刻 同自己嘅狀態某啲地方好相似 有少少共鳴 可以輕鬆讀完嘅作品 🩷 7.6/10

之前有睇過講自然生態、動物生境嘅書 但focus講植物嘅就真係未睇過 頗需要一定bio程度先會get嘅書（大概DSE bio嘅level） 作者用人/動物嘅感官去介紹植物如何感知呢個世界 包括視覺、聽覺、觸覺、記憶等等 好有趣嘅切入點同角度 所以唔會話好悶 一如以往睇呢類自然書嘅感受： 生命真神奇 💚 8.2/10

第二本荼毒室嘅書 因為之前跳咗步 所以由呢本開始順返次序 算係一本幾全面嘅入門書 方方面面都講下 但佢同以往大學philo course讀過嘅入門書/文不同嘅地方係 佢嘅目的比起向讀者簡介呢個議題 更似係表達筆者自己嘅睇法 再帶出一堆問題鼓勵讀者自己再讀書再思考 尤其欣賞講identity crisis同動物嗰幾個chapter 就係中意哲學呢種冇嘢搵嘢搞、係都要煩著自己、最終落得厭世、思考好累同我就係一個冇道德嘅人嘅結論 有太多值得quote低嘅句子段落 精選幾個擺喺度 🩶 8.4/10

想拜讀好耐好耐好耐好耐嘅作品 終於因為睇完極速一百米嘅電影而下定決心要開呢本關於跑步嘅小說 雖然一個係短跑一百米 一個係長跑箱根驛傳 箱根驛傳 應該不論對跑步嘅人定冇跑步嘅人嚟講都係一件好神聖嘅事 ——十個人接力跑半馬 而且唔係市區平地 而係跑上山 箱根山 半馬已經癲 半馬接力係咩概念？？？ 睇之前對箱根驛傳嘅比賽形式有個大概嘅概念 睇書先知呢件事最癲嘅係時間 通常啲人跑10K 一個鐘內完成都已經算好 半馬21K就兩個鐘至兩個半鐘左右 但箱根驛傳嘅選手 每一區嘅時間都基本上唔會多於一個半鐘 甚至講返參加預賽嘅資格（因為太多參賽隊伍 所以要先參加預賽挑選最快嘅10隊參賽） 每個人都必須要有5000米17分鐘內、或10000米34分鐘內嘅正式比賽record 10000米 即係10K 一般人一個鐘都算快嘅成績 連入圍資格都冇 所以書裡面形容跑手嘅速度仲快過單車 我真係信 我呢個完全唔跑步嘅人真係無法相信呢個世界上居然有人可以做到呢件事 大概三分鐘跑完1K 然後維持20-23K 中途上斜落斜 零下嘅溫度著短衫短褲跑地下結冰有雪嘅山路馬路 真係完全想像唔到 講返故事 箱根驛傳必須由來自同一大學嘅10位田徑隊選手完成 而《強風吹拂》就係圍繞住從來冇參加過箱根驛傳、甚至冇長跑田徑隊員嘅寬政大學 呢十個人本來只係單純嘅室友關係 一齊住喺破破爛爛嘅竹青莊 突然有一日 大佬青瀨話要一齊參加箱根驛傳 呢十個人裡面只有青瀨同新室友阿走平日有跑步習慣 亦即係 呢班由跑步門外漢、從來冇接受過正式跑步鍛鍊、甚至從來冇認真跑過步嘅人組成嘅寬政大隊伍 就憑住不知哪來嘅勇氣同鬥志 同其他田徑大學一齊跑箱根驛傳 故事就係講呢十個人如何備戰同如何應戰 主角當然就係青瀨同阿走 唯二識跑步嘅人 但兩人都因為跑步而留下啲陰影 青瀨有膝蓋舊患 阿走被以前嘅田徑隊員排擠 發生過暴力事件 各人如何克服自己嘅難關 一步一步完成自己嘅路程 從中得到教訓同體悟 就係呢本書好睇個地方 實在太欣賞青瀨同阿走之間嘅惺惺相惜同相處 阿走成為青瀨下定決心拉全竹青莊嘅人落水一齊參加箱根驛傳嘅最大動力 青瀨又係令阿走重新體會跑步到底為何物嘅靈魂人物 書裡面嘅角色不斷問： 到底跑步嘅目的係咩 到底我為咩而跑？ 跑步嘅真諦究竟係咩？ 十個人 得到十個不同嘅答案 而一百個讀者 又會有一百種解讀 竹青莊十個人嘅程度、長處都不一 有人速度快啲 有人擅長跑上坡 有人下盤穩陣 有人應變能力強 所以即使呢個比賽有20支隊伍 每區每個選手都喺同一條賽道上比賽 終點同目的地看似都一樣 但其實贏嘅定義對每位選手而言都不同 就好似人生 大家都係過自己嘅一生 遠睇人人都差不多 但何謂成功 其實人人都唔一樣 每個人嘅目標都唔同 所以速度快唔係跑步唯一準則 賺幾多錢 人際關係有幾好 有幾幸福 都唔係人生唯一準則 認清自己為何而跑 為何而活 先係重點 未完 更重要嘅係 認清目標之後你會發現 呢個目標根本就遙不可及到永遠都冇可能達成 而呢點係好事 正因為唔會達成 所以先會不斷有「下一次」嘅努力同嘗試 明明只係講跑步 全本書由第一章開始到最後一章都係圍繞住跑步 但透過跑步而傳遞到畀讀者嘅message遠超於跑步 只能夠自己讀自己體會 有鼓勵人心 有熱血沸騰 有搞笑 有感動 非常喜歡的小說作品 仲有改編嘅動畫 可以加入待睇清單 💛 9.2/10

因為書名太靚而借嘅書 微風行過我們的髮絲 而英文係 The wind blowing through our sorrow 點解髮絲係sorrow 抱住呢個疑問去睇呢本處處透露哀傷嘅小說 果然好哀 短短二百幾頁嘅偵探小說 涵蓋議題包括： 養父母、父母虐打、戀童癖、身體殘障、剝奪個人理想志向目標 縱火、溺水、墜樓、絞殺、燒傷、刀傷 睇書背簡介會以為係一個少年嘅故事 仔細研究封面會以為係兩個少年嘅故事 實際上 係三個少年同一個女孩嘅故事 兩個各自過住好苦好苦但說不得嘅人生嘅少年遇上彼此 微妙嘅情感因為對對方嘅遭遇嘅同情而變成恨意同殺意 結局係我唔中意嘅open ending 但對呢四個人嚟講 就係最好嘅結局 書嘅主視角用偵探嘅身份撥開重重案件嘅迷霧 一路理清案件之間嘅關係 意外發現兩位少年令人心碎嘅經歷 查案嘅描述有營造到撲朔迷離嘅感覺 但犯案手法略嫌有少少唔真實 遭遇太痛心 睇完好沉重 心口有重物壓住 呼吸不暢順嗰種 希望有日象徵希望、幸福、未來嘅微風可以行過少年少女嘅髮絲 🩶 7.2/10

年尾嘅閱讀速度就會直線上升 因為迫切地想喺今年內完成已經開咗嘅書😂 貫徹全年嘅韓國文學目標（唔理 小說都計） 關於青年被困精神病院嘅故事 到底邊個負責寫中文譯本嘅內容簡介！！寫得極差 令讀者我帶住完全錯嘅expectation去睇呢本書 睇簡介會以為係兩個無辜嘅正常廿幾歲青年唔知點解去咗精神病院、講佢哋如何奮力逃離 結果佢兩個根本就有病 睇呢本書嘅心情好複雜 成日睇到笑 但觸動情緒嘅位又喊到好崩潰 *註 睇書可以喊到崩潰係極其罕有嘅事 一向好欣賞幽默嘅作者 好感激呢位作者充分運用佢嘅幽默感 主角秀明好細個就有幻聽 出入過好多次精神病院 幻聽終於消失後 又因為口吃同好大程度上嘅社交恐懼而日日匿喺屋企 有日被阿爸趕出街 無啦啦就被人告非禮強姦 阿爸送佢入精神病院 聲稱佢要喺裡面直到永遠 另一個主角承民係財閥家的廢柴私生子 十幾歲就有縱火前科 又係有入住過精神病院嘅經驗 但同擔驚受怕嘅鵪鶉秀明唔同 佢係易燃嘅爆竹 非常火爆 亦可以話係性格鮮明 以前係滑翔翼飛行員 點知後來眼病發作被取消飛行資格 從此佢失去呢個世界上唯一一個自由嘅空間 同精神病有關嘅作品都必定有抹悲情嘅色彩 悲來自自由、夢想同希望呢三樣人生最光彩嘅東西同時被剝奪 出唔到院固然令人絕望 但原來更可悲嘅係畀你出到院都無補於事 因為你以前仰望窗外嗰個自由嘅世界其實並唔係你嘅現實 現實係你已經失去喺外面世界「正常」生活嘅能力 所以千辛萬苦終於批准出院 你又開始盼望可以入院 所以最自由嘅竟然係喺醫院窗邊望向外面世界嘅呢個幻想空間同時間 承民用盡方法想逃離 因為佢好想喺完全失明前飛多最後一次 豁出性命都在所不惜 秀明就連出院嘅動力都冇 因為佢好清楚 佢出到去都係呢個死樣 咁不如留喺醫院裡面仲安全仲舒服 兩個人嘅差異造成好大嘅拉扯 亦係呢本書最觸動人心嘅地方 結局我覺得係作者可以創造到最好最理想嘅happy end 因為兩個人都搵到自己自由飛翔嘅嗰片天空 睇到好後先明白點解書名叫「射向我心臟」 原因擺quote 好耐冇讀過完全0愛情線嘅故事 秀明承民呢對唔可以稱為兄弟嘅特殊關係 更貼切嘅形容係戰友 因為形象同性格都刻劃得好深刻 反差好大 所以腦海裡面有好清晰嘅二人身影 承民自稱歐巴算係其中一個好深刻嘅畫面 *註 韓文歐巴oppa係女性對較年長男性嘅稱呼 姑且當係哥哥 男性對男性應該叫hyung 不過有睇開韓劇嘅各位應該都好清楚 所以承民呢度係取笑緊秀明一把及腰嘅長髮以及清秀嘅外貌 少少覺得唔完整就係護理師崔基勳嗰part 以為呢個角色係伏筆 點知係我諗多咗 故事有改編做電影 封面已經寫住呂珍九嘅大名 咁啱呢排重溫緊德魯納酒店 真係好難想像具燦星變成李秀明嘅形象😂😂 🖤 8/10

簡介比正文吸引嘅書 作者真係去咗郵輪打工 呢本書係佢嘅親身經歷 唔知係咪100% 但一定係啟發自佢嘅工作所見所聞 係好有趣嘅題材 裡面嘅事都算得上有趣 但唔知點解就係覺得本書有啲無聊 冇追看性 而且法文翻譯做中文都唔傳神 尤其敘事者「我」有鄉音、英文唔叻、仲要搞翻譯不能嘅gag總係覺得奇奇怪怪咁 不過都算係對郵輪嘅了解深入咗 💙 5/10

吉卜力迷當然不能錯過任何關於宮崎駿/吉卜力嘅書 偶然見到圖書館有呢本就即刻借 作者都係日本動畫界嘅人 製作人同評論家 平時睇網友share自己觀感就多 睇業界人士講吉卜力真係第一次 好多新奇嘅觀點 例如《千與千尋》 湯婆婆其實係製作人鈴木敏夫嘅化身 而油屋並唔係咩風化場所 而係吉卜力工作室 之所以全部員工都係女性 因為呢個就係吉卜力嘅情景😂 神明去油屋房東紓壓 隱喻緊睇動畫嘅觀眾透過吉卜力嘅作品暫時放下日常生活嘅壓力 而鈴木敏夫身為製作人嘅角色就係考慮商業元素 所以以宮崎駿為首個油屋員工都唔多中意佢 變咗反派角色 呢個解讀真係第一次聽！！ 又例如《幽靈公主》同哥斯拉都有關係 其實麒麟獸化身為螢光巨人 係暗示緊哥斯拉 新型武器嘅出現可以攻擊哥斯拉 達達拉城研發到槍砲都可以攻擊螢光巨人 哥斯拉又經常被當作核爆炸嘅代表 所以螢光巨人最後都有爆炸 不過喺宮崎駿嘅創作下 爆炸會帶來生機 正如麒麟獸可以給予生命 同時可以掠奪生命一樣 文明可以促使人類進步 亦可以加速人類滅亡 真係有好多好有趣嘅觀點 吉卜力迷值得一睇 🩵 7/10

荼毒室第二本完讀～ 冇上一本咁精彩 呢本特別在用「小日常」入題： 穿衣、工作、聽歌、演唱會、講故事、去旅行 睇標題完全唔會估到到底呢篇講咩topic 係幾有趣 不過冇咁多新insight 最中意講故事同習慣呢兩篇 期待之後兩本 大時代同人生種種 🩷 6.5/10

今日喺牙醫診所等得太耐 耐到睇完擺喺診所嘅呢本書😂😂😂 左頁係字 右頁係插畫 所以其實可以好快就揭完 就係作者嘅心事合集 應該可以撫慰到某啲人嘅心靈 但對於等緊洗牙嘅我嚟講效果一般😂 🩶 6.5/10

差不多拖咗一個月先record🙈 朋朋送的書🫶🏻 書背見到設定已經覺得好有意思 愈睇愈覺得有意思嘅小說： 有一日 全世界所有人都突然無預警地收到一個不明來歷嘅木盒 上面寫著「你的生命長度就在裡面」 入面係一條象徵你生命長度嘅繩 因為人人都有 database好大 所以不久後就可以靠量度繩嘅長度去準確得知自己仲有幾長命 故事主要圍繞7位主角發展 角色之間有情侶朋友 都有互不相識但巧妙地有扣連嘅關係 讀嘅時候一定會問自己嘅問題：如果係你 你會唔會打開個盒？ 我到而家都仲未有答案😂 但某程度上呢個就係我嘅答案—未決定到 即係暫時唔打開住 最最欣賞呢本書嘅位係 佢意外地好哲學 而作為一個業餘哲學愛好者 呢一點實在非常中我 喺幾多unexpected嘅地方都令我諗起以前睇過讀過嘅哲學命題 包括但不限於： ｜Ring of Gyges 如果你有一隻戴上就可以變隱形嘅戒指 做任何（壞）事都唔會有後果嘅話 你仲會唔會遵守道德呢？ 再放大啲 如果所有行動都冇後果嘅話 人類嘅道德規範仲存在嗎？ 收到短繩嘅人既然知道自己就快死 咁佢哋係咪就可以無視法紀？ 收到長繩嘅人既然知道自己有排都唔會死 咁佢哋係咪就可以任意妄為去做啲挑戰生命嘅荒誕事？ ｜決定論VS自由意志 用一個事例去說明呢條繩預測壽命個準確程度嘅可怕之處 一對新婚夫婦一齊打開個盒發現一個人長繩一個人短繩後 決定一齊跳河殉情 結果短嘅死咗 長嘅死唔去 換言之 佢連你會呢個時候打開個盒、見到條繩後會去自殺、死唔死得去 都準確預測到 延伸下去 我哋每一個決定都或多或少地影響緊自己嘅壽命 咁所以如果條繩一早就存在 咁係咪代表佢/佢所代表嘅某個存在早就預測、控制、決定好我哋人生中嘅每一個行動、每一個決定？ 咁人類仲有冇自由意志？ 另 醫生救人其實係咪真係救緊人？ 救得返其實同醫生有冇關？佢本來就註定唔會咁快死 ｜生命嘅意義 長度係咪量度生命意義價值嘅唯一標準？ 短命係咪就代表你被剝奪快樂嘅權利？ ｜神是否存在 如果神真係存在 點解佢會咁樣對我？點解佢要逼我面對咁殘酷嘅苦難？ 點解佢要奪去呢啲人嘅生命？ 實在冇辦法一一盡錄閱讀期間嘅所有思考 就算無視小說內容 淨係有呢堆思考體驗 都可以令我對呢本書給予好高嘅評價 當然係有沙石嘅 由幾位唔share同一件事、同一條時間線嘅角色去拓展嘅小說都好容易有鬆散嘅毛病 而且7個人物嚟講又真係算多 所以有時會唔太記得上次講到邊 或者覺得跳嚟跳去 但整體而言都係好欣賞好喜歡 尤其呢本書滿載朋朋嘅心意同溫度 誠意推薦🫶🏻🫶🏻🫶🏻 唔想劇透所以擺多啲quotes 2026年暫時嘅閱讀進度緩慢 居然要二月尾先睇完第一本小說 💚 8.4/10

睇咗好耐好耐先睇完嘅書😂😂😂 （因為中途有好多障礙物aka其他書 某次喺一拳見到好靚嘅封面 水彩風樹林 睇咗佢個prologue 讀到一句好正好正嘅quote 然後就決定買 一個意大利植物學家寫嘅關於樹木同世界嘅故事書 開頭唔明點解書名要叫Tree Stories 讀到最後兩個chapter先終於明白 啊 作者真係講緊樹嘅故事 譬如係紀念法國大革命成功嘅大規模植樹 世界上最貴最高級嘅小提琴之所以無法複製係因為造小提琴嘅木材都已經不復在 因為一把梯所用嘅木材而鎖定綁架案嫌犯並成為史上首個用作呈堂證供嘅植物學案例 以及最最深刻嘅集體香蕉狂熱 香蕉狂熱呢單嘢真係好癲 值得詳細分享😂 話說上世紀60年代 吸食各類型嘅精神藥物係潮流 當迷幻藥迷幻菇已經滿足唔到當時嘅人嘅時候 一樣新興迷幻劑莫名其妙地誕生了： 香蕉 準確嚟講 係香蕉皮嘅粉末 自從一篇刊登喺雜誌、聲稱吸完香蕉粉之後好high嘅文章紅遍全美後 周圍都係教你如何調配香蕉粉嘅食譜 不外乎都係刮香蕉皮白色嗰層嘢出嚟 用火燒到變黑色粉 然後吸食 一夜之間所有人都搶香蕉 嗰篇文章嘅投稿人仲話自己見到兩個緝毒部門嘅便衣警察喺超市裡面巡邏 話唔知會唔會有一日購買大量香蕉會變成一條罪名 而家覺得荒謬至極 奈何當年就係全城至hit嘅潮流 甚至驚動到美國FDA走去研究到底香蕉係咪含有迷幻劑成分 不過FDA嘅官方聲明都無法阻止瘋狂嘅民眾繼續吸 當年甚至發明咗個字去形容香蕉粉嘅迷幻劑成分： bananadine 熱潮嘅嘢通常都係莫名其妙開始 又莫名其妙突然消失 喺冷藏同航運技術唔發達嘅年代 香蕉呢種熱帶水果喺美國係非常昂貴嘅奢飾品 但60年代正正係各項科技起飛嘅時候 所以香蕉漸漸變成家家戶戶都可以輕易購入嘅食物 甚至成為銷量最高嘅生果 後來啲人發現 嗰篇話食完香蕉粉好high嘅文章係全美最大水果（香蕉）進口商寫嘅 所以一切都係marketing 呢單嘢好笑到我應該會記一世😂😂😂😂 諗起之前讀過嘅《人類很有事》 果然人類真係很有事 植物從來都係被忽視嘅一群 不論係一般大眾定係科學界 事實上 植物佔咗地球上所有生命體嘅85% 而動物只有0.3% 然而 呢0.3%幾乎壟斷咗我哋理解同判斷生物如何運作嘅知識 喺植物上prove到嘅嘢必須要喺動物身上複製到先會被承認 但喺動物觀察到嘅就自自然然會被認為係真理 點解我哋會有呢種觀念？ 點解會由0.3%去主宰另外99.7%？ 作者多次喺本書度提出佢對呢種世界運行方式嘅不解同不滿 which我覺得係大開眼界同幾有說服力嘅 in bananadine we trust 人類就係一種自認為好理性嘅動物 💚 8.2/10

（搵唔到中譯本高清嘅圖 用住日版先） 中文譯本出版後冇幾耐就已經見到唔知係出版社定書局定讀書帳嘅IG介紹 當時已經覺得勁吸引勁想睇 差不多四年後機緣巧合喺圖書館見到 即借 「東京藝大」四個字 不論係東京定藝大 對我嚟講都非常陌生 因為睇過藍色時期嘅動畫 所以知道東京藝大非常非常難考入 直接引用書裡面嘅一段： 藝大整體的入試倍率為7.5倍，據說之前還曾經超過六十倍。這已經不是考試，而是顯微鏡的倍率了吧。 有人稱藝大為「藝術界的東大」，倒不如說東大是「學術界的藝大」更為貼切。 所以入到去讀嘅都係天才 藝大有分美校同音校 就係美術部同音樂部 作者係同藝術毫無關係嘅人 但佢太太係藝大嘅學生 成日喺屋企見到好多莫名其妙摸不著頭腦嘅操作 又不時聽到佢分享藝大嘅見聞 覺得實在太有趣 於是發揮自己作家嘅本職 寫一本關於東京藝大嘅書 裡面基本上都係佢同諸位藝大學生嘅訪談內容 包含入讀原因、作品分享、練習過程、困境挑戰 因為作者自己都係行外人 所以讀者睇起上嚟唔會有門檻 係可以好初步又幾全面咁了解藝大生嘅一本書 讀完之後覺得東京藝大就係一間工廠 製造藝術品 同時製造創作藝術品嘅人 因為藝術cover嘅範圍太廣 由油畫到鑄金都包 所以學生有自己鑄鐵造紙磨刀嘅需要 另一方面 音校嘅學生要借錢買演奏會嘅禮服 幫教授aka師傅斟茶遞水換衫（莫名諗起千秋王子不屑做嘅嘢😂😂 可能要重考十幾次先入到嚟讀 但嚟到又可以全年不見人影完全唔上堂 咁辛苦考入嚟 再咁辛苦喺度打滾 結果都可能係社會上其他人眼中嘅「廢人」 浪費時間浪費金錢整「廢物」 佢哋咁辛苦追求用咩棍敲打三角鐵、咩手勢揸先最表達到樂曲情緒 結果外人話「吓係人都識打啦」 捱更抵夜睇火、每隔一個鐘頭調教一次火爐溫度 為咗整舊陶器 而一般人甚至未必分辨到佢同淘寶貨嘅分別 到底佢哋追求緊啲咩呢？ 嗰樣嘢又係咪值得佢哋花費咁多嘢去追求呢？ 對我而言係大開眼界嘅一本書 不過又冇想像中咁好睇🤣🤣 整體而言都係好推薦的 💛 7.4/10

先講結論： 一本說不上好好睇但想推薦畀每個人都去睇下嘅書 一個網約司機接到一張莫名其妙嘅單 要車一個莫名其妙嘅女人同埋一個莫名其妙嘅大黑箱穿州過省去華盛頓 完成呢單job可以獲得豐厚嘅酬金 但條件係唔可以過問同個箱相關嘅一切 聽起上嚟就非常有可疑 但總之呢個司機就係莫名其妙咁踏上自己負責開車嘅賊船 完全唔係本身expect嘅內容 一丁點都無關 究竟呢個suspicious至極嘅黑箱裡面裝咗啲咩？ 佢係咪就係書名所講嘅black box of doom？ 睇到頗後期先揭曉到呢啲由打開本書讀第一頁之前就已經有嘅疑問 所以某程度上都睇得幾納悶 因為一直都唔解謎 因為怕被人追蹤 而好明顯呢個箱嘅行蹤係唔可以被人知道嘅 所以兩位主角都冇任何電子器材跟身 所以一路上對於自己已經成為全網最紅焦點人物一事一無所知 偏偏司機男主角係焦慮型人格 全程都好擔心呢單嘢黃咗點算 而女主就一直同佢講 你唔好成日都將所有嘢諗到咁悲觀咁極端 但事實就係Reddit已經創作咗好多個完完全全偏離事實嘅平行宇宙故事出嚟 有上帝視角嘅讀者睇嘅時候真係覺得荒謬到好好笑😂😂 唔想穿橋講到底何謂black box of doom 但呢本係一本批判現代社會極端原子化、演算法、社交平台嘅書 用好新穎好有趣嘅方式探討呢啲議題 問題就在於佢探討嘅深度已經蓋過咗leisure reading fiction嘅最高趣味承載量 即係本書會睇到覺得悶、講嚟講去都係講呢啲、幾時入正題解決你個箱？ 另一致命傷係 冇一位角色係討喜嘅 冇 完全冇 男主角女主角 男主角阿爸 前FBI探員 箱嘅主人 想偷走個箱嘅人 全部角色都唔討喜 正如一開頭所講 儘管唔係全然enjoyable嘅書 但都係好推薦大家去睇 因為好多對話都好thought provoking 但切記佢唔係一本有趣嘅roadtrip查案故事 💚 7.2/10

最近睇書睇得好慢！！ 自從2023年睇完《模仿犯》之後 《樂園》就一直喺待讀清單 喺已經完讀嘅朋友催促下終於借咗嚟睇 冇辦法脫離「模仿犯續集」嘅先入為主概念去閱讀 即使知道故事其實毫無關係 可能因為差別太大 不論係主題、沉重程度、角色性格、兇手、殺人動機 全部都好大分別 所以有少少期待落差 但依然係一本好書 故事講述一個十二歲就意外身亡嘅男仔阿等 佢阿媽發現阿等生前畫嘅畫揭示咗一宗阿等死後先公諸於世嘅命案 甚至裡面有外人包括警察都唔知嘅細節 阿媽好想知自己個仔係咪有咩超能力 於是搵咗記者滋子去調查 畫中命案牽涉同阿等母子毫無關係嘅另一個家庭 一對夫婦十幾年前殺死咗自己嘅長女 並將屍體埋喺自己間屋嘅地板下面 十幾年後 屋企發生火災 夫婦突然向警方自首 不過因為控訴時效已過 警方唔會起訴 到底阿等係咪有超能力？ 夫婦點解要狠下心腸殺死自己嘅親生骨肉？ 樂園就係圍繞呢兩個主線發展 講係咁講 但其實第一個問題喺好早期就已經解答咗😂 同模仿犯好唔同嘅係 呢本書好溫馨 即使係令人髮指（？）嘅家庭倫理慘劇 依然離不開溫馨嘅主調 而且案件規模細好多 比起模仿犯嘅連續殺人狂魔 牽涉幾十個少女 樂園專注講一單命案（後來有另一件案件） 所以格局細好多 反而可以更深入講每個角色嘅背景 讀者都有多啲空間思考到底父母/家人可以如何應對呢啲情境 好睇 但我覺得不至於係「宮部美幸必讀之作」 「樂園」嘅意思係出其不意嘅 🧡 8.2/10

當初對佢嘅期望有幾大 後來對佢嘅失望就有幾大 故事setting係真係好新奇好有趣 女主角Lauren冇拍拖冇結婚 自己嘅30歲生日party完咗之後醉酒狀態返到屋企發現 屋企多咗個老公 check下自己手機 對話紀錄同相簿都證明呢個老公真確存在 問家人朋友鄰居都認可呢個老公 唯獨自己唔記得自己結過婚 仲未搞清發生咩事之際 老公要爬梯上閣樓搵啲嘢 然後落返嚟嘅係第二個老公 again 手機有新嘅結婚相同對話紀錄 家人朋友鄰居嘅口吻亦聽唔出任何異樣 好似前一個老公不曾存在咁 Lauren試驗式地叫二號老公上閣樓攞嘢 果不其然 三號老公誕生了 所以Lauren屋企嘅閣樓突然有神奇魔法 可以不斷不斷換老公 每次換老公 Lauren嘅人生都會有轉變 可能係不同工作 可能係鄰居關係 可能係親友嘅婚姻家庭狀態 可能係財政狀況 所以除咗係老公體驗 都係Lauren自己嘅人生體驗 令人失望嘅係 一直到本書嘅最後 Lauren都真係只係keep住不停換老公。。。 某程度上係冇劇情推展 Lauren自己亦都冇任何成長可言 因為不推薦呢本書所以我會直接劇透結局 💣💣💣 去到最後 Lauren已經換咗超過200個老公 曾經試過為咗𠱁老公上閣樓而不擇手段嘅方式有： 偷某前任老公嘅friend嘅毒品 落藥毒老公、 偷某前任老公個仔嘅氣槍 開槍射老公 ？？？？？完全係癲狂狀態 到最後佢覺得真係唔得喇 我要定落嚟 嚟緊呢個老公無論如何我都要keep嘅時候 佢斷自己後路嘅方法就係一把火燒咗自己間屋 因為冇閣樓就冇得換老公 但完全冇正式同呢個老公相處過接觸過 留一個好似暫時睇落ok和諧嘅對話就全書完 （唯一面對面對話係喺屋企樓下嘅火災現場。。。） 真係完全唔ok 所有你expect嘅嘢都冇 除咗佩服呢個idea嘅腦洞大開之外 劇情展開完全唔掂 睇到一半想棄但都堅持住 以為結局會有surprise 結果都係失望 🧡 5.2/10

今年嘅其中一個閱讀目標係童書 終於睇完第一本 喺圖書館見到覺得幾吸引就借咗 返到屋企用少於一個鐘就睇完 作者負責埋畫畫 覺得畫比文字更有特色😂 去goodreads睇其他人嘅comment發現 原文英文好睇好多 因為啲押韻全部lost in translation🕳️🕳️🕳️🕳️ 明白都係無可避免嘅 但係失去咗好多樂趣 節錄一首中文都正但英文更正嘅詩 DON’T CHANGE ON MY ACCOUNT If you're sloppy, that's just fine. If you're moody, I won't mind. If you're fat, that's fine with me. If you're skinny, let it be. If you're bossy, that's all right. If you're nasty, I won't fight. If you're rough, well that's just you. If you're mean, that's all right too. Whatever you are is all okay. I don't like you anyway. 🖤 7.2/10